სისუსტე

რა არის სისუსტე?
სისუსტე არის დაღლილობისა და გამოფიტულობის განცდა, რომელიც ენერგიის ნაკლებობით ფუნქციური უნარის შემცირებასა და სევდას უკავშირდება. მას მრავალი განზომილება აქვს. სისუსტეში როლს ასრულებს თქვენი ფიზიკური, ემოციური და ფსიქოლოგიური მდგომარეობა. ამ შეგრძნების აღწერა ხშირად რთულია.
ხშირად ასე ამბობენ:
- „ენერგია არ მაქვს“
- „თავს სუსტად და დაღლილად ვგრძნობ“
- „ერთი სიტყვით, გამოფიტული ვარ“
- „ამის გასაკეთებლად საკუთარი თავის მოტივაციას ვერ ვპოულობ“
სისუსტე ორ ტიპად იყოფა:
ხანმოკლე (მწვავე) და ხანგრძლივი (ქრონიკული) სისუსტე.
მწვავე სისუსტე დასვენებით შეიძლება გაიაროს. ქრონიკული კი დიდხანს გრძელდება, შესაძლოა გაუარესდეს და დასვენებით არ ქრება.
რა ნიშნები ახასიათებს სისუსტეს?
სისუსტის მქონე პირები გრძნობენ დაღლას, აზროვნების გაძნელებასა და თავბრუსხვევას. ზოგჯერ ჰგონიათ, რომ დეპრესიაში არიან ან ზარმაცობენ. როცა ძალაგამოცლილად გრძნობენ თავს, ძილი და დასვენება სურთ. მათი ფიზიკური აქტივობა თითქმის არ არსებობს.
როდის ვითარდება სისუსტე?
კიბოსა და მისი მკურნალობის დაწყებისას ენერგიის წარმოქმნის შემცირება სისუსტეს იწვევს. ქიმიოთერაპიის შემდეგ იგი შეიძლება რამდენიმე დღის განმავლობაში ძლიერი იყოს და უმეტესად მომდევნო სეანსამდე უმჯობესდება. რადიოთერაპიის დროს კი ძლიერი სისუსტე შეიძლება რამდენიმე კვირა გაგრძელდეს.
როგორ გავუმკლავდეთ სისუსტეს?
დაბალანსებულად უნდა იკვებოთ და საკმარისი წყალი დალიოთ. ეს მეტ ენერგიას მოგცემთ და ნაკლები დაღლილობის შეგრძნებაში დაგეხმარებათ.
თუ მადა არ გაქვთ, განსაკუთრებით ქიმიოთერაპიის შემდეგ, საჭიროებისამებრ ენერგიის მომცემი საკვები და სასმელები დაამატეთ.
გვიან ნუ დაწვებით. დღის განმავლობაში ხანმოკლე ჩათვლემა შეიძლება სასარგებლო იყოს. მოკლე გასეირნებებიც წაგადგებათ.
როგორც ზედმეტმა, ისე მცირე ძილმა შეიძლება სისუსტე გამოიწვიოს. იძინეთ ენერგიის აღდგენამდე და გახსოვდეთ, რომ ზედმეტი ძილი სისუსტეს აძლიერებს.
საჭიროებისას დახმარება ითხოვეთ. ბავშვზე ზრუნვისას, მანქანის მართვისას, საოჯახო საქმეებში, საყიდლებსა და კერძების მომზადებაში ოჯახის წევრებსა და მეგობრებს დახმარება სთხოვეთ.
ისწავლეთ პრიორიტეტების დაგეგმვა. განსაზღვრეთ აქტივობები, რომლებიც ყველაზე მეტ ენერგიას გაძლევთ.
- მოერიდეთ მძიმე ვარჯიშებს, რომლებიც ენერგიას დაგახარჯინებთ. შეასრულეთ მსუბუქი ვარჯიშები, რომლებიც თავს უკეთ გაგრძნობინებთ და ფიზიკურ ენერგიას მოგცემთ.
- იმის გაკეთება, რისი გაკეთებაც შეგიძლიათ, თავს უკეთ გაგრძნობინებთ.
- შემოქმედებითი თერაპია (ხატვა, მუსიკა, კერამიკა, ხელსაქმე და სხვ.) და იოგა შეიძლება სასარგებლო იყოს; უნდა სცადოთ.
მიმართეთ ექიმს
თუ სისუსტე თქვენს ყოველდღიურ ცხოვრებაზე მოქმედებს, ექიმს უნდა მიმართოთ. ექიმის ინფორმირების გარეშე არასოდეს გამოიყენოთ თვითნებურად ყურმოკრული რჩევები.
ექიმი საჭირო გამოკვლევებს ჩაატარებს და თქვენი ენერგიის გასაზრდელად აუცილებელ დამატებებსა და/ან ცვლილებებს შეიტანს.
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.