რატომ არ უნდა მივიღოთ ტკბილი სასმელები საჭმელთან ერთად?

გამაგრილებელი სასმლის გარეშე ჭამა არ შეგიძლიათ? ბევრ ჩვენგანს მსგავსი მდგომარეობა აქვს, თუმცა ტკბილი სასმელით მიღებული საკვებისას ორგანიზმში მეტი ცხიმი გროვდება.
რაციონში საკვები ნივთიერებების თანაფარდობა ჯანსაღი წონის შენარჩუნებასა და სიმსუქნის პრევენციაში იმაზე მნიშვნელოვან როლს თამაშობს, ვიდრე ადრე ეგონათ. ამ კვლევის მთავარი მიზანი იყო დაედგინა, რამდენად მოქმედებს სხვადასხვა შემადგენლობის საჭმელზე შაქრით დატკბობილი სასმლის მცირე პორციის დამატება მადაზე, ენერგიის მეტაბოლიზმსა და ცხიმის წვაზე.
21 ივლისს BMC Nutrition-ში გამოქვეყნებული ახალი კვლევის მიხედვით, ცილოვანი საკვები და ტკბილი სასმელები ერთად არ უნდა მივიღოთ. ამან შეიძლება ენერგეტიკულ ბალანსზე უარყოფითი გავლენა მოახდინოს, ორგანიზმში მეტი ცხიმი დააგროვოს და სიმსუქნე გამოიწვიოს. აღმოჩნდა, რომ ჭამისას ტკბილი სასმლის კალორიების მესამედი არ იხარჯება, ცხიმის მეტაბოლიზმი მცირდება და ორგანიზმი საკვების მეტაბოლიზებისთვის ნაკლებ ენერგიას ხარჯავს.
მკვლევრებმა დაადგინეს, რომ ტკბილი სასმელები ცხიმის ოქსიდაციას, ანუ წვას, ამცირებს და ჭამის შემდეგ ცხიმის მოლეკულების დაშლას ანელებს. თუ ტკბილ სასმელს %15 ცილის შემცველ საკვებთან ერთად იღებენ, ცხიმის ოქსიდაცია საშუალოდ %7.2 გრამით მცირდება. თუ მას %30 ცილის შემცველ საკვებთან ერთად იღებენ, ცხიმის ოქსიდაცია საშუალოდ 12.6 გრამით მცირდება. ტკბილი სასმელით მიღებული საჭმლისთვის მეტაბოლიზმი დამატებით კალორიებს არ ხარჯავს.
კვლევაში საშუალოდ 23 წლის პირები მონაწილეობდნენ: 13 მამაკაცი და 14 ქალი, სულ 27 ჯანმრთელი ადამიანი. სხვადასხვა კვებისას ტკბილი სასმლისა და ცილოვანი საჭმლის შედეგებს რეგულარულად აკვირდებოდნენ. მონაწილეები ერთ კვებაზე ტკბილ სასმელს იღებდნენ, შემდეგზე — არა, შემდეგ კი ისევ სასმელთან ერთად ჭამდნენ. დაკვირვებისა და შეფასებისას ითვალისწინებდნენ ყველა ფაქტორს, მათ შორის კალორიებს, ჟანგბადს, ტემპერატურას, ნახშირორჟანგსა და წნევას.
შედეგების მიხედვით, ტკბილ სასმელთან ერთად მიღებული საკვები ორგანიზმის ენერგეტიკულ ბალანსს არღვევს. გავრცელებული შეხედულების საპირისპიროდ, ტკბილი სასმლით მიღებული დამატებითი ენერგია მეტ დანაყრებას არ იწვევს. აღმოჩნდა, რომ ეს დამატებითი ენერგია არც იხარჯება და ცხიმის ოქსიდაციასაც ამცირებს.
შედეგად, ჭამისას მიღებული ტკბილი სასმელები ცხიმის წვას მნიშვნელოვნად ამცირებს და ორგანიზმში მეტი ცხიმის დაგროვებას იწვევს. ეს კვლევა ბევრ სამზარეულოში განუყრელი ტკბილი სასმელების წონის მატებასა და სიმსუქნეში როლის შესახებ მეტ მონაცემს იძლევა. თუმცა კვლევა ხანმოკლე იყო და ჯანმრთელ ადამიანებში ჩატარდა. უფრო ხანგრძლივმა კვლევამ წონის პრობლემების მქონე პირებში შეიძლება განსხვავებული შედეგები მოგვცეს.
წყაროები
Postprandial energy metabolism and substrate oxidation in response to the inclusion of a sugar- or non-nutritive sweetened beverage with meals differing in protein content.
BMC Nutrition, 21 July 2017
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.