ძუძუს კიბოს ახალი მკურნალობა: ველიპარიბი - კარბოპლატინი

ძუძუს კიბო დაავადებათა ჯგუფია, რომელსაც კლინიკურად და გენეტიკურად განსხვავებული ქვეტიპები აქვს. ამიტომ აუცილებელია თითოეული პაციენტისთვის ინდივიდუალურად ეფექტიანი მკურნალობის შერჩევა. ძუძუს კიბოს მკურნალობის წარმატების გასაზრდელად საჭიროა მიზანმიმართული მკურნალობის ახალი შესაძლებლობები.
ოპერაციამდე ჩატარებული, სიმსივნის შემამცირებელი (ნეოადიუვანტური) ქიმიოთერაპია საშუალებას გვაძლევს დავაკვირდეთ პაციენტის პასუხს ქიმიოთერაპიაზე. ნეოადიუვანტური მკურნალობით მიღწეული სრული პათოლოგიური პასუხი, განსაკუთრებით სამმაგად უარყოფით ჯგუფში, პირდაპირ არის დაკავშირებული როგორც დაავადების გარეშე გადარჩენასთან, ისე საერთო გადარჩენასთან, ანუ მკურნალობის წარმატებასთან.
ლაბორატორიულმა კვლევებმა აჩვენა, რომ დნმ-ის აღდგენის დამთრგუნველი ADP-რიბოზის პოლიმერაზის (PARP) ინჰიბიტორი — ახალი პრეპარატი ველიპარიბი — მნიშვნელოვნად აძლიერებს კარბოპლატინის — სტანდარტული ქიმიოთერაპიის ერთ-ერთი პრეპარატის — მოქმედებას.
კვლევის პირველადი საბოლოო წერტილი იყო სრული პათოლოგიური პასუხი, ხოლო მეორეული საბოლოო წერტილები — მოვლენების გარეშე გადარჩენა და საერთო გადარჩენა. კვლევის მიხედვით, III ფაზაში სამმაგად უარყოფითი პაციენტების ჯგუფში ველიპარიბისა და კარბოპლატინის კომბინაციით სრული პათოლოგიური პასუხი მიღწეული იყო %51 შემთხვევაში, საკონტროლო ჯგუფში კი ეს მაჩვენებელი %26 იყო. ველიპარიბისა და კარბოპლატინის ჯგუფში ყველაზე ხშირი გვერდითი მოვლენები ჰემატოლოგიური იყო: ნეიტროპენია, თრომბოციტოპენია და ანემია.
ამრიგად, ამ კვლევამ აჩვენა, რომ სამმაგად უარყოფითი ძუძუს კიბოს დროს სტანდარტულ ქიმიოთერაპიაზე ველიპარიბისა და კარბოპლატინის დამატება ზრდის სრული პათოლოგიური პასუხის მაჩვენებელს.
წყაროები
Adaptive Randomization of Veliparib–Carboplatin Treatment in Breast Cancer.
N Engl J Med. 2016 Jul 7;375(1):23-34. doi: 10.1056/NEJMoa1513749.
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.