Beyin xərçəngi olan xəstələrdə şişin qan-beyin baryerini necə aktivləşdirdiyi aşkarlandı

Siçanlar üzərində aparılan yeni bir araşdırma göstərdi ki, insanlarda beyin xərçənginin ən geniş yayılmış və ən aqressiv forması olan qlioblastomanın çox sürətlə yayılmasının altında xərçəng hüceyrələrinin qan damarlarına təsir edərək qan-beyin baryerini oyatması dayanır.
Tədqiqatçıların bildirdiyinə görə, beyin şişi hüceyrələrinin əksəriyyəti qan damarları ilə əlaqə içindədir və bu hüceyrələr damarlardan beynin ən uzaq künclərinə səyahət etmək üçün istifadə edir.
Qlioblastoma böyüklərdə ən çox araşdırılan və ən geniş yayılmış beyin xərçəngi növüdür. Qlioblastomanın hazırkı standart müalicəsi kimyaterapiya, şüa terapiyası və cərrahiyyədir; lakin hazırda hər üç müalicə variantından istifadə edən xəstələr üçün xəstəliyin gedişi çox vaxt üzücü olur.
Qan-beyin baryeri beynin ətrafında “ağıllı” qalxan kimidir!
Qan-beyin baryeri ağıllı qalxan kimi beyin toxumasını qanda ola biləcək yad maddələrdən qoruyur. Bundan əlavə, həyatın davamı üçün mühüm rola malik bəzi maddələrin beyindən qana və qandan beyinə daşınmasına vasitəçilik edir.
Qan-beyin baryerinin formalaşmasında qan damarlarını təşkil edən hüceyrələrin “sıx birləşmə” adlanan strukturları əsas məqamı təşkil edir. Qan-beyin baryerinin beyin tərəfində astrosit adlanan beyin hüceyrələrinin geniş əsaslı ucları mövcuddur. Astrosit adlanan hüceyrələrin son ayaqcıqlarından ifraz olunan bəzi maddələr sıx birləşmələri və qan axınını idarə edir, damarlarda genişlənməyə və ya daralmaya səbəb ola bilər.
Beyin şişi hüceyrələri xəstəliyin erkən mərhələlərində dərmanlara daha həssas ola bilər..
Tədqiqatçıların əldə etdiyi nəticələrə görə, əsas şiş kütləsindən kənarda yerləşən qlioblastoma hüceyrələrinin demək olar ki, hamısı astrositlərin son ayaqcıqları ilə qan damarlarının xarici səthləri arasındakı boşluqda toplanmışdır. Xərçəng hüceyrələrinin kiçik qan damarları şəbəkəsindən başqa yerlərə köç etmək üçün dayaq və qida mənbəyi kimi istifadə etdiyi görülmüşdür. Bundan əlavə, qlioblastoma hüceyrələrinin sıx birləşmələri aradan qaldıraraq qan-beyin baryerinə və qan axınına nəzarəti ələ keçirdiyi də görülmüşdür.
Tədqiqat qrupunu təəccübləndirən bir kəşf də baş vermişdir; qlioblastoma hüceyrələrinin çox kiçik bir hissəsi xəstəliyin erkən dövründə qan-beyin baryerini oyatmışdır. Beləliklə, xəstəliyin erkən mərhələsində, qan damarlarına hücum edildiyi anda, şiş hüceyrələri qan-beyin baryeri tərəfindən tamamilə qorunmuş vəziyyətdə deyillər. Bunun mənası qlioblastoma hüceyrələrinin həmin anda hədəf-yönümlü dərmanlara həssas ola biləcəyidir.
Şiş hüceyrələri ilə qan-beyin baryeri arasındakı əlaqənin daha yaxşı başa düşülməsi qlioblastoması olan xəstələrin daha yaxşı müalicə edilməsinə imkan verəcək. Ağıllı strukturları uzaqlarda axtarmağa ehtiyac yoxdur. Bədənimizin daxilində hər saniyə milyonlarla ağıllı dövrə, bəzən sağlamlığın, bəzən isə xəstəliyin xeyrinə mübarizəsini davam etdirir. Elm dünyası da sağlamlığın xeyrinə verilən bu mübarizəyə töhfə vermək üçün yeni kəşflər etməyə və insan bədənindəki naməlumları həll etməyə davam edir.
Mənbələr
Bu məqalə sizə faydalı oldu?
Rəyiniz məzmunumuzu yaxşılaşdırmağa kömək edir.





Oxucu şərhləri
Şərhinizi paylaşın
Adınız və şərhiniz yalnız administrator təsdiqindən sonra dərc olunur. E-poçt ünvanınız ziyarətçilərə heç vaxt göstərilmir.
İlk şərhi siz yazın.