შეიძლება თუ არა პარკინსონის დაავადება ზოგი კიბოს რისკფაქტორი იყოს?

ამ კვირაში Jama ონკოლოგიაში გამოქვეყნებულ ტაივანურ კვლევაში პარკინსონის დაავადებასა და კიბოს 16 სხვადასხვა ტიპს შორის კავშირი გამოვლინდა.
პარკინსონის დაავადება ცენტრალური ნერვული სისტემის (ტვინისა და ზურგის ტვინის) დეგენერაციული დაავადებაა, რომელსაც განსაკუთრებით მოძრაობის დარღვევა — კანკალი, შენელება და სიარულის გაძნელება — ახასიათებს. ეს ტვინში დოპამინის წარმომქმნელი უჯრედების სიკვდილით ხდება, თუმცა მათი სიკვდილის გამომწვევი სრულად გარკვეული არ არის.
ტაივანელი მეცნიერების ეს კვლევა პარკინსონის მსგავსი ცენტრალური ნერვული სისტემის დაავადებებისა და კიბოს კავშირზე პირველი არ არის, თუმცა ყველაზე მასშტაბურია. რეტროსპექტიულად გააანალიზეს პარკინსონის 62,023 პაციენტისა და ამ დაავადების არმქონე 124,046 პირის სამედიცინო ჩანაწერები.
კვლევამ დაასკვნა, რომ პარკინსონის მქონე პირებს 16 სხვადასხვა კიბოს უფრო მაღალი რისკი აქვთ. ესენია ტვინის, ფილტვის, თირკმლის, პროსტატის, საშვილოსნოს ყელის კიბო, სისხლის კიბოები, როგორიცაა ლიმფომა/ლეიკემია, და კანის კიბოები ავთვისებიანი მელანომის ჩათვლით. პარკინსონის პაციენტებში კიბო ყველაზე ხშირად 50-59 წლის ასაკში გვხვდებოდა. თუმცა ძუძუს, საკვერცხის ან ფარისებრი ჯირკვლის კიბოსთან კავშირი არ გამოვლინდა.
წინა წლებში დასავლეთის კვლევებში პარკინსონსა და კიბოს შორის მკაფიო კავშირი არ გამოვლენილა.
ამ კვლევის გასაოცარი შედეგები დაავადებათა პათოგენეზში რასობრივი თავისებურებებისა და გარემოს ზემოქმედების მნიშვნელობას უსვამს ხაზს.
მკვლევრები ვერ ხსნიან, რატომ არის ზოგი კიბო ტაივანელ პარკინსონის პაციენტებში ხშირი, თუმცა შესაძლო მიზეზად PARK2 გენის მუტაციებს ასახელებენ. ეს მუტაციები როგორც კიბოს, ისე ადრეულ პარკინსონთან არის დაკავშირებული.
დასკვნის სახით, რასობრივი და გარემო თავისებურებები პათოგენეზში გასათვალისწინებელია. პარკინსონის პაციენტებში მომატებული კიბოს რისკის ნამდვილი მიზეზების საპოვნელად მეტი კვლევაა საჭირო.
პათოგენეზი ეწოდება დაავადების წარმოშობისა და განვითარებისას ორგანიზმში მიმდინარე ცვლილებათა ერთობლიობას. ტერმინი დაავადების აღმნიშვნელი „პათო“-სა და განვითარება/წარმოშობის აღმნიშვნელი „გენეზისის“ გაერთიანებაა.
წყაროები
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.