ძუძუს ყველა წარმონაქმნი კიბოა?

ძუძუს შეშუპება და სხვა ცვლილებები ხშირია და უმრავლესობა კიბო არ არის. მიუხედავად ამისა, ექიმის მოთხოვნილი ტესტების ჩატარება მდგომარეობის დეტალური შეფასებისთვის ძალიან მნიშვნელოვანია.
ძუძუს ცვლილებები
გარეგნობის ცვლილებისას დაუყოვნებლივ მიმართეთ ექიმს და შემდეგ მამოგრაფიას ნუ დაელოდებით. მამოგრაფია უმცირეს ცვლილებებსაც აჩვენებს და ასაკის მიხედვით ექიმის რჩევით რეგულარულად უნდა ჩატარდეს.
ცვლილებები შეიძლება ასე ჩამოვთვალოთ:
1. შეშუპების ან სიმაგრის შეგრძნება:
- შეშუპება ძუძუში ან მის კიდესთან
- შეშუპება იღლიაში
- გასქელებული ან მაგარი ქსოვილი იღლიაში, ძუძუში ან მის კიდესთან
- ძუძუს ფორმის ან ზომის ცვლილება
წარმონაქმნებს სხვადასხვა ზომა და ფორმა აქვს და უმეტესობა კიბო არ არის. ერთ ძუძუში შეშუპების აღმოჩენისას მეორეც შეამოწმეთ; თუ ორივე ერთნაირია, შეიძლება ნორმალური იყოს. ნორმალური ქსოვილი ზოგჯერ კვანძოვანია. ზოგი ქალი რეგულარულად თვითგასინჯვას აკეთებს, რაც ნორმალურ ძუძუს გააცნობს და ცვლილების ადვილად აღმოჩენაში დაეხმარება. რა თქმა უნდა, თვითგასინჯვა მამოგრაფიას ვერ ცვლის.
2. ძუძუსთავიდან გამონადენი ან ფორმის ცვლილება:
- გამონადენი ძუძუსთავიდან
- სისხლიანი სითხე
- ძუძუსთავის ფორმის ცვლილება (მაგალითად შიგნით ჩაბრუნება)
გამონადენს განსხვავებული ფერი და კონსისტენცია შეიძლება ჰქონდეს. ჩვეულებრივ კიბოს ნიშანი არ არის. კონტრაცეპტივებმა, ზოგმა წამალმა და ინფექციამაც შეიძლება გამოიწვიოს. ზუსტი მიზეზის გასაგებად ექიმს დაუყოვნებლივ მიმართეთ.
3. კანის ცვლილებები
- ძუძუს კანის ქავილი, სიწითლე, აქერცვლა, ჩაღრმავება ან შეჭმუხვნა
ძუძუს ნორმალურად მიჩნეული ცვლილებები:
ქალთა უმრავლესობას სიცოცხლეში ძუძუს ცვლილებები უვითარდება. ბევრი ჰორმონებით ან დაბერების ნორმალური მიზეზებითაა გამოწვეული. უმეტესობა კიბო არ არის და კეთილთვისებიანი ცვლილებები ეწოდება. მიუხედავად ამისა, ნებისმიერი ცვლილებისას ექიმს მიმართეთ და შემდეგ მამოგრაფიას ნუ დაელოდებით.
- მენოპაუზამდელი ახალგაზრდა ქალების ძუძუს უფრო მკვრივი ქსოვილი აქვს: მეტი ჯირკვლოვანი და შემაერთებელი, ნაკლები ცხიმოვანი ქსოვილი. გამოსახულებაზე მკვრივი ქსოვილიც და სიმსივნეც მკვრივ თეთრ უბნებად ჩანს, ამიტომ მამოგრაფიაზე შეფასება რთულდება. სიმკვრივე ასაკთან ერთად მცირდება.
- მენსტრუაციის დროს ან მანამდე შესაძლოა შეშუპება, მგრძნობელობა ან ტკივილი იგრძნოთ. ჭარბი სითხის გამო ერთი ან რამდენიმე კვანძი შეიძლება შეიგრძნოთ, რაც მენსტრუაციის დასრულებისას თავისით გადის. ვინაიდან ზოგი წარმონაქმნი ნორმალური ჰორმონული ცვლილებითაა გამოწვეული, ექიმმა ციკლის გარეთ განმეორებით გასინჯვა შეიძლება მოითხოვოს.
- ორსულობის დროს შესაძლოა კვანძები იგრძნოთ რძის წარმომქმნელი ჯირკვლების ზრდისა და რაოდენობის მატების გამო.
- ძუძუთი კვებისას მასტიტად წოდებული ანთება შეიძლება განვითარდეს რძის სადინრების დახშობით. ძუძუ წითლდება, კვანძები მატულობს, თბილი და მგრძნობიარე ხდება. ნიშნები ინფექციით შეიძლება იყოს გამოწვეული და ჩვეულებრივ ანტიბიოტიკებით მკურნალობენ. ზოგჯერ სადინრების დაცლაც საჭიროა. თუ მკურნალობის შემდეგ სიწითლე ან მასტიტი რჩება, დაუყოვნებლივ მიმართეთ ექიმს.
- თუ მენოპაუზა გეწყებათ, მენსტრუაციები იკლებს და ჰორმონებიც იცვლება. ამან მენსტრუაციის გარეშეც მგრძნობელობა შეიძლება გაზარდოს და ადრე არსებულზე მეტი კვანძი იგრძნოთ.
- თუ ჰორმონებს იღებთ (მენოპაუზის თერაპია, კონტრაცეპტიული აბი ან ინექცია), ძუძუ უფრო მკვრივი ხდება, რაც მამოგრაფიის შეფასებას ართულებს. ჰორმონების მიღება ექიმს შეატყობინეთ.
- თუ მენსტრუაცია აღარ გაქვთ (მენოპაუზაში ხართ),ჰორმონები იკლებს, ქსოვილი სიმკვრივეს კარგავს და უფრო ცხიმოვანი ხდება. შეიძლება აღარ იგრძნოთ კვანძი ან ტკივილი და ძუძუსთავიდან გამონადენი აღარ იყოს. სიმკვრივის დაკარგვა მამოგრაფიის შეფასებას აადვილებს. შემდეგ სტატიებში დეტალურად განვიხილავთ გამოსახულებით მეთოდებს (მამოგრაფიას, ულტრაბგერასა და ძუძუს MR-ს) და კეთილთვისებიან თუ ავთვისებიან წარმონაქმნებს.
წყაროები
NIH, National Cancer Institute, Website: Cancer Types, Breast Cancer.
https://www.cancer.gov
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.