ქორწინება კიბოს დროს უპირატესობაა?

Clinical Oncology-ის ჟურნალში გამოქვეყნებული კვლევის შედეგებმა აჩვენა, რომ დაუქორწინებელ პაციენტებში მეტასტაზური კიბოს, ეფექტური მკურნალობის მიუღებლობისა და კიბოსთან დაკავშირებული სიკვდილის რისკი უფრო მაღალია.

ბოსტონში, ჰარვარდის უნივერსიტეტის მიერ ჩატარებულ კვლევაში, 2004-2008 წლებს შორის საყლაპავის, საკვერცხის, თავისა და კისრის, არაჰოჯკინის ლიმფომის, ღვიძლშიდა სანაღვლე გზების, ღვიძლის, პროსტატის, პანკრეასის, ძუძუს, კოლორექტული ან ფილტვის კიბოს მქონე 1.260.898 პაციენტის მონაცემები აღებულ იქნა „შეფასების, ეპიდემიოლოგიისა და შედეგების“ პროგრამიდან და გაანალიზდა.

კვლევის შედეგად, როდესაც გათვალისწინებულ იქნა კიბოს სტადია, მკურნალობის მეთოდები და სტატისტიკური შეფასებები, დადგინდა, რომ დაქორწინებულ პაციენტებს დაუქორწინებელ პაციენტებთან შედარებით ნაკლებად უვითარდებოდათ მეტასტაზური დაავადებები, უფრო ეფექტურ მკურნალობას იღებდნენ და კიბოსთან დაკავშირებული სიკვდილის მაჩვენებელიც ნაკლები ჰქონდათ. თითოეულ ინდივიდში გამოვლენილი კიბოს ანალიზის შედეგებმა აჩვენა იგივე მნიშვნელოვანი კავშირი; კერძოდ, დადგინდა, რომ დაქორწინებულ მამაკაცებზე კიბოს მიმდინარეობა უფრო დადებითად მოქმედებდა, ვიდრე დაქორწინებულ ქალებზე. პროსტატის, ძუძუს, კოლორექტული, საყლაპავისა და თავისა და კისრის კიბოს დროს გამოყენებული მკურნალობა დაქორწინებულ პაციენტებში სიცოცხლის ხანგრძლივობას უფრო მეტად ზრდიდა. გარდა ამისა, დადგინდა, რომ დაუქორწინებელ პაციენტებში მეტასტაზური კიბოს, ეფექტური მკურნალობის მიუღებლობისა და კიბოსთან დაკავშირებული სიკვდილის რისკის მაჩვენებელი უფრო მაღალი იყო.

მიღებულმა მონაცემებმა წინა პლანზე წამოსწია სოციალური მხარდაჭერის აუცილებლობა კიბოს გამოვლენისა და მკურნალობის, ასევე პაციენტის სიცოცხლის ხანგრძლივობის თვალსაზრისით და კიდევ ერთხელ მეცნიერულად წარმოაჩინა, რამდენად მნიშვნელოვანია ადამიანისთვის გაცემული სულიერი მხარდაჭერა.