ASCO 2020 — კიბოს დამმარცხებელი ქალის საერთაშორისო მენტორობის ჯილდო დოქტორ Lillian L. Siu-ს გადაეცა!

მსოფლიოს ერთ-ერთი უდიდესი ონკოლოგიური გაერთიანება, American Society of Clinical Oncology (ამერიკის კლინიკური ონკოლოგიის საზოგადოება), მოკლედ ASCO, ყოველწლიურად აშშ-ის ჩიკაგოში ივნისის პირველ კვირას გამართულ კონგრესზე ონკოლოგიაში დიდი წვლილის მქონე მეცნიერებს სხვადასხვა კატეგორიაში ASCO-ს ჯილდოებს გადასცემს. ერთ-ერთი ჯილდო ახალი თაობის ონკოლოგების აღზრდაში მნიშვნელოვანი როლის მქონე ქალ მენტორებს (ლიდერებს, გზამკვლევებს) ეძლევათ. The Women Who Conquer Cancer (კიბოს დამმარცხებელი ქალები), მოკლედ WWCC, პროგრამით ASCO ეხმარება დაჯილდოებულ ახალგაზრდა მკვლევარ ქალებს კარიერულ წინსვლასა და სფეროში დარჩენაში. ის არც იმ ქალებს ივიწყებს, რომლებმაც დრო, ენერგია და პროფესიული ცოდნა ონკოლოგების განვითარებას მიუძღვნეს და მათ სახელებს მთელ მსოფლიოს აცნობს. წელს, COVID-19 პანდემიის გამო ონლაინ გადაცემულ კონგრესზე „კიბოს დამმარცხებელი ქალის საერთაშორისო მენტორობის ჯილდო“ დამსახურებულმა მკვლევარმა დოქტორმა Lillian L. Siu-მ მიიღო! აკადემიურ წარმატებასთან ერთად, მსოფლიოში 50-ზე მეტი ახალგაზრდა ექიმისა და მკვლევრის მენტორობით მან მომავალი წარმატებული ონკოლოგები / კიბოს მკვლევრები აღზარდა. ახლოს გავიცნოთ დოქტორი Siu.
დოქტორი Lillian L. Siu Princess Margaret კიბოს ცენტრის უფროსი სამედიცინო ონკოლოგი და ტორონტოს უნივერსიტეტის სამედიცინო ფაკულტეტის პროფესორია. ის ცენტრის „I ფაზის პროგრამისა“ და „კიბოს გენომიკის პროგრამის“ კოორდინატორი და „სიმსივნის იმუნოთერაპიის პროგრამის“ კლინიკური ლიდერია. ასევე არის აშშ-ის კიბოს ეროვნული ინსტიტუტის ექსპერიმენტული თერაპიის კლინიკური კვლევების ქსელში Princess Margaret-ის I ფაზის კონსორციუმის მთავარი მკვლევარი. ASCO-ს მმართველ საბჭოსთან ერთად, კიბოს განათლების კომიტეტშიც მუშაობს. ის კანადის ექიმთა სამეფო კოლეჯის წევრია (Fellow of The Royal College of Physicians of Canada), მოკლედ FRCPC, და ამერიკის კლინიკური ონკოლოგიის საზოგადოების წევრთა ჯგუფსაც ეკუთვნის (Fellow of the American Society of Clinical Oncology), მოკლედ FASCO.
„ეს ჯილდო განსაკუთრებულად მნიშვნელოვანია, რადგან წარდგენაში ჩემი აღსაზრდელები და კოლეგები მონაწილეობდნენ. მადლობა მინდა გადავუხადო ყოფილ და ამჟამინდელ აღსაზრდელებსა და კოლეგებს, რომლებმაც ჩემს ნომინაციას მხარი დაუჭირეს. ამ ჯილდოს მიღება ჩემთვის დიდი პატივია.“ — (ციტატა დოქტორი Siu-ს ინტერვიუდან ამერიკის კლინიკური ონკოლოგიის საზოგადოებასთან, ASCO-Daily News.)
მენტორ-მენტორის აღსაზრდელის (მრჩეველ-რჩევის მიმღების) ურთიერთობაუაღრესად მნიშვნელოვანია მომავალი ექიმებისა და მკვლევრების განვითარებისთვის. მენტორები გადამწყვეტ როლს ასრულებენ იმ ონკოლოგებისა და მეცნიერების აღზრდაში, რომლებიც მომავალში კიბოს კვლევებს მიმართულებას მისცემენ და მილიონობით პაციენტს იმედს გაუჩენენ. დოქტორ Siu-ს როგორც მენტორს, ისე აღსაზრდელს დიდი გამოცდილება აქვს. მისი ცხოვრებისთვის მნიშვნელოვანმა მენტორებმა კარიერაზე ღრმა გავლენა მოახდინეს. ონკოლოგიის მსოფლიო პიონერის, დოქტორი Ian Tannock-ის წყალობით ლიტერატურის კრიტიკული შეფასება ისწავლა, დოქტორი Malcolm Moore-ისგან — კლინიკური კვლევები, დოქტორმა Gail Eckhardt-მა კი „განვითარებადი თერაპიები“ გააცნო. თავად ასე ამბობს: „სამივე მენტორი საკუთარი კარიერული გზის გაკვალვაში რჩევით, მხარდაჭერითა და ხელმძღვანელობით დამეხმარა.“
აღსაზრდელობიდან მენტორობამდე
დოქტორი Siu არა მხოლოდ აშშ-სა და კანადაში, არამედ მთელ მსოფლიოში მედიცინის სტუდენტებს, რეზიდენტებს, სპეციალისტებსა და ახალგაზრდა მკვლევრებს უწევს მენტორობას. ჯამში მან 50-ზე მეტ ადამიანს მისცა მიმართულება და მეტ ახალგაზრდამდე მისაღწევად მუშაობას აგრძელებს. მიიჩნევს, რომ წარმატებისთვის მენტორობა „პერსონალიზებული“ და აღსაზრდელის ინდივიდუალურ საჭიროებებზე მორგებული უნდა იყოს: „მჯერა, რომ მენტორობის ყველაზე მნიშვნელოვანი ელემენტია ადამიანს საკუთარი შესაძლებლობების გაცნობიერებასა და რეალიზებაში დაეხმარო.“
დოქტორი Siu-ს მენტორობის სტილი ხშირ პირისპირ შეხვედრებს ეყრდნობა. მისი თქმით, შეხვედრები მხოლოდ სამუშაო თემებით არ შემოიფარგლება და ზოგადად ცხოვრების საკითხებსაც მოიცავს. მთელი პროცესის განმავლობაში მხარს უჭერს აღსაზრდელების ორიგინალურ კვლევით იდეებს, ეხმარება ნაშრომების გამოქვეყნებაში და თითოეულ ეტაპზე უკუკავშირით მათ განვითარებას უწყობს ხელს. ამ ხელმძღვანელობის შედეგად ახალგაზრდა მკვლევრებს საკუთარი კვლევების ეროვნულ და საერთაშორისო პლატფორმებზე წარდგენის შესაძლებლობა ეძლევათ.
მომავლისკენ
დოქტორი Siu მადლობას უხდის კარიერის განმავლობაში მის გზამკვლევ მრავალ ადამიანს და თვითონაც აგრძელებს სხვების შთაგონებას. მომავალზე საუბრისას ხაზს უსვამს, რომ კიბოს კვლევა „პაციენტზე ორიენტირებული“ იქნება. ასევე აღნიშნავს, რომ ონკოლოგიური წამლების შექმნა „პერსონალიზდება“, ანუ კონკრეტული პრეპარატები თითოეული პაციენტისა და დაავადების გენეტიკის შესაბამისად შეიქმნება. ეს პროცესები ისეთ ინოვაციურ ტექნიკებსაც მოიცავს, როგორიცაა „ხელოვნური ინტელექტი“ და „ადაპტირებადი, სპეციალიზებული კლინიკური კვლევის“ დიზაინები (adaptive clinical trial designs).
ინტერვიუში ის აღნიშნავს, რომ ონკოლოგების ურთიერთდახმარება და გამოცდილების გაზიარება კიბოს კვლევებს აძლიერებს. საუკეთესო მაგალითია Princess Margaret კიბოს ცენტრის წამლის განვითარების პროგრამის მკვლევრები, რომლებიც ASCO-ს ფარგლებში ყოველწლიურ სადილზე იკრიბებიან.
„სასიამოვნოა ამ სადილის მონაწილეთა რაოდენობის ზრდისა და ძველ მონაწილეებს შორის უფრო მჭიდრო კავშირების დანახვა. ბევრი მათგანი სწავლისას ჩამოყალიბებული ურთიერთობების წყალობით აკადემიურ კვლევით პროექტებშიც თანამშრომლობს.“ — (ციტატა დოქტორი Siu-ს ინტერვიუდან ამერიკის კლინიკური ონკოლოგიის საზოგადოებასთან, ASCO-Daily News)
ეს ოფიციალური თუ არაოფიციალური შეხვედრები მკვლევრებს ონკოლოგიური საქმიანობისა და კარიერის წინსვლაში ძალიან ეხმარება. დოქტორი Siu ახალგაზრდა მკვლევრებით სიამაყეს ასე გამოხატავს: „მეამაყებიან ჩემი აღსაზრდელები, რომლებიც დღეს წამლის განვითარების საერთაშორისო ლიდერები არიან. ბევრი მათგანი კარგ მენტორადაც აღიარეს და ეს ურთიერთობა მომავალ თაობებს გადასცეს.“ ეჭვგარეშეა, რომ ერთმანეთის წინსვლაში დახმარება კიბოს კვლევების წინსვლასაც დაეხმარება.
ბოლოს კარიერის დასაწყისში მყოფ ახალგაზრდა ონკოლოგებს ასე მიმართავს: „ჩემი ცხოვრების დევიზი 3C-სგან შედგება: Curious, Courageous, Compassionate (იყავი ცნობისმოყვარე, მამაცი და თანაგრძნობიანი!). კარიერის განმავლობაში ეს სამი სიტყვა მეხმარებოდა საკუთარი შესაძლებლობების შექმნაში, კარგი მეგობრების შეძენასა და შეცდომებიდან სწავლაში.“ დოქტორი Lillian L. Siu-ს მსგავსი ძვირფასი ონკოლოგებისა და მკვლევრების არსებობა, მათი დრო და შრომა ახალგაზრდა მეცნიერი ექიმების მხარდასაჭერად, უკეთესი და ნათელი მომავლის რწმენას გვიმტკიცებს.
წყაროები
dailynews.ascopubs.org - 6 May 2020
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.




მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.