საკვერცხის კიბოს პაციენტთა სიცოცხლე მოსალოდნელზე მეტად ხანგრძლივდება

საკვერცხის კიბო ქალებში ერთ-ერთი ყველაზე გავრცელებული კიბოს ტიპია. შორს წასული სტადიისა და განსაკუთრებით აგრესიული მახასიათებლების მქონე სიმსივნის დროს მკურნალობის წარმატება შესაძლოა შეზღუდული იყოს. აღმოჩნდა, რომ ამ ჯგუფის პაციენტებიც, რომელთათვისაც დაავადების არახელსაყრელ მიმდინარეობას ვარაუდობდნენ, ჯანმრთელად 5 წელზე მეტხანს ცხოვრობდნენ.

კვლევაში მკურნალობის შემდეგ რეციდივის გარეშე 5 წელზე მეტად მცხოვრებლები შეისწავლეს და შთამბეჭდავი შედეგები Obstetrics and Gynecology-ში გამოქვეყნდა.

კვლევაში ამერიკაში 1994-2001 წლებში საკვერცხის კიბოს დიაგნოზით ნამკურნალებ 11 ათასზე მეტ პაციენტს 2011 წლამდე აკვირდებოდნენ. შორს წასული საკვერცხის კიბოს დიაგნოზის შემდეგ ნამკურნალები და გამოჯანმრთელებული პაციენტები დაყვეს და შეადარეს სიცოცხლის ხანგრძლივობით: 2 წელზე ნაკლები, 2 - 5 წელი, 5 - 10 წელი და 10 წელზე მეტი. კვლევის შედეგად დადგინდა, რომ სულ 11.541 პაციენტიდან 3.582-მა (% 31) 10 წელზე მეტხანს იცოცხლა. მათგან 954 საკვერცხის კიბოს დიაგნოზის დროს კიბოთი სიკვდილის მაღალი რისკის მქონე იყო: ხანდაზმული ასაკი, სიმსივნის მაღალი ხარისხი, მეტასტაზური სტადია. მიუხედავად ამისა, ამ პაციენტებმა პროგნოზის საწინააღმდეგოდ 10 წელზე მეტხანს იცოცხლეს.

გამოიკვლიეს, რატომ იყო ასეთი აგრესიული კიბოს ტიპის დროს სიცოცხლის ხანგრძლივობა მოსალოდნელზე მეტი, და ეს მდგომარეობა BRCA 1 და BRCA 2 მუტაციის (ძუძუ-საკვერცხის კიბოს გენის) გამოვლენის მქონე პაციენტების ქიმიოთერაპიაზე შესაძლო უკეთეს პასუხს დაუკავშირეს. ამასთან, შორს წასული საკვერცხის კიბოს დროს ბიოლოგიური განსხვავებები მნიშვნელოვანი ფაქტორია. დაასკვნეს, რომ ამ განსხვავებების შეფასებით ინდივიდუალური მკურნალობის გამოყენებამ მიღებული შედეგები დადებითად შეცვალა, რამაც პაციენტების სიცოცხლის ხანგრძლივობასაც შეუწყო ხელი.

- დაკავშირებული თემა: არის საკვერცხის კიბო მემკვიდრეობითი? რა გენეტიკური რისკფაქტორები არსებობს?

ახალი ქიმიოთერაპიებით, მიზნობრივი საშუალებებითა და ჯერ აქტიურად გამოუყენებელი, მომავლის გამნათებელი იმუნოთერაპიით წარმატება კიდევ უფრო შორს მიდის.

მეგობრებო, ცოდნა და მკურნალობა იცვლება და იმედი ყოველდღე მრავლდება!