ალბინუსი და ადამიანის სხეულის ტაბულები 1747 — მანამდე შექმნილი ულამაზესი ანატომიური გამოსახულებები

ისტორიკოსი ენდრიუ კანინგემი წერდა: "ბერნჰარდ ზიგფრიდ ალბინუსის მიზანი იყო აქამდე ნანახთაგან ულამაზესი ანატომიური ტაბულების შექმნა, ხოლო მისმა აკვიატებულმა პერფექციონიზმმა და გამოსახვის სიზუსტისადმი ძლიერმა ინტერესმა მრავალი პრობლემა და შეფერხება გამოიწვია. მას ადამიანის „იდეალური“ სხეულის გამოსახვა სურდა. ანატომიური ილუსტრაციის ვერცერთ პროექტში ვერ დაიხარჯებოდა მეტი დრო, ფიქრი, შრომა, ხელოვნება და ფული."

ალბინუსი გენიოსი იყო. სამედიცინო განათლების მიღება 12 წლის ასაკში ნიდერლანდების ლეიდენის უნივერსიტეტში დაიწყო და 1719 წელს გამოცდების ჩაბარების გარეშე სამედიცინო დიპლომი მიიღო. 24 წლის ასაკში ანატომიის პროფესორობა მიანიჭეს და მალე ევროპის ერთ-ერთი ყველაზე ნიჭიერი ანატომიის მასწავლებლის სახელი მოიხვეჭა. ყველაზე მეტად ცნობილია თავისი მონუმენტური ილუსტრირებული ნაშრომით, რომელიც 1747 წელს ლეიდენში გამოიცა — Tabulae sceleti et musculorum corporis humani (ადამიანის სხეულის ტაბულები და კუნთები). ტაბულების შექმნისას ალბინუსი მუდმივად თანამშრომლობდა მხატვარ იან ვანდელაართან. ალბინუსის თქმით, ვანდელაარი "თითქოს ჩემს ხელში იარაღი ყოფილიყო, მითითებებს იღებდა, იმართებოდა და სრულად ჩემ მიერ კონტროლდებოდა, მე კი ფიგურებს თავად ვქმნიდი." ტაბულების თითოეულ გრავიურას მოპირდაპირე მხარეს ჰქონდა გვერდი, რომელზეც ყველა საინტერესო ანატომიური ნიშანი მონიშნული იყო.

ტაბულების სიზუსტის უზრუნველსაყოფად ალბინუსი და ვანდელაარი ნიმუშების წინ ბადეებს ათავსებდნენ. ბადეები ხატვის წარმმართველ უჯრედოვან სქემას ქმნიდა. ალბინუსი ასევე ჩონჩხებს თოკებით ცოცხალთან მიახლოებულ პოზებში ამაგრებდა და ვიზუალური შედარებისთვის იმავე პოზაში შიშველ კაცს აყენებდა. ნამუშევრების „სამგანზომილებიანი რეალობის“ გასაძლიერებლად ვანდელაარი სხვადასხვა პეიზაჟურ ფონს ამატებდა.

ისტორიკოსი ჩარლზ ზინგერი წერს, რომ „სურათები, რომლებსაც დახვეწილად დამუშავებული დეკორატიული ფონი აქვს, როგორც მხატვრებისთვის, ისე ექიმებისთვის იყო გამიზნული და ამ სახის უკეთესი ნამუშევარი მანამდე არ შექმნილა“. ისტორიკოსი ლონდა შიბინგერი წერს: "ალბინუსმა ადამიანის ჩონჩხის ზუსტი ნიმუშები შექმნა, რომლებიც საუკუნის სულ მცირე სამი მეოთხედის განმავლობაში შეუდარებელი დარჩა" — ასე აღნიშნავს იგი.

სტატიის სურათის აღწერა: ალბინუსის ჩონჩხის ფიგურა, გამოსახული მარტორქის წინ, რომელიც ვანდელაარმა ევროპაში პირველი ცოცხალი მარტორქის მიხედვით დახატა; ეს მარტორქა 1741 წელს ამსტერდამის ზოოპარკში ჩამოიყვანეს.

სტატიაში ნახსენები ისტორიული პირები: Jan Wandelaar (1690–1759), Bernhard Siegfried Albinus (1697– 1770)

• წინა თემა: ჩესელდენი და მისი ოსტეოგრაფია 1733 — სტილთან შერწყმული ანატომია
• შემდეგი თემა: ტრაქტატი სურავანდზე 1753 — მეცნიერების მიერ გადარჩენილი პირველი მილიონები