თმის ცვენა — ალოპეცია
ამ სტატიაში
ალოპეცია, ანუ თმის ცვენა, ქიმიოთერაპიის ზოგიერთი წამლის გამოყენებით ვითარდება. იგი დროებითი გვერდითი მოვლენაა და სხვადასხვა ხარისხით ვლინდება — თმის შეთხელებიდან სრულ გამელოტებამდე.
თმის ცვენა შეიძლება წამლის დაწყებიდან 10-დან 21 დღეში დაიწყოს. ქიმიოთერაპიის სახეობის მიხედვით იგი მთლიანობაში ერთ ან ორ თვეში სრულდება. ბეწვი სხეულის სხვა ადგილებიდანაც შეიძლება დაცვივდეს. იშვიათად შეიძლება ჩამოცვივდეს წარბები და წამწამები, წვერი და ულვაში, სახის, ხელების, ფეხების, იღლიებისა თუ საზარდულის თმა. თუმცა ცვენა ხშირად ჯერ თავზე იწყება. ქიმიოთერაპიის გაგრძელებისას თმა შეიძლება კვლავ ამოვიდეს, მაგრამ ეს პროცესი ნელია. ბევრ პაციენტს თმის ცვენა ამწუხრებს და ქიმიოთერაპიის ყველაზე რთულ ნაწილად მიაჩნია. თუმცა მკურნალობის დასრულებიდან 2-3 თვეში თმა კვლავ ამოვა და გაიზრდება. ახალი თმა შესაძლოა ძველს არ ჰგავდეს: სქელი თმა შეიძლება თხელი გახდეს, მუქი — ღია, ხვეული — სწორი. მათთვის, ვისაც ძველი ვარცხნილობა მოსწყინდა, ეს სასიხარულოც შეიძლება იყოს.
როგორ გავუმკლავდეთ ალოპეციას?
უპირველესად ექიმს გაესაუბრეთ და საკითხზე ინფორმაცია მიიღეთ.
ჰკითხეთ, შესაფერისია თუ არა თქვენთვის თავის კანის გაგრილება, რომელიც თმის ცვენას თავიდან აცილებს ან ამცირებს. ამ მეთოდში სპეციალური მოწყობილობა და მასთან დაკავშირებული გამაგრილებელი ქუდი გამოიყენება. ქიმიოთერაპიის მიღებისას თავზე ამ მოწყობილობასთან დაკავშირებულ სპეციალურ ქუდს დაგახურავენ და თავის კანი ქიმიოთერაპიის გავლენისგან დაცული იქნება. წარმატების მაჩვენებელი დაახლოებით %80-ის დონეზეა. თუ გსურთ მეტი ინფორმაცია მოწყობილობა Dignicap-ისა და პროცედურის შესახებ, დააწკაპუნეთ.
თუ პარიკის ტარებას გეგმავთ, თმის დაცვენამდე შეგიძლიათ საკუთარი თმის ფერისა და ფორმის პარიკი შეარჩიოთ და პარიკმახერს სასურველი ფორმა მიაცემინოთ. მხოლოდ დარწმუნდით, რომ პარიკი კომფორტულია და თავის კანს არ აზიანებს.
თმის მოკლედ შეჭრამ ან გადაპარსვამ შეიძლება ცვენაზე კონტროლის განცდა მოგცეთ და შეგუება გაგიადვილოთ. თუ გადაპარსვას აპირებთ, ელექტროსაპარსის გამოყენება არ დაგავიწყდეთ.
არ უნდა გამოიყენოთ ქიმიური ნივთიერებების მაღალი შემცველობის შამპუნები. თმა ნაზი, მოფერების მსგავსი მოძრაობით გაიმშრალეთ და ნუ გაახახუნებთ.
შესაძლოა თავის კანისა და სხეულის კანის დაცვა გსურდეთ. თავი შარფით ან ქუდით დაიფარეთ და მზისგან დამცავი ფაქტორის მქონე პროდუქტებით მზის გავლენისგან დაიცავით. გახსოვდეთ, ამ პერიოდში კანი მგრძნობიარეა. ამიტომ გარე ფაქტორებისგან დაცვის ზომები თქვენთვის სასარგებლოა.
სატინის ბალიში თავისთვის ბამბის ბალიშზე ნაკლებ ხახუნს ქმნის. ეს თავს უფრო კომფორტულად გაგრძნობინებთ.
გახსოვდეთ, თმის ცვენა ქიმიოთერაპიის დროებითი გვერდითი მოვლენაა.
თმის ცვენამ შეიძლება საკუთარი თავის მიმართ გრძნობები შეცვალოს. თუ ეს გრძნობები მნიშვნელოვან საქმეებში ხელს გიშლით, სევდას, ბრაზს ან შფოთვას განიცდით, უნდა გაესაუბროთ ახლო მეგობარს ან ნათესავს, რომელსაც ქიმიოთერაპიისას თმა დასცვივდა, ან თქვენს მკურნალ ექიმს. გრძნობების გაზიარება შვებას მოგგვრით.
ქიმიოთერაპიის რომელი პრეპარატები იწვევს თმის ცვენას?
თმის ცვენის მაღალი ალბათობის მქონე პრეპარატები:
- ციკლოფოსფამიდი
- ეპირუბიცინი
- პაკლიტაქსელი
- დაუნორუბიცინი
- ეტოპოზიდი
- დოქსორუბიცინი
- იფოსფამიდი
თმის ცვენის საშუალო ალბათობის მქონე პრეპარატები:
- აქტინომიცინი-D
- იდარუბიცინი
- მიტოქსანტრონი
- ვინკრისტინი
- ცისპლატინი
- მეთოტრექსატი
- აზოტოვანი იპრიტი
- ვენორელბინი
- 5-ფტორურაცილი
- მიტომიცინი
- ვინბლასტინი
თმის ცვენის დაბალი ალბათობის მქონე პრეპარატები:
- ბლეომიცინი
- კარმუსტინი
- დაკარბაზინი
- მელფალანი
- 6-თიოგუანინი
- ბუსულფანი
- ქლორამბუცილი
- L-ასპარაგინაზი
- 6-მერკაპტოპურინი
- თიოტეპა
- კარბოპლატინი
- ციტარაბინი
- ლომუსტინი
- პროკარბაზინი
მიმართეთ ექიმს
თუ რაიმე მდგომარეობა თქვენს ყოველდღიურ ცხოვრებაზე მოქმედებს, ექიმს უნდა მიმართოთ. ექიმის ინფორმირების გარეშე არასოდეს გამოიყენოთ თვითნებურად ყურმოკრული რჩევები. ექიმი საჭირო გამოკვლევებს ჩაატარებს და აუცილებელ დამატებებსა და/ან ცვლილებებს შეიტანს.
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.