ქალებიც იმუნოთერაპიისგან მამაკაცების მსგავს სარგებელს იღებენ

JAMA Oncology ჟურნალში გამოქვეყნებულ სისტემურ მიმოხილვასა და მეტაანალიზში Wallis-მა და კოლეგებმა შორსწასული სიმსივნეებისთვის იმუნური საკონტროლო წერტილების ინჰიბიტორით მკურნალობის მიმღებ მამაკაცებსა და ქალებს შორის საერთო გადარჩენის სარგებელში განსხვავება ვერ იპოვეს. ადრინდელი კვლევა ვარაუდობდა, რომ მამაკაცები იმუნოთერაპიისგან უფრო დიდ სარგებელს იღებდნენ, თუმცა წინა ანალიზებში გარკვეული მეთოდოლოგიური პრობლემების გამოვლენის შემდეგ ეს უფრო ფართო კვლევა ჩატარდა.
ეს მეტაანალიზი, 2018 წლის ბოლოს ჩათვლით, შორსწასული სოლიდური (ორგანოთა) კიბოს მქონე პაციენტებში იმუნოთერაპიის გამოყენების შემფასებელ 23 რანდომიზებულ კლინიკურ კვლევას მოიცავს. ყველა კვლევაში არსებობდა პაციენტის სქესის მიხედვით დაჯგუფებული საერთო გადარჩენის მონაცემები. იმუნოთერაპიის სქემების ერთმანეთთან შემდარებელი კვლევები ანალიზში არ ჩართულა.
- რა არის მეტაანალიზი? მეტაანალიზი ყველაზე ფართო კვლევაა, რომელიც კონკრეტულ საკითხზე ჩატარებული რამდენიმე დამოუკიდებელი კვლევის შედეგებს აერთიანებს და მიღებულ მიგნებებს სტატისტიკურად აანალიზებს. მეტაანალიზის შედეგები სამეცნიერო თვალსაზრისით ყველაზე ძლიერ მტკიცებულებებს წარმოადგენს.
იმუნოთერაპიის მიერ გადარჩენაში შეტანილი წვლილის შედარება
მეტაანალიზის 23 კვლევა მოიცავდა 9322 მამაკაცს (% 67,9) და 4399 ქალს (% 32,1); პაციენტების უმეტესობა 70-იან წლებში იყო. სტანდარტულ მკურნალობასთან შედარებით იმუნოთერაპიამ მამაკაცებში სიკვდილის რისკი %25-ით, ქალებში კი %23-ით შეამცირა; ეს მაჩვენებლები ერთმანეთისგან სტატისტიკურად არ განსხვავდებოდა.
ქვეჯგუფების ანალიზშიც ქალებსა და მამაკაცებს შორის მნიშვნელოვანი განსხვავება არ გამოვლინდა ისეთი ცვლადებისთვის, როგორიცაა კიბოს წარმოშობის ორგანო, მკურნალობის ხაზი, იმუნოთერაპიის კლასი, კვლევის მეთოდოლოგია და ჯგუფში ქალების წილი.
შედეგად, ანალიზებმა აჩვენა, რომ შორსწასული კიბოს მკურნალობაში იმუნოთერაპიის ეფექტიანობასა და პაციენტის სქესს შორის სტატისტიკურად მნიშვნელოვანი კავშირი არ არსებობს; ანუ ქალებიც იმუნური საკონტროლო წერტილების ინჰიბიტორების კლასის იმუნოთერაპიისგან მამაკაცების მსგავს სარგებელს იღებენ.
წყაროები
Association of Patient Sex With Efficacy of Immune Checkpoint Inhibitors and Overall Survival in Advanced Cancers
A Systematic Review and Meta-analysis.
JAMA Oncology, 3 January 2019.
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.