უდიდესი კვლევა, რომელმაც მობილური ტელეფონის გამოყენებასთან ტვინის სიმსივნის რისკის მატება არ აჩვენა

ის, რომ მობილური ტელეფონის გამოყენება ტვინის სიმსივნის რისკს არც ზოგადად, არც ქვეტიპისა თუ სიმსივნის მდებარეობის მიხედვით არ ზრდის, Journal of the National Cancer Institute ჟურნალში გამოქვეყნებულმა პროსპექტულმა კვლევამ აჩვენა. 

მკვლევრებმა 14-წლიანი დაკვირვებით გაერთიანებულ სამეფოში ქალების დიდი კოჰორტა (ჯგუფი) შეისწავლეს. შედეგებმა მობილური ტელეფონის მომხმარებლებში არც ტვინის ნებისმიერი სიმსივნის და არც ძირითადი ავთვისებიანი ქვეტიპების (გლიომა და გლიობლასტომა) რისკის მატება არ აჩვენა.

კვლევა, რომელშიც 1,3 მილიონი მონაწილე იყო ჩართული

1996-დან 2001 წლამდე მკვლევრებმა კვლევაში ჩართეს 1935-დან 1950 წლამდე დაბადებული 1,3 მილიონი ქალი. მონაწილეებს მობილური ტელეფონის გამოყენებაზე პირველად მედიანურ 2001 წელს და ხელახლა 2011 წელს ჰკითხეს.

2001 წლის კითხვარი 776 ათასმა ქალმა შეავსო. იმ დროს 286 ათას მონაწილეს მობილური ტელეფონი არასოდეს გამოუყენებია, 489769-ს გამოყენებული ჰქონდა, ხოლო 66362 მონაწილე მას ყოველდღიურად იყენებდა.

2011 წლის კითხვარში იმ მონაწილეთა 45,8%-მა, რომლებიც 2001 წელს მობილურს არასოდეს იყენებდნენ, განაცხადა, რომ კვირაში სულ მცირე 1 წუთი ტელეფონით საუბრობდა. მათი თქმით, მობილურს საშუალოდ 4,3 წლის განმავლობაში იყენებდნენ.

შედეგები

14-წლიანი დაკვირვებისას ტვინის 3268 სიმსივნე გამოვლინდა. მობილური ტელეფონის მომხმარებლებთან შედარებით, მისი არასოდეს გამომყენებელი მონაწილეებისთვის ტვინის ყველა სიმსივნის კორექტირებული ფარდობითი რისკი 0,97 იყო (95% სანდოობის ინტერვალი, 0,90-დან 1,04-მდე). 

მარჯვენა მხარეს მდებარე სიმსივნეებისთვის ფარდობითი რისკი 1,15 იყო (95% სანდოობის ინტერვალი, 0,94-დან 1,40-მდე), მარცხენა მხარეს მდებარე სიმსივნეებისთვის კი — 1,05 (95% სანდოობის ინტერვალი, 0,85-დან 1,29-მდე).

სიმსივნის ტიპების მიხედვით, მუდმივი მომხმარებლებისა და არასოდეს გამომყენებლებისთვის ფარდობითი რისკები ასეთი იყო:

• გლიომა — 0,89 (95% სანდოობის ინტერვალი, 0,80-დან 0,99-მდე)
• გლიობლასტომა — 0,93 (95% სანდოობის ინტერვალი, 0,82-დან 1,06-მდე)
• მენინგიომა — 1,01 (95% სანდოობის ინტერვალი, 0,87 - 1,17)
• ჰიპოფიზის სიმსივნეები — 0,94 (95% სანდოობის ინტერვალი, 0,73-დან 1,21-მდე)
• აკუსტიკური ნევრინომა — 1,19 (95% სანდოობის ინტერვალი, 0,89-დან 1,59-მდე)

მკვლევრებმა დაწერეს: „ტვინის სიმსივნის ან მისი რომელიმე ქვეტიპის რისკის მატება არ გამოვლენილა არც მობილურის სულ მცირე 10-წლიან მომხმარებლებში და არც საფეთქლისა და თხემის წილების სიმსივნეებისთვის — ტვინის იმ ნაწილებში, რომლებიც ყველაზე მეტად ექვემდებარება ზემოქმედებას“.

საბოლოოდ, ეს მიგნება მტკიცედ უჭერს მხარს აქამდე დაგროვილ მტკიცებულებებს, რომ ჩვეულებრივ პირობებში მობილური ტელეფონის გამოყენება ტვინის სიმსივნის რისკს არ ზრდის. მომავალმა კვლევებმა განსაკუთრებული ყურადღება უნდა დაუთმოს მობილურის ძალიან ინტენსიურ მომხმარებლებს და მუდმივად განვითარებადი ტექნოლოგიის ახალ თავისებურებებს. ამიტომ მომხმარებლებისთვის არასაჭირო ზემოქმედების შემცირების შესახებ რჩევების მიცემა კვლავ გონივრულ სიფრთხილის მიდგომად რჩება.