6 მშვენიერი, ჯანსაღი, სახალისო და შემოქმედებითი ჰობი

ჩვენი ჰობი სასიამოვნოდ გვატარებინებს დროს და გვართობს. იცოდით, რომ ზოგიერთ ჰობის როგორც ფსიქიკური, ისე ფიზიკური ჯანმრთელობისთვის სასარგებლო ეფექტი აქვს? დადასტურებულია, რომ წერის, ცეკვისა და ხატვის მსგავსი სახალისო ჰობი ჯანმრთელობას არგებს. ჰობი დროის ნაყოფიერად გამოყენებაში გვეხმარება და შემოქმედების კარიც კი შეიძლება გახდეს. ერთად გადავხედოთ 6 ჰობის, რომელიც ჯანმრთელობას, გართობასა და შემოქმედებითობას აერთიანებს.

მებაღეობა — მიწასთან სიახლოვის სიმშვიდე
ბაღში მუშაობა, მცენარეების, ბოსტნეულის, ხილისა და ყვავილების მოყვანა და რეგულარული მოვლა ფიზიკურ ძალისხმევას მოითხოვს. თოხნა, მორწყვა, გასხვლა და სარეველების მოცილება კუნთებსა და ძვლებს აძლიერებს და მოქნილობას ინარჩუნებს. ბაღში მუშაობის ტვინისთვის უდიდესი სარგებელი დემენციის რისკის შემცირებაცაა. მსგავსი სარგებელი ბუნებასთან ახლოს, ღია ცის ქვეშ სხვა საქმიანობის დროსაც შეინიშნება. ამგვარი აქტივობები მზისგან D ვიტამინის მიღებასაც უზრუნველყოფს, რაც განსაკუთრებით მნიშვნელოვანია ხანდაზმულებისთვის. ამასთან, აუცილებელია მზისგან დამცავი ზომების მიღებაც.

წერა — ენა, რომელიც უკეთ შეგრძნებაში გეხმარებათ
მნიშვნელობა არ აქვს, კალმით ქაღალდზე წერთ თუ პირად კომპიუტერში — მთავარია წეროთ. წერა როგორც ფიზიკურ, ისე ფსიქიკურ ჯანმრთელობასთანაა დაკავშირებული. მას მეხსიერების გაუმჯობესების, სტრესის შემცირების, ძილის ხელშეწყობისა და მრავალი სხვა სარგებელი აქვს. რამდენიმე კვლევაში, მაგალითად კიბოს პაციენტებთან ჩატარებულ კვლევაში, აღნიშნულია სტრესის მნიშვნელოვანი შემცირება და ფიზიკური გაუმჯობესება.
შეიძლება ითქვას, რომ რეგულარულად, საშუალოდ კვირაში 3 დღე, თითო 20 წუთის წერა ფიზიკურად და ფსიქიკურად უკეთ გაგრძნობინებთ თავს და ცხოვრების ხარისხს ხელს უწყობს. მთავარი ხრიკია წერისას ემოციების გამოხატვა და გონებაში გამავალი აზრების გადმოცემა.

ცეკვა — ვარჯიშის სახალისო ფორმა
ცეკვას ჯანმრთელობისთვის ძალიან მნიშვნელოვანი სარგებელი აქვს, ეს ყველასთვის შესაძლებელი ჰობია და თითქმის ხარჯსაც არ მოითხოვს. მაგალითად, ცეკვისთვის დიდი აღჭურვილობა ან ტექნიკური მხარდაჭერა არ გჭირდებათ. შეგიძლიათ სპეციალური ტექნიკა ან ცეკვის კონკრეტული სახეობა ისწავლოთ, ან თავისუფლად იცეკვოთ, როგორც გსურთ. მუსიკის თანხლებით სურვილისამებრ მოძრაობით აქტიურ ცხოვრებას იძენთ, რაც ჯანსაღი ცხოვრების მნიშვნელოვანი ნაწილია. ის კარდიოვარჯიშს ცვლის, გულს, ძვლებსა და კუნთებს აძლიერებს. სულ 9.917 ადამიანთან ჩატარებული 94 სხვადასხვა კვლევის მიხედვით, კვირაში სულ მცირე 3-ჯერ მოცეკვავე ხანდაზმულებში წონასწორობა გაუმჯობესდა და დაზიანებები შემცირდა. რადგან ხანდაზმულებში დაცემით გამოწვეული მძიმე ჯანმრთელობის პრობლემები ძალიან ხშირია, ეს მეტად მნიშვნელოვანია.
სოციალურ აქტივობად არჩევისას ცეკვა ურთიერთობებისთვისაც კარგი საშუალებაა. ის ტვინის ჯანმრთელობისთვის ძალიან სასარგებლოა. ერთ კვლევაში რეგულარულმა ცეკვამ დემენციის რისკი %76-მდე შეამცირა.

მუსიკა — ერთგვარი წამალი გვერდითი მოვლენების გარეშე
ინსტრუმენტზე დაკვრისა თუ მუსიკის მოსმენის ფიზიკური და ფსიქიკური სარგებელიც იმდენად მნიშვნელოვანია, რომ უგულებელყოფა არ შეიძლება. სხვადასხვა კვლევით გამოვლინდა, რომ მუსიკა ტვინის ფუნქციებს აუმჯობესებს, იმუნურ სისტემას ეხმარება, სტრესსა და შფოთვას ამცირებს და დეპრესიის გაუმჯობესებას უწყობს ხელს. მუსიკოთერაპია ინგლისისა და ამერიკის საავადმყოფოებსა და კლინიკებში წარმატებით გამოიყენება. თქვენც შეგიძლიათ სასურველი ინსტრუმენტი ისწავლოთ, დაუკრათ, მუსიკას მოუსმინოთ, გუნდში ჩაერთოთ ან თავად იმღეროთ. ეს სასიამოვნოდ გატარებული დრო ჯანმრთელობისთვისაც სასარგებლოა.
სახვითი ხელოვნება — ხელოვნების სამკურნალო ძალა
ვიზუალური ხელოვნების შემადგენელი ხატვა, ქანდაკება, კერამიკა, ფოტოგრაფია და კოლაჟი ფიზიკურ და ფსიქიკურ ჯანმრთელობას ეხმარება. თავისუფალი ხატვა, ფერებით თვითგამოხატვა, ბუნებაში ფოტოების გადაღება, საყვარელი დეტალებისგან კოლაჟის შექმნა, გამოფენაზე სიარული და კერამიკული თიხით 3 განზომილებაში მუშაობა ყოველდღიურ ცხოვრებაში ვიზუალური ხელოვნების გამოყენების მაგალითებია. ეს ყველაფერი და სხვადასხვა ტექნიკა განვითარებულ დასავლურ ქვეყნებში დამატებით სამკურნალო მეთოდებად გამოიყენება. ათასობით ადამიანთან ჩატარებული კვლევებით, სახვითი ხელოვნებით დაკავება ამცირებს სტრესის ჰორმონებს, ზრდის ბედნიერების ჰორმონებს, უზრუნველყოფს ფიზიკურ მოძრაობას, ამსუბუქებს შფოთვასა და დეპრესიას და მკურნალობისას და მის შემდეგ ცხოვრების ხარისხს ხელს უწყობს.

შინაური ცხოველები — ჩვენს გულს არგებენ
შინაური ცხოველის ყოლა, ზოგჯერ რთული პასუხისმგებლობების მიუხედავად, უფრო ჯანმრთელი სხეულითა და გონებით გვიბრუნდება. ისინი უფრო აქტიურ ცხოვრებას გვაიძულებენ. მაგალითად, ძაღლის პატრონები დღეში სულ მცირე 1-ჯერ სასეირნოდ გადიან და გაწვრთნითა და თამაშით ყოველდღიური ვარჯიშის საჭიროებასაც ასრულებენ. სოციალიზაციის ხელშემწყობი ცხოველთა პატრონების ურთიერთობა და ცხოველთა სიყვარული სასარგებლოა შემდეგი მდგომარეობებისთვის;
- ჰიპერტენზია,
- მაღალი ქოლესტერინი,
- მარტოობის განცდა.
ასევე არსებობს კვლევები, რომლებიც შინაური ცხოველების პატრონებში გულის შეტევის რისკის შემცირებას აჩვენებს. მოკლედ, მათთან დროის გატარება მხოლოდ სახალისო ჰობი კი არა, ჯანმრთელობისთვისაც სასარგებლოა.
წყაროები
Anatomically distinct dopamine release during anticipation and experience of peak emotion to music.
Nature Neuroscience, 2011.
2. Koschwanez HE, Kerse N, Darragh M, Jarrett P, Booth RJ, Broadbent E.
Expressive writing and wound healing in older adults: a randomized controlled trial.
Psychosom Med. 2013.
3. Elin Ekblom-Bak, Björn Ekblom, Max Vikström, Ulf de Faire, Mai-Lis Hellénius.
The importance of non-exercise physical activity for cardiovascular health and longevity,
British Journal of Sports Medicine, 2013.
4. De Rui M, Toffanello ED, Veronese N ve ark.
Vitamin D deficiency and leisure time activities in the elderly: are all pastimes the same?
PLoS One. 2014.
5. Joe Verghese, Richard B. Lipton, Mindy J. Katz ve ark.
Leisure Activities and the Risk of Dementia in the Elderly.
N Engl J Med 2003.
6. Power of the Pet: Pets Enrich Our Lives. CDC website
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.