შეიძლება თუ არა ორსულობის მოწამვლის, პრეეკლამფსიის რისკის ასპირინით შემცირება?

ხალხში ორსულობის / ფეხმძიმობის მოწამვლად ცნობილი პრეეკლამფსია, მნიშვნელოვანი დაავადებაა, რომელიც, როგორც ცნობილია, დედისა და ახალშობილის სიკვდილსა და ჯანმრთელობის მრავალ სხვა პრობლემას იწვევს. დიდი ხანია იკვლევდნენ, ამცირებდა თუ არა ორსულობის განმავლობაში დაბალი დოზის ასპირინის გამოყენება პრეეკლამფსიის რისკს.

რა არის პრეეკლამფსია?

იგი ვითარდება საშვილოსნოს მკვებავი არტერიების შევიწროების შედეგად, რის გამოც პლაცენტა და დედის მუცელში მყოფი ბავშვი საკმარის კვებას ვერ იღებენ. გვხვდება ყველა ორსულობის დაახლოებით %6-ში და ჩვეულებრივ ორსულობის 20. კვირის შემდეგ ორსულ ქალში ვლინდება მაღალი წნევით, შეშუპებით (ხელების, ფეხებისა და სახის შეშუპება) და შარდში ცილის გამოყოფით.

პრეეკლამფსია ნაადრევი / პრეტერმინული მშობიარობის მნიშვნელოვანი მიზეზია და ორსულობის ადრეულ პერიოდში გამოვლენისას უფრო მძიმედ მიმდინარეობს. თანამედროვე მეანობა-გინეკოლოგიაში კვლევების მნიშვნელოვანი ნაწილი ორსულობის ადრეულ პერიოდში პრეეკლამფსიის გამოვლენას ეხება.

კვლევა

28 ივნისს 2017 წელს NEJM-ში გამოქვეყნებულ ამ მრავალცენტრულ, ორმაგად ბრმა, პლაცებოთი კონტროლირებულ კლინიკურ კვლევაში პრეეკლამფსიის განვითარების მაღალი რისკის მქონე 1776 ორსული ქალი ჩაერთო. მონაწილეთა ნახევარს ორსულობის 11-14. კვირებიდან დაწყებული 36. კვირამდე ყოველდღიურად 150 mg ასპირინს აძლევდნენ, დანარჩენებს კი პლაცებოს (აქტიური ნივთიერების არმქონე წამალს). კვლევის მთავარ მიზნად განისაზღვრა ორსულობის 37. კვირამდე პრეეკლამფსიით მშობიარობის სიხშირეების შედარება.

შედეგები

კვლევის შედეგად დადგინდა, რომ პრეეკლამფსია ასპირინის მიმღებთა %1.6-ში, პლაცებოს მიმღებთა კი %4.3-ში განვითარდა და ეს განსხვავება სტატისტიკურად მნიშვნელოვანი იყო. შედეგად, პრეეკლამფსიის განვითარების მაღალი რისკის მქონე ქალებში დაბალი დოზის ასპირინის გამოყენება პლაცებოსთან შედარებით უფრო ეფექტურად ამცირებს პრეეკლამფსიის განვითარების ალბათობას.