Süd vəzisində yaranan hər kütlə xərçəngdirmi?

Süd vəzisində şişkinlik və başqa dəyişikliklərə tez-tez rast gəlinir. Bunların çoxu xərçəng deyil. Yenə də həkimin istədiyi testləri etdirmək vəziyyətinizin daha ətraflı qiymətləndirilməsi üçün çox vacibdir.
Süd vəzisində görülən dəyişikliklər
Süd vəzinizin görünüşündə dəyişiklik görsəniz, vaxt itirmədən həkimə müraciət etməlisiniz. Növbəti mammoqrafiya tarixinədək əsla gözləməyin. Mammoqrafiya ən kiçik dəyişiklikləri belə göstərə bilən testdir və yaşınıza görə həkimin tövsiyəsi ilə rutin edilməlidir.
Süd vəzisində dəyişiklikləri belə sıralaya bilərik:
1. Şişkinlik və ya sərtlik hissi:
- Süd vəzisində və ya kənarında şişkinlik
- Qoltuqaltında şişkinlik
- Qoltuqaltında, süd vəzisində və ya kənarında qalın və ya sərt toxuma
- Süd vəzisinin forma və ya ölçüsündə dəyişiklik
Şişkinliklər müxtəlif ölçü və formadadır. Çoxu xərçəng deyil. Bir süd vəzisində şişkinlik hiss etdikdə digərini də yoxlamağı unutmayın. Hər ikisində eynidirsə, normal ola bilər. Normal süd vəzi toxuması bəzən düyünlü olur. Bəzi qadınlar müntəzəm özünümüayinə edir. Bu, normal süd vəzisinin necə olduğunu öyrənməyə və dəyişikliyi asan hiss etməyə kömək edir. Əlbəttə, özünümüayinə mammoqrafiyanı əvəz etmir.
2. Məmə ucundan axıntı və ya forma dəyişikliyi:
- Məmə ucundan axıntı
- Qanlı maye
- Məmə ucunun forma dəyişikliyi (içəri çökməsi kimi)
Məmə ucu axıntısı müxtəlif rəng və quruluşda ola bilər. Adətən xərçəng əlaməti olmadığını demək olar. Doğuşa nəzarət həbləri, bəzi dərmanlar və infeksiya da buna səbəb ola bilər. Buna görə dəqiq səbəbi bilmək üçün vaxt itirmədən həkimə müraciət etməlisiniz.
3. Dəridə dəyişikliklər
- Süd vəzi dərisində qaşınma, qızartı, qabıqlı görünüş, çökəklik və ya büzüşmə
Süd vəzisində normal sayılan dəyişikliklər:
Qadınların çoxunun həyatı boyunca süd vəzilərində dəyişiklik olur. Çoxu hormonlar və ya yaşlanmada normal sayılan səbəblərdəndir. Həmçinin çoxu xərçəng deyil və benign (xoşxassəli) dəyişiklik adlanır. Yenə də hər hansı dəyişiklik görsəniz, növbəti mammoqrafiya tarixinədək gözləmədən həkimə müraciət etməlisiniz.
- Menopauzaya girməmiş gənc qadınların süd vəziləri daha sıx toxumalıdır. Sıx toxumada daha çox vəzili və birləşdirici toxuma, daha az yağ olur. Sıx toxuma və şişlər görüntülənəndə eyni cür bərk ağ sahələr kimi görünür. Buna görə mammoqrafiyada qiymətləndirilməsi daha çətindir. Yaş artdıqca süd vəzi toxumasının sıxlığı azalır.
- Aybaşı zamanı və ya ondan əvvəl süd vəzilərində şişkinlik, həssaslıq və ağrı hiss edilə bilər. Bu dövrdə əlavə maye olduğundan bir və ya bir neçə düyün hiss edə bilərsiniz. Aybaşı bitdikdə dəyişikliklər öz-özünə keçəcək. Bəzi düyünlər normal hormonal dəyişiklikdən yarandığı üçün həkim aybaşıdan kənar başqa vaxt yenidən müayinə etmək istəyəcək.
- Hamiləlikdə süd vəzilərində düyün hiss edilə bilər. Səbəbi süd istehsal edən vəzilərin böyüməsi və sayının artmasıdır.
- Əmizdirmə dövründə mastit adlanan süd vəzi iltihabı ola bilər. Süd axacaqlarının tutulması ilə yaranır. Mastit süd vəzisini qızardır və düyünlər artır, həmçinin daha isti və həssas olur. Əlamətlər infeksiyaya bağlı yarana bilər və əsasən antibiotiklə müalicə edilir. Bəzən axacaqları boşaltmaq lazım ola bilər. Müalicədən sonra qızartı və ya mastit davam edirsə, dərhal həkimə müraciət etmək düzgün olar.
- Menopauzaya girirsinizsə, aybaşı dövrləriniz azalacaq. Hormon səviyyəniz də dəyişir. Aybaşı olmasa da, bu, süd vəzilərini daha həssas edə bilər. Əvvəlkindən çox düyün hiss edə bilərsiniz.
- Hormon istifadə edirsinizsə (menopauza hormon müalicəsi, doğuşa nəzarət həbi və ya inyeksiya), süd vəzi daha sıx olur. Bu, mammoqrafiyanın qiymətləndirilməsini çətinləşdirə bilər. Hormon istifadə etdiyinizi həkimə bildirin.
- Artıq aybaşı olmursunuzsa (menopauzaya girmisinizsə),bədənin hormon səviyyəsi azalacaq, süd vəzi toxuması sıxlığını itirəcək və daha yağlı olacaq. Artıq düyün və ağrı hiss etməyə və ya məmə ucundan maye gəlməyə bilər. Sıxlığın azalması mammoqrafiyanın daha asan qiymətləndirilməsini təmin edəcək. Sonrakı yazılarda süd vəzi görüntüləmə üsulları (mammoqrafiya, süd vəzi ultrasəsi, süd vəzi MR) və xoşxassəli, bədxassəli kütlələr haqqında ətraflı danışacağıq.
Mənbələr
NIH, National Cancer Institute, Website: Cancer Types, Breast Cancer.
https://www.cancer.gov
Bu məqalə sizə faydalı oldu?
Rəyiniz məzmunumuzu yaxşılaşdırmağa kömək edir.





Oxucu şərhləri
Şərhinizi paylaşın
Adınız və şərhiniz yalnız administrator təsdiqindən sonra dərc olunur. E-poçt ünvanınız ziyarətçilərə heç vaxt göstərilmir.
İlk şərhi siz yazın.