პალიატიური მოვლის ექთნის TikTok ვიდეომ სიკვდილზე მილიონი მოწონება მიიღო

პალიატიური მოვლის ექთანი ჯული მაკფადენი საზოგადოების ინფორმირებისთვის გადაღებული TikTok ვიდეოებით მილიონობით ადამიანს მისწვდა. Medscape Medical News გამოცემასთან ინტერვიუში ჯულიმ თქვა, რომ ცდილობს ბუნებრივი სიკვდილის პროცესის ნორმალიზებას, საზოგადოების მიერ მის მიღებასა და მწუხარების შემცირებას და ამ პროცესის შესახებ კითხვებზე პასუხის გაცემას. 

ჯულიმ, რომელიც მანამდე 14 წელი ინტენსიური თერაპიის ექთნად მუშაობდა, გადაწყვიტა TikTok თავისი გამოცდილების საზოგადოებისთვის გასაზიარებლად გამოეყენებინა. ბოლო 5 წელი ლოს-ანჯელესში პალიატიური მოვლის/ჰოსპისის (სიცოცხლის ბოლო ეტაპის მოვლის დაწესებულების) ექთანი იყო და გოგო ძმისშვილებით თუ დისშვილებით შთაგონებულმა ვიდეოების გადაღება 6 თვის წინ დაიწყო. შემთხვევითი ვიდეოების გამოქვეყნებიდან 4 დღეში ნახვების რაოდენობამ ძალიან გააოცა. მას შემდეგ ექთანმა ჯულიმ თითქმის 300 პოსტით მილიონობით მიმდევარს მიაღწია. მის მხიარულ ვიდეოებში არის სასაცილო, საშიში, იმედის მომცემი და უჩვეულო შემთხვევები, ექთნის ყოველდღიური ცხოვრება, მომაკვდავი პაციენტების ბოლო წუთები და სიკვდილის პირიდან დაბრუნებული პაციენტები.

ყველაზე მეტი ყურადღება მიიპყრო ვიდეოებმა 2 ხშირად შემხვედრ მდგომარეობაზე. პირველი ეწოდება „rally“, თურქულად — „სიკვდილისწინა კეთილდღეობის მდგომარეობა“. ჯული პოპულარულ ვიდეოში "ზოგი ჩვენი ძალიან ავადმყოფი, მომაკვდავი პაციენტი უცებ თითქოს უკეთ ხდება, იწყებს ჭამას, საუბარს და სიარულსაც კი. თითქოს ძველ მდგომარეობას უბრუნდება და სისხლის მაჩვენებლებიც ნორმალურია. თუმცა რამდენიმე დღეში ან იმავე ღამით კვდება. რატომ და როგორ ხდება ეს, არ ვიცით და ვერ ვხსნით", — ამბობს.

მეორე მოვლენა პაციენტის სიკვდილამდე ერთი თვით ადრე ხდება. ჯულის თქმით, პაციენტები ამბობენ, რომ გარდაცვლილ ნათესავებს, მეგობრებს, შინაურ ცხოველებსა და ანგელოზებს ხედავენ და მათი დანახვა მხოლოდ მათ შეუძლიათ. ნანახის ჩვეულებრივ არ ეშინიათ; პირიქით, ეს მათ უფრო ამშვიდებს. ამბობენ, რომ შეტყობინებებს იღებენ და ესმით, რომ ყველაფერი კარგად იქნება და დასახმარებლად მოვლენ.

პანდემიისას ექთნად მუშაობამ მას ახალი გამოცდილება შესძინა და პალიატიურ მოვლაში მუშაობა ინტენსიურ თერაპიაზე მეტად აბედნიერებს. თუმცა ამდენ სიკვდილთან შეხვედრის მიუხედავად როგორ რჩება ასე პოზიტიური?

"ინტენსიურ თერაპიაში გამოცდილებამ სიკვდილისადმი ჩემი დამოკიდებულება შეცვალა. ეს ყველას შეიძლება შეგვემთხვეს და ჩემთვის იდუმალია. ახლა მომაკვდავ ადამიანებს ბოლო დღეებით ტკბობაში ვეხმარები და ეს მაბედნიერებს."

ჯული ამბობს, რომ პალიატიურ მოვლაში პაციენტის მდგომარეობის ახლობლებისთვის სწორად ახსნა ისწავლა. თავის საქმეს წმინდად მიიჩნევს და ფიქრობს, რომ ადამიანებს შორის ხიდია. "ჩვენი სხეული დაბადებისა და სიკვდილისთვისაა შექმნილი. როდესაც ამას ვიღებთ, სიკვდილთან გამკლავება უფრო მარტივია."

*

- დაკავშირებული თემა: კიბოს დროს სიკვდილის პროცესზე საუბარი — დრო ხომ არ დადგა?