HPV ვაქცინა საშვილოსნოს ყელის კიბოს გარდა სხვა კიბოებისგანაც იცავს

ადამიანის პაპილომავირუსის (HPV) საწინააღმდეგო აცრა HPV ინფექციისა და მის მიერ, ჩვეულებრივ, გამოწვეული კიბოების (საშვილოსნოს ყელისა და თავისა და კისრის კიბოების ჩათვლით) პრევენციის ეფექტიანი გზაა.

ASCO 2024 კონგრესამდე გამართულ პრესკონფერენციაზე გამოკვეთილმა ანალიზმა აჩვენა, რომ HPV-ზე აცრილ მამაკაცებში თავისა და კისრის კიბოს რისკი 56%-ით დაბალი იყო.

შეხვედრის მოდერატორმა და ASCO-ს პრეზიდენტმა დოქტორმა Lynn Schuchter-მა თქვა: „დიდი ხანია ვიცოდით, რომ HPV ვაქცინას HPV ინფექციის განვითარების შეჩერება შეუძლია, დიახ, თუმცა კიდევ უფრო მნიშვნელოვანია კიბოს, განსაკუთრებით საშვილოსნოს ყელის კიბოს, პრევენცია. ეს მართლაც მნიშვნელოვანი კვლევაა, რომელიც ვაქცინის გავლენაზე ცოდნას აფართოებს“.

მკვლევრებმა აშშ-ის TriNetX მონაცემთა ბაზიდან შექმნეს შეწყვილებული საკვლევი ჯგუფი: 761 ათასი HPV-ზე აცრილი და აუცრელი მამაკაცი და 946 ათასი HPV-ზე აცრილი და აუცრელი ქალი.

ქვემოთ ნაჩვენებია HPV-სთან დაკავშირებული კიბოები:

კვლევის შედეგები

აუცრელებთან შედარებით HPV-ზე აცრილ მამაკაცებში ყველა HPV-სთან დაკავშირებული კიბოს რისკი 54%-ით დაბალი იყო (შანსების თანაფარდობა [OR], 0,46; P < 0,001), თავისა და კისრის კიბოების რისკი კი 56%-ით დაბალი (OR, 0,44; P < 0,001). ანალური და პენისის კიბოს შემთხვევები ანალიზისთვის საკმარისი არ იყო.

აუცრელებთან შედარებით HPV-ზე აცრილ ქალებში ყველა HPV-სთან დაკავშირებული კიბოს რისკი 27%-ით დაბალი იყო (OR, 0,73; P < 0,05), საშვილოსნოს ყელის კიბოს რისკი 54%-ით დაბალი (OR, 0,46; P < 0,05), თავისა და კისრის კიბოების რისკი კი 33%-ით დაბალი, თუმცა ეს მიგნება მნიშვნელოვანი არ იყო (OR, 0,67; 95% CI, 0,42-1,08). ანალური კიბოს შემთხვევები ანალიზისთვის საკმარისი არ იყო; ვულვის ან საშოს კიბოს განვითარების ალბათობა HPV-ზე აცრილ და აუცრელ ქალებში მნიშვნელოვნად არ განსხვავდებოდა.

თუმცა აცრილ ქალებში მაღალი ხარისხის ბრტყელუჯრედოვანი ინტრაეპითელური დაზიანებების (OR, 0,44), საშვილოსნოს ყელის in situ კარცინომის (OR, 0,42) და პათოლოგიური Pap შედეგების (OR, 0,87) განვითარების ალბათობა აუცრელებზე დაბალი იყო. ასევე ნაკლები იყო კონიზაციისა და LEEP-ის (loop electrosurgical excision procedure) ჩატარების ალბათობა (OR, 0,45).

ეს კვლევა ნამდვილად უსვამს ხაზს HPV ვაქცინის მნიშვნელობას.

HPV ვაქცინაცია კიბოსგან დაცვის ერთ-ერთი ყველაზე ეფექტიანი გზაა.

მიუხედავად ამისა, მრავალ ქვეყანაში, მათ შორის აშშ-ში, HPV ვაქცინაციის მაჩვენებელი შედარებით დაბალია. აშშ-ის კიბოს ეროვნული ინსტიტუტის მიხედვით, 2022 წელს 13-15 წლის მოზარდთა მხოლოდ დაახლოებით 58%-ს ჰქონდა მიღებული რეკომენდებული ორი ან სამი დოზა HPV ვაქცინა.

შენიშვნა: 9-15 წლის ასაკში საკმარისად მიიჩნევა ვაქცინის 2 დოზა, 15 წლის შემდეგ კი რეკომენდებულია 3 დოზა.

მიზანია მოზარდი გოგონებისა და ბიჭების აცრა HPV ინფექციის განვითარების აღსაკვეთად, რაც, როგორც ვხედავთ, კიბოს რისკსაც ამცირებს.

HPV ვაქცინაციის მაჩვენებლის გასაზრდელად ეფექტიანი ჩარევების განსაზღვრა კრიტიკულად მნიშვნელოვანია კიბოს თავიდან აცილებადი ტვირთის შესამცირებლად.