Müalicədən sonra xərçəngin təkrarlanmaması üçün nələr edilməlidir?

Bütün müalicə prosesi və sonrakı dövr üçün istiqamətverici olması məqsədilə, bəzi məqamlara diqqət etməklə sağlam həyat sürməyiniz mümkündür.
Xərçəng diaqnozu qoyulduqda ilk şoku geridə qoyan xəstənin və yaxınlarının bu xəstəlik haqqında kifayət qədər məlumat sahibi olması çox vacibdir. Xərçəngin tam olaraq hansı növ olduğu, hansı müalicə üsullarının tətbiq ediləcəyi, bu müalicələrə bağlı mümkün yan təsirlər və ən əsası, xərçəngin təkrarlanmasının qarşısını almaq üçün hansı tədbirlərin görüləcəyi soruşulmalı əsas mövzular arasında yer alır.
Nələr edilməlidir?
Bütün müalicə prosesi və sonrakı dövr üçün istiqamətverici olması məqsədilə, aşağıda göstərilən məqamlara diqqət etməklə sağlam həyat sürməyiniz mümkündür:
- Həkiminizdən müalicənizin qısa xülasəsini istəyin. Tətbiq olunan cərrahi müdaxilə, radioterapiya və kimyaterapiya dozalarının siyahısını hazırlayın. Beləliklə, həkiminizlə müalicəniz haqqında danışa və onu mərhələli şəkildə izləyə bilərsiniz.
- Xərçəng müalicənizlə bağlı yarana biləcək uzunmüddətli yan təsirləri soruşaraq plan qurun. Müalicənizlə bağlı mümkün uzunmüddətli yan təsirlər barədə həkiminizlə danışın və nələrə diqqət etməli olduğunuzu öyrənin. Xərçəng müalicələrinin bir qismi ürək-damar problemləri və ya ikinci xərçəng riskini artıra bildiyi kimi, bir qismi də sümüklərinizə təsir göstərə bilər. Bu səbəbdən həkiminizlə daim ünsiyyətdə olmağınız vacibdir.
- Xərçəngin təkrarlanması qorxusunun öhdəsindən necə gələcəyinizi öyrənin. İlk olaraq, həkiminizdən xərçəngin təkrarlanma riskini öyrənin. İkinci mərhələdə, verilən risk nisbətinin ümumi orta göstəriciyə əsaslandığını və sizə özəl olmadığını unutmayın. Üçüncü olaraq, qorxularınızla üzləşmək və həyatınıza daha inamlı addımlarla davam etmək üçün psixoloji dəstək almağı düşünün.
- Hərəkətli həyat sürün. Sağlamlığınıza müsbət təsir göstərəcək qərar verərək həyatınızı dəyişdirməyi düşünə bilərsiniz. Sağlamlıq vəziyyətinizə uyğun idmanla məşğul olmaq özünüzü yaxşı hiss etməyinizi təmin edəcək. Bununla da xərçənglə bağlı mümkün risk nisbətiniz azalmış olacaq. Tez-tez piyada gəzin və ya pilləkənlərlə piyada qalxıb-enin. Təkbaşına idman etmək çətin gəlirsə, uyğun idman proqramına qoşula bilərsiniz. Beləliklə, mütəxəssis nəzarəti altında digər iştirakçılarla birlikdə müntəzəm idman etmək imkanı əldə edə bilərsiniz.
- Düzgün qidalanın. Mükəmməl qidalanmaq məcburiyyətində deyilsiniz. Lakin meyvə, tərəvəz və tam taxıllı qidaları daha çox qəbul etməyiniz özünüzü daha yaxşı hiss etməyinizi təmin edər. Daha sağlam qidalanmaq mədədə həzm çətinliyi və ya bədəndə çəki artımı ilə bağlı yaranacaq problemlərin qarşısını alacaq. Əmin olmadığınız hallarda sağlam qidalanmaq üçün dietoloqa müraciət etməyiniz məqsədəuyğun olar.
- Sağlam həyat tərzini qoruyun. İdman və qidalanma böyük mənzərənin yalnız bir hissəsidir. Uzun ömür və bu həyatı daha keyfiyyətli yaşamaq üçün siqareti tərgidin, istifadə edirsinizsə, alkoqolu gündə bir qədəhlə məhdudlaşdırın və dərinizi günəş şüalarından qorumaq üçün günəş kremindən istifadə edin. Həmçinin kifayət qədər D vitamini qəbul etdiyinizə əmin olun. Bunun üçün həkim nəzarəti altında aparılacaq qan testi ilə bədəninizdəki D vitamini miqdarını ölçdürə və kifayət qədər miqdarı necə qəbul edəcəyiniz barədə həkiminizlə məsləhətləşə bilərsiniz.
- Bədəninizi yenidən bərpa edin. Məsələn, süd vəzi xərçəngi müalicəsindən sonra bir çox qadın çəki alır. Menopauza, müalicədə istifadə olunan tamoksifen və aromataz inhibitorları bədəndə dəyişikliklərə və çəki artımına səbəb ola bilər. Çəkiyə nəzarət sağlamlıq baxımından vacib olduğuna görə, həkim və dietoloq nəzarəti altında idman proqramlarına qoşularaq çəkiyə nəzarət edə və bədəninizdə yağ əvəzinə əzələ yaranmasını təmin edə bilərsiniz.
- Əlamətlərin öhdəsindən gəlin. Lazımsız yerə əzab çəkməyin. Davamlı halsızlıq və ya zəiflik hiss edirsinizsə, müalicədən sonra “kemo beyin” adlandırılan düşünmə və yaddaş problemləriniz varsa və ya həyatınızı çətinləşdirən ağrı, sızıltı kimi problemlər yaşayırsınızsa, vaxt itirmədən həkiminizlə görüşün. Həkiminiz lazımi müalicələrlə bu cür əlamətlərin təsirini azaldaraq həyat keyfiyyətinizi artıracaq.
- Xərçəng müalicəsi almış və sağalmış digər insanlarla ünsiyyət qurun. Ailəniz və dostlarınız ən böyük dəstəkçiləriniz olsa da, bir çox insan bu prosesdə xərçəng diaqnozu qoyulmuş, müalicə almış və sağalmış şəxslərlə təcrübələrini bölüşmək və ya söhbət edərək birlikdə vaxt keçirmək istəyir. Eyni duyğu və düşüncələri bölüşmək insanın müalicədən sonra gündəlik həyatına daha asan uyğunlaşmasını təmin edəcək və mənəvi baxımdan mühüm güc mənbəyi olacaq.
Əziz oxucularım, hər keçən gün daha müsbət nəticələrin əldə edildiyi xərçəng xəstəliyinin bir çox növü artıq problem olmaqdan çıxmışdır. Bir çox xərçəng növü, xüsusilə erkən diaqnoz qoyulduqda, müxtəlif üsullarla effektiv şəkildə müalicə olunur və xəstələrin əksəriyyəti həyatlarını qaldıqları yerdən davam etdirə bilirlər. Bu səbəbdən xərçəngsinizsə və ya xərçəng müalicəsi alıb sağalmısınızsa, qorxmayın və özünüzü tək hiss etməyin. Sizi müalicə edəcək, dəstək olacaq və yol göstərəcək mütəxəssislərin olduğunu heç vaxt unutmayın.
Həyatınız boyunca qarşılaşacağınız hər cür problemin öhdəsindən gəlməyiniz mümkündür. Yalnız bunu həmişə xatırlamalısınız: həyatınızı necə formalaşdıracağınıza siz qərar verəcəksiniz..
Bu məqalə sizə faydalı oldu?
Rəyiniz məzmunumuzu yaxşılaşdırmağa kömək edir.





Oxucu şərhləri
Şərhinizi paylaşın
Adınız və şərhiniz yalnız administrator təsdiqindən sonra dərc olunur. E-poçt ünvanınız ziyarətçilərə heç vaxt göstərilmir.
İlk şərhi siz yazın.