ინგლისში მკურნალობის მომლოდინე პაციენტების რაოდენობამ 6 მილიონს გადააჭარბა

ინგლისის ჯანმრთელობის ეროვნული სამსახურის (NHS) ბოლო მონაცემებით, 2022 წლის იანვარში სპეციალისტის მიმართვის შემდეგ მკურნალობის დაწყების მომლოდინეთა რაოდენობამ 6,1 მილიონს მიაღწია და რეკორდული ნიშნული დააფიქსირა. გასული წლის იანვარში 4,59 მილიონიდან წლის ბოლოს 6,07 მილიონამდე გაზრდილი რაოდენობა ამ იანვარში თითქმის 1,5 მილიონით, ანუ ერთი მესამედით გაიზარდა.
NHS-ის სხვა გამოქვეყნებული მონაცემებით, ინგლისში 2022 წლის თებერვალში გადაუდებელი დახმარების განყოფილებაში 16404 ადამიანს 12 საათზე მეტხანს მოუწია ლოდინი. ეს რაოდენობა თითქმის რეკორდულ ნიშნულს გაუტოლდა მას შემდეგ, რაც აღრიცხვა პირველად 2010 წლის აგვისტოში დაიწყო. გადაუდებელ დახმარებაში მისული ყოველი დაახლოებით 30 ადამიანიდან 1-ს 12 საათზე მეტხანს, ხოლო 60,8%-ს 4 საათზე მეტხანს ალოდინებდნენ. ეს მონაცემები NHS-ის ყველაზე ცუდ შედეგს აჩვენებს აღრიცხვის დაწყებიდან.
ძლიერი წნეხის ქვეშ მყოფი ჯანდაცვის სისტემა
ინგლისის სამეფო საექთნო კოლეჯის (RCN) დირექტორი Patricia Marquis ამბობს: „ეს რიცხვები აჩვენებს იმ სირთულეების მასშტაბს, რომლებსაც ექთნები წნეხის ქვეშ არსებული მრავალი სამუშაო დატვირთვის შემცირების მცდელობისას აწყდებიან. როცა 6,1 მილიონი ადამიანი ჯერ კიდევ რუტინულ მკურნალობას ელოდება, ხოლო ათასობით პაციენტი ჰოსპიტალიზაციისთვის 12 საათზე მეტხანს იცდის, ექთნები უსაფრთხო და ეფექტიანი მოვლისთვის იბრძვიან მნიშვნელოვნად გამოფიტული სამუშაო ძალით.“
გადაუდებელი მედიცინის სამეფო კოლეჯის (RCEM) პრეზიდენტმა, დოქტორმა Katherine Henderson-მა თქვა, რომ 2010 წლის აგვისტოდან 2021 წლის სექტემბრამდე 11 წლის განმავლობაში გადაუდებელ განყოფილებაში 12 საათზე მეტხანს მომლოდინეთა რაოდენობა 52181 იყო, ხოლო 2021 წლის ოქტომბრიდან ასეთი მომლოდინე უკვე 63653 ადამიანია.
„ეს მონაცემები შემაძრწუნებელია. მან ყველა ჯანდაცვისა და პოლიტიკურ ლიდერს განგაშის საფუძველი უნდა მისცეს. პასუხისმგებლობა ვეღარ დაეკისრება გამოფიტულ და გადატვირთულ პერსონალს, რომელიც ამ კრიზისის მართვას ცდილობს. სისტემა ურთიერთდაკავშირებულია. სასწრაფო დახმარების ან გადაუდებელი განყოფილების კრიზისი სხვაგან არსებული წნეხის შედეგია და ჯაჭვის სხვა რგოლშიც შეიძლება წნეხი გამოიწვიოს. ეს ყველაფერი პაციენტის უსაფრთხოებისთვის დიდ რისკს ქმნის.“
დოქტორმა Henderson-მა დასძინა: „ბოლო მონაცემებმა ძლიერი წნეხის ქვეშ მყოფი ჯანდაცვის სისტემა გამოავლინა. პაციენტები სერიოზულად ზიანდებიან.“
წნეხს პერსონალის ნაკლებობაც ემატება
NHS-ის აღმასრულებელი ხელმძღვანელის მოადგილე Saffron Cordery: „ჩვეულებრივ ზამთრის სეზონური წნეხის შემდეგ გაზაფხულისთვის შემსუბუქებას ველით, თუმცა ეს რიცხვები აჩვენებს, რომ NHS კვლავ ძლიერი წნეხის ქვეშაა.“
„სასწრაფო დახმარება და გადაუდებელი განყოფილებები კვლავ მნიშვნელოვანი წნეხის ქვეშაა: სასწრაფო დახმარების მანქანის საჭიროების მქონე შემთხვევები 2 წლის წინანდელთან შედარებით 19%-ით გაიზარდა. ღრმა შეშფოთებას იწვევს ის, რომ 6,1 მილიონი ადამიანი მკურნალობის მოლოდინის სიაშია და ფსიქიკური ჯანმრთელობისა და სათემო მომსახურებებშიც მნიშვნელოვანი დაგროვილი მოთხოვნაა.“
„სამუშაო ძალის დეფიციტი კვლავ რეალური შეშფოთების მიზეზია, ისევე როგორც Covid-19-ის მქონე პაციენტების რაოდენობა, რომელიც კვირების განმავლობაში კლების შემდეგ ისევ იზრდება. პერსონალის ნაკლებობა ამ კვირაშიც გაიზარდა, რაც გვაჩვენებს, რატომ გვჭირდება მეტი თანამშრომელი დატვირთვის შესამსუბუქებლად მაშინ, როცა ჩვენი კოლეგები სამსახურში ვერ მოდიან. NHS-ში ამჟამად 110000 თანამშრომლის დეფიციტია და ეს დეფიციტი მკურნალობის ხარისხსა და პაციენტის უსაფრთხოებაზე მნიშვნელოვან წნეხს ქმნის.“
კიბოზე ეჭვის მქონე პირებიც ელოდებიან
ამასთან, NHS-ის მიერ 2022 წლის იანვრისთვის გამოქვეყნებული მონაცემებით, კიბოზე ეჭვის მქონე პირთა სასწრაფო მიმართვისთვის დასახულ არსებულ 2-კვირიან ლოდინის ვადას მნიშვნელოვანი გადაცდომა აქვს. კიბოზე ეჭვით მიმართული პირების მხოლოდ 75% ნახა სპეციალისტმა 2 კვირის განმავლობაში. 2021 წლის დეკემბერში ეს მაჩვენებელი 78,6% იყო, ხოლო Health Services Journal-ის მიხედვით, 2019 წლის თებერვალში — 93%. ამასთან, ძუძუში კვანძის სიმპტომების გამო სასწრაფოდ მიმართული პაციენტების მხოლოდ 49,4% ნახა სპეციალისტმა 2 კვირის განმავლობაში. 2021 წლის დეკემბერში ეს მაჩვენებელი 50,9% იყო.
მიზნობრივი წესი, რომ „ლოდინი 2 კვირას არ უნდა აღემატებოდეს“, ასევე გადაისინჯება კიბოს დიაგნოზის დასმამდე ან მისი არარსებობის დადგენამდე 28-დღიანი სტანდარტის შესაბამისად.
უფრო სწრაფი დიაგნოსტიკის სტანდარტის ფარგლებში NHS-ის ახალი მიზნებია:
- სასწრაფოდ მიმართული, ძუძუს კიბოს ნიშნების მქონე ან კიბოს სკრინინგისთვის მიღებულ პაციენტებს კიბოს დიაგნოზი ან მისი არარსებობა 28 დღის განმავლობაში დაუდგინდებათ.
- კიბოს დიაგნოზის მქონე პაციენტები მიმართვიდან 62 დღის განმავლობაში დაიწყებენ მკურნალობას.
- კიბოს მქონე პაციენტებმა NHS-ის მკურნალობის სტანდარტის მიხედვით პირველი მკურნალობა დიაგნოზიდან ერთი თვის განმავლობაში უნდა მიიღონ.
NHS-ის განცხადებით, ეს გეგმა მეტ ადრეულ დიაგნოზსა და მეტი სიცოცხლის გადარჩენას შეუწყობს ხელს.
მიზნები ვერ სრულდება
ეს ახალი „უფრო სწრაფი დიაგნოსტიკის სტანდარტი“ (ყველა სასწრაფო მიმართვისთვის კიბოზე ეჭვით, ძუძუს კიბოს ნიშნებისას და სასწრაფო სკრინინგისთვის მიმართვის საჭიროებისას) 2021/22 წლის მესამე კვარტლიდან საწყის მიზნად 75% დონეს განსაზღვრავს. თუმცა ბოლო სტატისტიკით ეს მიზანი უკვე ვერ სრულდება. იანვარში ადამიანების მხოლოდ 63,8% ნახა სპეციალისტმა და აცნობა, ჰქონდა თუ არა კიბო, სასწრაფო მიმართვიდან 28 დღის განმავლობაში; 2021 წლის დეკემბერში ეს მაჩვენებელი 70,5% იყო.
NHS-მა ყოველი მიზნისთვის შესაბამის ზღვარს უნდა მიაღწიოს. მაგალითად, პაციენტების სულ მცირე 85%-მა პირველი ონკოლოგიური მკურნალობა კიბოზე ეჭვით სასწრაფო მიმართვიდან 2 თვის (62 დღის) განმავლობაში უნდა დაიწყოს. სამწუხაროდ, ამ მიზნების უმრავლესობა ვერ სრულდება. პაციენტების მხოლოდ 67%-მა მიიღო პირველი მკურნალობა ამ ვადაში. NHS-ის მიზანია, რომ პაციენტების 93% ოჯახის ექიმის მიმართვიდან 2 კვირაში სპეციალისტმა ნახოს, თუმცა ბოლო მონაცემებით დეკემბერში სპეციალისტს პაციენტთა 79% შეხვდა.
მიზანი — 95%
Cancer Research UK-ის წარმომადგენელმა Michelle Mitchell-მა „ახალი, უფრო სწრაფი დიაგნოსტიკის სტანდარტი არსებულ 2-კვირიან ლოდინზე უფრო მნიშვნელოვანი მიზანია და ვიმედოვნებთ, რომ ის ადრეულ დიაგნოსტიკას გააუმჯობესებს. ყველა მიზანი 75%-ს რომ აღწევდეს, ამჟამინდელთან შედარებით უკეთეს მდგომარეობაში ვიქნებოდით.“ თქვა.
„თუმცა კიბოს შემთხვევაში სიცოცხლის გახანგრძლივებისთვის გვსურს მომავალ გრძელვადიან, 10-წლიან ონკოლოგიურ გეგმაში ვიხილოთ 95% მიზანი, რომელიც 2015 წლის კიბოს სტრატეგიაში იყო შეთავაზებული. ვიცით, რომ NHS-ში კიბოს დიაგნოსტიკისთვის კრიტიკულად მნიშვნელოვანი სპეციალისტების ნაკლებობის გამო მიზანი უფრო დაბალ დონეზე განისაზღვრა. მთავრობამ NHS-ის სამუშაო ძალის გასაზრდელად დაპირებული დამატებითი ინვესტიცია უნდა უზრუნველყოს. ყოველი შეფერხება რისკის ქვეშ აყენებს დიაგნოზისა და მკურნალობის მომლოდინე კიდევ მეტ ადამიანს.“
თუმცა ჯანდაცვის მინისტრმა Javid-მა თქვა, რომ სამუშაო ძალის დეფიციტის აღმოსაფხვრელად ახალი დაფინანსება არ იქნება და წელს 10-წლიან ონკოლოგიურ გეგმას მოამზადებს. „ამ ხედვის რეალობად ქცევისა და მაღალი შედეგების შენარჩუნებისთვის დახმარების გასაწევად სამუშაო ძალის გრძელვადიანი გეგმა გვჭირდება.“
Macmillan Cancer Support-ის წარმომადგენელმა Eve Byrne-მა ბოლო გამოქვეყნებულ რიცხვებზე განაცხადა: „ვიცით, რომ დიაგნოსტიკისა და მკურნალობის ნებისმიერი შეფერხება კიბოს მქონე პაციენტებში დიდ შფოთვასა და დისკომფორტს იწვევს, ამიტომ შემაშფოთებელია იმის ნახვა, რომ ეს რიცხვები აქამდე ყველაზე ცუდ შედეგებს ასახავს. NHS პანდემიამდე უკვე ზღვარზე იყო. მას შემდეგ, რაც ვერ უზრუნველყო ონკოლოგიაში NHS-ისთვის საჭირო სამუშაო ძალის გრძელვადიანი დაფინანსება, ჯანდაცვის მინისტრისგან ამ კვირაში იმის მოსმენამ, რომ NHS-ის სამუშაო ძალის გეგმებს ახალი ინვესტიცია არ მოჰყვება, სრული იმედგაცრუება გამოიწვია. კონკრეტული ინვესტიციის გარეშე, რომელიც ონკოლოგიაში პერსონალის რაოდენობას სასწრაფოდ გაზრდის პაციენტებისთვის საჭირო მომსახურებისა და მხარდაჭერის უზრუნველსაყოფად, ნებისმიერი მომავალი 10-წლიანი ონკოლოგიური გეგმის მიზანი წარუმატებელი იქნება.“
წყაროები
2. Pickover E. (09.03.2022). Cancer Overhaul Could See 2-Week Wait To See Specialist Scrapped. Medscape.
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.