Evli olmaq xərçəng xəstəliyində üstünlükdürmü?

Clinical Oncology jurnalında dərc olunan tədqiqat nəticələri evli olmayan xəstələrdə metastatik xərçəng, effektiv müalicə ala bilməmə və xərçənglə əlaqəli ölüm riskinin daha yüksək olduğunu göstərmişdir.

Boston, Harvard Universiteti tərəfindən aparılan bir araşdırmada, 2004-2008 illəri arasında qida borusu, yumurtalıq, baş-boyun, qeyri-Hodgkin limfoması, qaraciyərdaxili öd yolu, qaraciyər, prostat, mədəaltı vəzi, süd vəzi, kolorektal və ya ağciyər xərçəngi olmuş 1.260.898 xəstənin məlumatları “Nəzarət, Epidemiologiya və Son Nəticələr” proqramından götürülərək araşdırılmışdır.

Araşdırmanın nəticələri xərçəngin mərhələsi, müalicə üsulları və statistik qiymətləndirmələr nəzərə alındıqda, evli xəstələrin evli olmayan xəstələrlə müqayisədə metastatik xəstəliklərə daha az tutulduqlarını, daha effektiv müalicə aldıqlarını və xərçənglə əlaqəli ölüm hallarının daha az olduğunu göstərmişdir. Hər bir fərddə müəyyən edilən xərçəng üzrə analiz nəticələri eyni mühüm əlaqəni göstərmiş, xüsusilə evli kişilərin evli qadınlarla müqayisədə xərçəng xəstəliyinin gedişindən daha müsbət təsirləndiyi müəyyən edilmişdir. Prostat, süd vəzi, kolorektal, qida borusu və baş-boyun xərçənglərində tətbiq olunan müalicələrin evli xəstələrdə yaşam müddətini daha çox uzatdığı müəyyən edilmişdir. Bundan əlavə, evli olmayan xəstələrdə metastatik xərçəng, effektiv müalicə ala bilməmə və xərçənglə əlaqəli ölüm riskinin daha yüksək olduğu qənaətinə gəlinmişdir.

Əldə edilən məlumatlar xərçəngin aşkarlanması, müalicəsi və xəstənin yaşam müddətində sosial dəstəyin nə qədər zəruri olduğunu ön plana çıxarmış, göstərilən mənəvi dəstəyin insan həyatında nə qədər mühüm olduğu həqiqətini bir daha elmi şəkildə ortaya qoymuşdur.