ევროპის ონკოლოგიის კონგრეს ESMO 2016-ზე წარმოდგენილი სიახლეები

ევროპის სამედიცინო ონკოლოგიის საზოგადოება (European Society for Medical Oncology = ESMO) მსოფლიოს ორი წამყვანი პროფესიული ონკოლოგიური ორგანიზაციიდან ერთ-ერთია. მას 130 ქვეყნიდან 13 ათასზე მეტი ონკოლოგიის პროფესიონალი წევრი ჰყავს. დაარსებიდან, 1975 წლიდან, მისი მისიაა კიბოს კვლევების და განსხვავებული სპეციალობისა და გამოცდილების პროფესიონალების მხარდაჭერა, განსაკუთრებით ევროპაში, ასევე მთელ მსოფლიოში.

მსოფლიოში სიცოცხლის საშუალო ხანგრძლივობა იზრდება. დიდწილად ამის, ასევე თამბაქოს კონტროლის უუნარობისა და სიმსუქნის მატების გამო კიბოს სიხშირეც იზრდება. ამ წლისთვის ევროპის 12 ქვეყანაში კიბოთი სიკვდილიანობამ გულ-სისხლძარღვთა სიკვდილიანობას გადააჭარბა. ამ შესამჩნევი ზრდისა და სამეცნიერო მიღწევების ფონზე კიბოს მკურნალობის სურვილი ისტორიის ნებისმიერ პერიოდზე ძლიერია.

როგორც სამეცნიერო, ისე საზოგადოებრივი ცნობიერება კიბოს კვლევის მთავარი მამოძრავებელია. პროფესიონალთა საერთაშორისო ყოველწლიური შეხვედრები ამ საზღვრებისა და კლასების არმცნობ დაავადებასთან ბრძოლაში მეცნიერების საზღვრების მოხსნის ერთ-ერთი უმთავრესი ნაბიჯია. კონგრესები ექიმებს შორის ხიდია, სადაც ცოდნა, განათლება, კვლევები და ახალი მკურნალობები ზიარდება.

ევროპის კიბოს კონგრესი (ESMO Congress) ყოველ ოქტომბერში იმართება. წელს კოპენჰაგენში 7-11 ოქტომბერს გამართულმა ESMO 2016-მა მონაწილეთა რეკორდებიც მოხსნა და წარმოდგენილი კვლევებით პრაქტიკაშიც დიდი წვლილი შეიტანა. მსოფლიოს 30 ქვეყნიდან ონკოლოგიით დაინტერესებული 20 ათასზე მეტი ექიმი შეიკრიბა.

მსოფლიოს უმთავრესი ონკოლოგიური ორგანიზაცია ამერიკის კლინიკური ონკოლოგიის საზოგადოება ASCO-ა (American Society of Clinical Oncology). ჩიკაგოში ყოველ ივნისის პირველ კვირაში ჩატარებული ASCO-ს კვლევებს წინა სტატიებში ხშირად განვიხილავდით. ESMO და ASCO ონკოლოგიურ კვლევებში ერთგვარ კონკურენციაშია. წლევანდელი ESMO-ს შეხვედრა ASCO-ს პრეზიდენტმა დოქტორმა დენიელ ჰეიზმა ასე შეაქო: „ეს წარმოუდგენელი შეხვედრა იყო. როგორც ASCO-ს პრეზიდენტს, აქ წარმოდგენილი უზარმაზარი მეცნიერების გამო ნამდვილად არ მშურს. აქ მრავალი კვლევა იყო, რომელიც ონკოლოგიურ პრაქტიკას შეცვლის – 5 დღეში 6 კვლევა NEJM-ში, მსოფლიოს ყველაზე ავტორიტეტულ სამედიცინო ჟურნალში გამოქვეყნდა; ეს უპრეცედენტოა. მთავარი ხაზგასასმელია არა ის, რომ ESMO-მ ან ASCO-მ შესანიშნავად იმუშავა, არამედ ის, რომ პაციენტებისთვის უკეთ ვმუშაობთ და სწორედ ეს ვნახეთ ამ კვირაში…“

ჩვენც ვებგვერდით მოსახლეობას კიბოს მნიშვნელოვან სიახლეებს გასაგებად და ყურადღებით უკვე 4 წელზე მეტია ვუზიარებთ. ამასთან დაკავშირებით მომდევნო დღეებში ESMO-ს მნიშვნელოვან კვლევებს გაგაცნობთ და ხვალ პირველად „ფილტვის კიბოთი“ დავიწყებთ.