ნაჩვენებია, რომ ელექტრონული სიგარეტები მსტვინავ სუნთქვასა და ქოშინს იწვევს

ერთ-ერთი ონლაინგამოკითხვის მიხედვით, ელექტრონული სიგარეტის გამოყენება მოზარდებსა და ახალგაზრდებში უფრო ხშირად აღწერილ მსტვინავ სუნთქვასა და ქოშინს დაუკავშირდა.
მოზარდებსა და ახალგაზრდებში ჩატარებულმა ადრინდელმა კვლევებმა ელექტრონული სიგარეტის გამოყენებასა და მსტვინავ სუნთქვას, ქოშინსა და ასთმას შორის კავშირი აჩვენა. აშშ-ის დაავადებათა კონტროლისა და პრევენციის ცენტრებმა (US-CDC) და სხვა სამედიცინო უწყებებმა 2015-2017 წლებში ჩაატარეს ახალგაზრდების სარისკო ქცევის მეთვალყურეობის კვლევა (The Youth Risk Behavior Surveillance, YRBS), რომელმაც ელექტრონული სიგარეტის მომხმარებელი ახალგაზრდების 63,5%-ის მიერ სიგარეტისა და კანაფის გარკვეული კომბინაციების გამოყენებაც გამოავლინა. კომბინირებული გამოყენება თვითაღწერილი ასთმის სიხშირის 55%-დან 65%-მდე მატებას დაუკავშირდა.
ლოს-ანჯელესში სამხრეთ კალიფორნიის უნივერსიტეტის კეკის სამედიცინო სკოლის პრევენციული მედიცინის ასოცირებულმა პროფესორმა ალაინა ტეკეტმა: "ამ კვლევის მიგნებები ხაზს უსვამს, რომ ახალგაზრდებს კვლავ უნდა ვკითხოთ რესპირატორული სიმპტომების, სხვა თამბაქოს ნაწარმის თანაგამოყენებისა და კანაფის შესახებ. ბაზარზე მეტი პროდუქტის, მათ შორის კანაფისა და სხვადასხვა ელექტრონული სიგარეტის მოწყობილობის, გამოსვლასთან ერთად სუნთქვითი ჯანმრთელობის შეფასება მნიშვნელოვანი იქნება როგორც მოზარდებისა და ახალგაზრდებისთვის სამედიცინო მომსახურების მიწოდების ადგილებში, ისე კვლევებში" — თქვა. ტეკეტმა კვლევა ამერიკის თორაკალური საზოგადოების ვირტუალურ საერთაშორისო კონფერენციაზე წარადგინა.
კომენტარისთვის მიწვეულმა დოქტორმა კრისტოფერ პასკოუმ თქვა: "[კვლევა] ძალიან საინტერესო მომეჩვენა, რადგან, როგორც ჩანს, ის ამ ელექტრონული სიგარეტების მიმართ ფიზიოლოგიურ პასუხს აღწერს," — აღნიშნა. "და ისინი ძალიან ახალგაზრდები იყვნენ [14-21 წლის]. ის ფაქტი, რომ მსტვინავი სუნთქვისა და ქოშინის სიმპტომები ასეთ ახალგაზრდებს აქვთ, მიანიშნებს, რომ ამ მოწყობილობების უწყვეტ გამოყენებას მოგვიანებით განვითარებული ქრონიკული პრობლემები შეიძლება მოჰყვეს."
პასკო ფიზიოლოგიისა და პათოფიზიოლოგიის ასოცირებული პროფესორია კანადის ქალაქ ვინიპეგში მდებარე მანიტობის უნივერსიტეტში და მანიტობის ბავშვთა საავადმყოფოს კვლევით ინსტიტუტშიც მუშაობს. საკუთარი კვლევის ფარგლებში, ანთების მარკერების გამოსავლენად, მწეველებისა და ელექტრონული სიგარეტის მომხმარებლების პნევმოთორაქსის ოპერაციებიდან მიღებულ ფილტვის ქსოვილს სწავლობს.
რადგან ზოგი ადამიანი ორივე პროდუქტს — სიგარეტსა და ელექტრონულ სიგარეტს — იყენებს, კვლევას მათი ეფექტების გასარჩევად „კარგი დასაწყისი“ უწოდა. "ეს ასახავს ფაქტს, რომ მათში, ვინც ამ ელექტრონულ სიგარეტებს იყენებს, მაგრამ არც კანაფს მოიხმარს და არც სიგარეტს ეწევა, მსტვინავი სუნთქვისა და ქოშინის მაჩვენებლები მაინც ორჯერაა მომატებული."
მკვლევრებმა 2020 წლის 6 აგვისტოდან 30 აგვისტომდე 14-21 წლის 2931 ადამიანი გამოიკვლიეს; მათი საშუალო ასაკი 18,9 წელი იყო. გამოკითხულთა 80% ქალები და გოგონები იყვნენ, ხოლო 75% — თეთრკანიანები.
გამოკითხვაში ეკითხებოდნენ ბოლო 30 დღეში ელექტრონული სიგარეტის, სიგარეტისა და კანაფის გამოყენების, ასევე იმავე პერიოდში ასთმის დიაგნოზისა და რესპირატორული სიმპტომების შესახებ.
მონაწილეთა ჯამურმა 24%-მა ასთმა, 13%-მა მსტვინავი სუნთქვა და 20%-მა ქოშინი აღწერა.
1414 მონაწილიდან, რომლებიც ბოლო 30 დღეში ელექტრონული სიგარეტის გამოყენებას აღნიშნავდნენ, 15%-მა სიგარეტის მოწევა და 37%-მა კანაფის გამოყენება განაცხადა.
ასაკის, დაბადებისას სქესისა და რასის / ეთნიკური წარმომავლობის გათვალისწინების შემდეგ, ელექტრონული სიგარეტის არასოდეს გამოყენების მომხსენებელ პირებთან შედარებით, ბოლო 30 დღის ელექტრონული სიგარეტის გამოყენება დაკავშირებული იყო თვითაღწერილ ასთმასთან (შანსების თანაფარდობა [OR], 1,4; 95% CI, 1,1 - 1,7), მსტვინავ სუნთქვასთან (OR, 3,1;95% CI, 2,3 - 4,2) და ქოშინთან (OR, 2,9;95% CI, 2,3 - 3,6).
მას შემდეგ, რაც მკვლევრებმა ბოლო 30 დღის სიგარეტისა და კანაფის გამოყენებაც გაითვალისწინეს, ასთმასთან კავშირი სტატისტიკურად მნიშვნელოვანი აღარ იყო (OR, 1,11; 95% CI, 0,87 - 1,41), თუმცა მსტვინავ სუნთქვასთან (OR, 2,3;95% CI, 1,6 - 3,0) და ქოშინთან (OR, 2,1;95% CI, 1,6 - 2,8) კავშირი დარჩა.
ტეკეტმა აღნიშნა, რომ მსტვინავი სუნთქვა და ქოშინი სუნთქვითი ჯანმრთელობის მხოლოდ ორი მაჩვენებელია და მეტი კვლევაა საჭირო. მისი გუნდი შემდგომ კვლევებს ატარებს ობიექტური საზომი საშუალებებით, მაგალითად სახლში სპირომეტრიით, იმ მოზარდებსა და ახალგაზრდებში, რომლებიც მხოლოდ ელექტრონულ სიგარეტს იყენებენ ან არასდროს გამოუყენებიათ.
ტეკეტმა თქვა: "უკეთ უნდა გავიგოთ რთული კავშირები ამ პროდუქტების გამოყენებასა და იმ საკითხს შორის, უკავშირდება თუ არა მრავალი პროდუქტის გამოყენება უარეს სუნთქვით შედეგებს" — აღნიშნა მან.
წყაროები
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.