ადრეული ძუძუს კიბოს მკურნალობის შემდგომი მეთვალყურეობისას მეტი გამოკვლევა მეტ უსაფრთხოებას იძლევა?

ადრეული ძუძუს კიბოს პირველადი მკურნალობის შემდეგ მნიშვნელოვანია დაავადების მიმდინარეობის ხანგრძლივი დაკვირვება. მრავალმა კვლევამ აღნიშნა, რომ ასეთი პაციენტების ხანგრძლივი მეთვალყურეობისთვის საკმარისია დაავადების ისტორია, ფიზიკური გასინჯვა და ყოველწლიური მამოგრაფია.
სანდო ონკოლოგიური საზოგადოებები, ჟურნალები და კვლევითი ჯგუფები აღნიშნავენ, რომ ადრეული ძუძუს კიბოს მქონე პაციენტებში განმეორებითი სისხლის ანალიზები და რადიოლოგიური გამოსახულებითი კვლევები საჭირო არ არის. ამ მიმართულების მრავალ კვლევაში პაციენტები ორ ჯგუფად დაყვეს: ერთში აკვირდებოდნენ მხოლოდ დაავადების ისტორიით (ლიმფური კვანძების ჩართულობა, ოპერაცია და სხვა შესაძლო მკურნალობაზე პასუხი და ა.შ.), ფიზიკური გასინჯვითა და ყოველწლიური მამოგრაფიით; მეორეში ამას განმეორებითი სისხლის ანალიზები და რადიოლოგიური კვლევებიც ემატებოდა. შედეგებით ჯგუფებს შორის მნიშვნელოვანი განსხვავება ვერ გამოვლინდა. ამასთან, ერთ-ერთ ყველაზე სანდო ბრიტანულ სამედიცინო ჟურნალში გამოქვეყნდა ექიმების მიერ ფართოდ გამოყენებული, ძვირადღირებული და სარგებლობის არასაკმარისი მტკიცებულების მქონე დიაგნოსტიკისა და მკურნალობის ტოპ 5 სია. მასში პირველადი მკურნალობის შემდეგ ადრეული ძუძუს კიბოს ხანგრძლივი მეთვალყურეობისას გამოყენებული განმეორებითი სისხლის ანალიზები და რადიოლოგიური კვლევებიც მოხვდა. მიუხედავად ამისა, მრავალი ექიმი ამ პაციენტებში აღნიშნულ მეთოდებს კვლავ იყენებს.
უსაჭიროო გამოკვლევებსა და მკურნალობას მრავალი უარყოფითი შედეგი აქვს როგორც პაციენტისთვის, ისე ქვეყნის ეკონომიკისთვის. მაგალითად, არასაჭირო რადიოლოგიური კვლევები პაციენტებს ზედმეტ გამოსხივებას აძლევს. ბრიტანეთის მედიცინის ინსტიტუტის მონაცემებით, გამოსხივება ძუძუს კიბოს ყველაზე მეტად გამომწვევი 2 გარემო ფაქტორიდან ერთ-ერთია. იმის გათვალისწინებით, რომ მხოლოდ გამოსხივებამაც კი შეიძლება კიბო გამოიწვიოს, მნიშვნელოვანია რადიოლოგიური კვლევების საჭიროების ფარგლებში გამოყენება. უსაჭიროო კვლევებმა შეიძლება ცრუ დადებითი შედეგებიც მოგვცეს — კიბოს არარსებობის მიუხედავად მისი დიაგნოზი დაისვას. აღწერილია, რომ სისხლის ანალიზებში სიმსივნური მარკერების მომატების 3% ცრუ დადებითი შედეგია. ასეთი პასუხები იწვევს არასაჭირო გამოკვლევებს, მკურნალობასა და მცდარ დიაგნოზებს, რაც პაციენტის ფიზიკურ და ფსიქიკურ ჯანმრთელობასაც და ეროვნულ ეკონომიკასაც აზიანებს. ზოგი კვლევა ასევე აჩვენებს, რომ ეს მარკერები მორეციდივე კიბოს აღმოჩენას 4-6 თვით აგვიანებს. ანუ პასუხი სწორიც რომ იყოს, ტესტების სარგებლობა და მგრძნობელობა სადავოა.
ამის მიუხედავად, გამოკითხვების მიხედვით, პაციენტების 80%-ს დაავადების მეთვალყურეობისას ინტენსიური კვლევები სურს, მაგალითად სისხლის ანალიზები და რადიოლოგიური ტესტები, და ამბობს, რომ ასე თავს უფრო უსაფრთხოდ გრძნობს. ამ მდგომარეობის ჩამოყალიბებაზე უდავოდ დიდ გავლენას ახდენს საზოგადოებრივი აღქმა და ექიმის დამოკიდებულება.
ამრიგად, სხვა საკითხების მსგავსად, გამოკვლევისა და მკურნალობის სიჭარბესაც უნდა მოვერიდოთ. რა უნდა იყოს მათი სათანადო მოცულობა და რომელი მიდგომებია იდეალური დიაგნოსტიკის, მკურნალობისა და დაკვირვებისას, ამის კვლევა კვლავ ინტენსიურად მიმდინარეობს. მრავალი სანდო ონკოლოგიური საზოგადოება, ჟურნალი და კვლევითი ჯგუფი განსაკუთრებით არ ურჩევს განმეორებით სისხლის ანალიზებსა და მამოგრაფიის გარდა სხვა რადიოლოგიურ გამოკვლევებს ადრეული ძუძუს კიბოს პირველადი მკურნალობის შემდეგ ხანგრძლივი დაკვირვების პერიოდში. თუმცა საკითხზე კატეგორიული საუბარი ჯერ ნაადრევია. ამჟამად ნათელია ერთი რამ: ზედმეტ გამოკვლევასა და მკურნალობას სარგებელზე მეტი ზიანი მოაქვს.
წყაროები
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.