ძუძუს კიბოს მკურნალობის შემდეგ ჯანსაღ კვებასა და ვარჯიშს ყურადღება უნდა მიექცეს! რატომ?

ჭარბი წონა მრავალი კიბოს მსგავსად ძუძუს კიბოსთანაც მჭიდროდაა დაკავშირებული. კავშირი შეიძლება გამოიხატოს კიბოს ხელშეწყობით, დაავადების მიმდინარეობასა და მკურნალობაზე პასუხზე უარყოფითი გავლენით. ახლახან გამოქვეყნებულმა კვლევამ ახსნაში კიდევ ერთი წვლილი შეიტანა: ნამკურნალები ძუძუს კიბოს პაციენტები წონის მატებისკენ არიან მიდრეკილი და ეს კიბოს, გულის დაავადებებისა და დიაბეტის რისკს ზრდის.
მრავალ კვლევაში უკვე აღწერილია მკურნალობის შემდეგ წონის მატებისკენ მიდრეკილება. ადრე მატებას არაკიბოიანებთან არ ადარებდნენ, შედარებისას კი შედეგები წინააღმდეგობრივი იყო. ოჯახური მიდრეკილებაც არ ითვალისწინებოდა. ივლისში გამოქვეყნებულ ამ კვლევაში ნამკურნალები და ჩვეულებრივ ცხოვრებაზე დაბრუნებული ქალები არასოდეს დაავადებულებს შეადარეს. გაითვალისწინეს ოჯახური მიდრეკილება, ასაკი, მენოპაუზა და ქოლესტერინის დამწევი წამლებიც.
კვლევაში მსგავსი ოჯახური მიდრეკილების მქონე, წარმატებით ნამკურნალები 303 და არასოდეს დაავადებული 307 ქალის წონას 4 წლის განმავლობაში აკვირდებოდნენ. ქიმიოთერაპიის, ქოლესტერინის წამლებისა და სიმსივნის თვისებების მიხედვით განხილვისას კიბოგადატანილებმა ჯანმრთელებზე მეტი მოიმატეს. ქიმიოთერაპიის მიმღებებში მატება მეტი იყო; მის შემდეგ სტატინის (ქოლესტერინის წამლის) მომხმარებლებში კიდევ უფრო მეტი. სიმსივნის მხრივ მეტი მატება ესტროგენის აღმქმელი რეცეპტორების არმქონე (ესტროგენრეცეპტორუარყოფით) ქალებში იყო.
დასასრულს, წარმატებული მკურნალობის შემდეგ ნორმალურად მცხოვრები ქალები არასოდეს დაავადებულებზე მეტ წონას იმატებენ, განსაკუთრებით ქიმიოთერაპიისა და სტატინის შემდეგ. ასეთი მატება გულის დაავადებებსა და დიაბეტს უწყობს ხელს და ხელახლა კიბოს რისკს ზრდის. ამიტომ გადარჩენილი ქალებისთვის კვებასა და ვარჯიშზე ყურადღება ამ რისკების შესამცირებლად უაღრესად მნიშვნელოვანია.
წყაროები
Weight Change in Breast Cancer Survivors Compared to Cancer-Free Women: A Prospective Study in Women at Familial Risk of Breast Cancer.
Cancer Epidemiol Biomarkers Prev. 2015 Aug;24(8):1262-9. doi: 10.1158/1055-9965.EPI-15-0212. Epub 2015 Jul 15.
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.