Süd vəzi xərçəngi müalicəsindən sonra sağlam qidalanmaya və idmana əhəmiyyət verilməlidir! Niyə?

Artıq çəki bir çox xərçəng növü kimi süd vəzi xərçəngi ilə də yaxından əlaqəlidir. Bu əlaqə artıq çəkinin xərçəngi başlatması, xəstəliyin gedişinə və müalicə cavabına mənfi təsiri kimi bir çox tərəfdən qarşımıza çıxa bilər. Bu günlərdə dərc edilmiş tədqiqat əlaqəni açıqlamağa daha bir töhfə vermiş, müalicə olunmuş süd vəzi xərçəngi xəstələrinin kökəlməyə meyilli olduğunu və bunun xərçəng, ürək xəstəlikləri, diabet riskini artırdığını göstərmişdir.
Süd vəzi xərçəngi müalicəsindən sonra xəstələrin kökəlməyə daha meyilli olduğu indiyədək bir çox tədqiqatda bildirilmişdir. Əvvəlki tədqiqatlarda bu şəxslərdəki çəki artımı xərçəngə tutulmayanlarla müqayisə edilməmiş, müqayisə edilənlərdə isə ziddiyyətli nəticələr alınmışdır. Həmçinin daxil edilən qadınların ailəvi meyilliliyi kimi amillər nəzərə alınmamışdır. Yazımızın mövzusu olan, iyulda dərc edilmiş tədqiqatda isə süd vəzi xərçəngi müalicəsi alıb normal həyatına davam edən qadınlar heç xərçəngə tutulmamış qadınlarla müqayisə edilmişdir. Həmçinin ailəvi meyillilik, yaş, menopauza vəziyyəti, xolesterin azaldan dərman istifadəsi kimi amillər nəzərə alınmışdır.
Tədqiqatda ailəvi meyilliliyi oxşar olan, uğurlu süd vəzi xərçəngi müalicəsi almış 303 qadın və heç xərçəngə tutulmamış 307 qadının 4 il ərzində çəki dəyişiklikləri izlənilmişdir. Qruplar kimyaterapiya, xolesterin azaldan dərman istifadəsi, şiş xüsusiyyətləri kimi amillər nəzərə alınaraq araşdırıldıqda xərçəngi keçirmiş şəxslərin sağlamlardan daha çox kökəldiyi görülmüşdür. Həmçinin kimyaterapiya alanlarda çəki artımı daha çox olmuşdur. Statin (xolesterin dərmanı) istifadəsi nəzərə alındıqda kimyaterapiyadan sonra statin istifadə edənlərin çəki artımı daha da çoxalmışdır. Şiş xüsusiyyətinə baxdıqda da estrogeni qəbul edən reseptorları olmayan (estrogen reseptoru mənfi) şişə malik qadınlarda çəki artımının daha çox olduğu görülmüşdür.
Nəticə olaraq uğurlu süd vəzi xərçəngi müalicəsindən sonra normal həyatına davam edən qadınlarda heç xərçəng olmayanlarla müqayisədə daha çox çəki artımı görülür. Bu artım xüsusilə kimyaterapiya almış və statin istifadə edənlərdə daha çox olur. Belə çəki artımı ürək xəstəliklərini, diabeti başladır və yenidən xərçəngə tutulma riskini artırır. Bu məqamda süd vəzi xərçəngi müalicəsindən sonra sağ qalan qadınların qidalanmaya və idmana əhəmiyyət verməsi riskləri azaltmaq üçün son dərəcə vacibdir.
Mənbələr
Weight Change in Breast Cancer Survivors Compared to Cancer-Free Women: A Prospective Study in Women at Familial Risk of Breast Cancer.
Cancer Epidemiol Biomarkers Prev. 2015 Aug;24(8):1262-9. doi: 10.1158/1055-9965.EPI-15-0212. Epub 2015 Jul 15.
Bu məqalə sizə faydalı oldu?
Rəyiniz məzmunumuzu yaxşılaşdırmağa kömək edir.





Oxucu şərhləri
Şərhinizi paylaşın
Adınız və şərhiniz yalnız administrator təsdiqindən sonra dərc olunur. E-poçt ünvanınız ziyarətçilərə heç vaxt göstərilmir.
İlk şərhi siz yazın.