4 თებერვალი, კიბოს მსოფლიო დღე 2021 – COVID-19-ის შემდეგ მკურნალობისადმი დამყოლობასა და სიახლეებზე ფოკუსირება

4 თებერვლის, კიბოს მსოფლიო დღის აღსანიშნავად, მთელ მსოფლიოში COVID-19 პანდემიას -თან გამკლავებისას ონკოლოგიაში მომუშავე მედდებს, ექიმებს, მკვლევრებს, მოხალისეებს, დამცველებსა და სხვა მომვლელებს ხმას ვაძლევთ და მადლობას ვუხდით!..
კიბოს კონტროლის საერთაშორისო კავშირმა (UICC) 2019 - 2021 წლების კიბოს მსოფლიო დღის თემად „მე მტკიცედ მაქვს გადაწყვეტილი და გავაკეთებ“ განსაზღვრა. სლოგანი კიბოს საზოგადოების გამორჩეულ სულსა და ძალას აჯამებს. გასული წლის განმავლობაში ონკოლოგიაში მომუშავე ჯანდაცვის პროფესიონალები ერთდროულად პანდემიას ებრძოდნენ და კიბოს სრულფასოვან ზრუნვას აგრძელებდნენ.
გამოკითხვა, რომელიც ჯანდაცვის მუშაკებზე ზეწოლას აჩვენებს
UICC-ის კვლევამ 55 ქვეყანაში 100-ზე მეტ წევრ ორგანიზაციასთან, მათ შორის სამოქალაქო საზოგადოებასთან, საავადმყოფოებთან, კვლევით ცენტრებთან და პაციენტთა მხარდაჭერის ჯგუფებთან, რომელიც The Lancet Oncology-ში გამოქვეყნდა, აჩვენა, რომ მათი შემოსავლები და ორგანიზაციული საქმიანობა მნიშვნელოვანი წნეხის ქვეშაა . ონკოლოგიაში მომუშავე პროფესიონალების 4-დან 3-მა აღნიშნა, რომ პანდემიისას შემოსავალი %25-დან %100-მდე შეუმცირდათ. მსგავსი პროგნოზებია 2021 წლისთვისაც.
UICC-ის წევრთა განცხადებები კიდევ უფრო ადასტურებს, რომ კიბოს ორგანიზაციებს არა მხოლოდ რესურსების შემცირების, არამედ კორონავირუსის გავრცელების საწინააღმდეგო აუცილებელი ზომებისა და ეპიდემიური დაავადების გადაცემის შიშის გამოც აქვთ სიცოცხლის გადამრჩენი მომსახურებების შენარჩუნების სირთულეებს.
ანგარიშები ხაზს უსვამს COVID-19-თან ბრძოლის წინა ხაზზე პერსონალის მზარდ დეფიციტს; დაგეგმილი პრევენციის, დიაგნოსტიკისა და ტესტების, კლინიკური ცდებისა და კვლევების შეწყვეტასა და დაყოვნებას; მგზავრობისა და შეკრების შეზღუდვებით საზოგადოებრივ დახმარებაში მონაწილეობის სირთულეს; დაბალი და საშუალო შემოსავლის ქვეყნებში ძირითად წამლებზე წვდომის უფრო დიდ დაბრკოლებებს...
- დაკავშირებული თემა: როგორ მოქმედებს პანდემიისას კიბოს სკრინინგისა და მკურნალობის დაყოვნება სიკვდილიანობაზე?
საკმაოდ გარკვეული ჩანს, რომ გასულ წელს კიბოს მომსახურებების შეფერხება დაავადების უფრო გვიან სტადიებზე დიაგნოსტიკას გამოიწვევს. დიაგნოზის დაგვიანება და სიმპტომიანი პირების საავადმყოფოში მისვლის შიში, სამწუხაროდ, კიბოთი სიკვდილიანობას გაზრდის. უფრო უარესიც: პანდემიის ფართო ეკონომიკური გავლენა კიბოს მკურნალობაზე მომავალ წლებში მაღალშემოსავლიან ქვეყნებშიც იგრძნობა, დაბალი და საშუალო შემოსავლის ქვეყნებში კი შეიძლება სათანადოდ ვერ გაიზომოს. ამიტომ კიბოს შესახებ ცნობიერების შენარჩუნება ძალიან მნიშვნელოვანია.
თავდადების მაგალითები
მსოფლიოს მრავალ ადგილას მოხალისეები მობილიზდნენ გაჭირვებული პაციენტებისთვის წამლისა და საკვების მისატანად და ზრუნვის ცენტრებამდე ტრანსპორტირებისთვის. კერძო სექტორი ინოვაციურ ტექნოლოგიებს ავითარებს მკურნალობის ხარისხის შენარჩუნებით ცენტრებში გატარებული დროის შესამცირებლად. ციფრული ტექნოლოგია ექიმებსა და კვლევით ცენტრებს გლობალური თანამშრომლობისა და ცოდნის გაზიარების საშუალებას აძლევს და აჩქარებს უფრო პაციენტზე ორიენტირებულ ზრუნვაზე გადასვლას.
- დაკავშირებული თემა: კიბოს პაციენტებისთვის პალიატიური მკურნალობის ტელეჯანმრთელობით მიწოდება
მნიშვნელოვანი პროგრესი კიბოს მკურნალობაში
ბოლო წლებში კიბოს მკურნალობაში მნიშვნელოვანი პროგრესი იქნა მიღწეული (იხილეთ ინოვაციები და აღმოჩენები ონკოლოგიაში).
მაღალშემოსავლიან ქვეყნებში ზოგი კიბოს ინციდენტობის (წლიური ახალი შემთხვევების) და სიკვდილიანობის შემცირება ვნახეთ. აფრიკის მსგავსი დაბალი და საშუალო შემოსავლის რეგიონებში კიბოს შესახებ ცნობიერების იმედისმომცემ ზრდასა და ეროვნული კონტროლის გეგმების განხორციელების ნაბიჯებს ვხედავთ. ახლა ამ პოზიტიური გარემოსა და ცნობიერების დაკარგვის დრო კი არაა, არამედ COVID-19-ის გაკვეთილებით მედიცინის პროგრესის მხარდაჭერისა და ჯანდაცვის სისტემების გაუმჯობესების დრო.
დაკავშირებული თემები
კიბოსთან ბრძოლაში მნიშვნელოვანი სირთულეები რჩება. COVID-19 ეპიდემიის ფართო გავლენა ქვეყნებს მდგრადი განვითარების ზოგი მიზნის, განსაკუთრებით ჯანმრთელობისა და საყოველთაო სამედიცინო დაზღვევის, მიღწევას გაურთულებს.
COVID-19-მა კიბოს კონტროლზე გლობალურად იმოქმედა, ხოლო კიბოს საზოგადოების პასუხი განსაკუთრებული, გმირულიც იყო. წელს კიბოს მსოფლიო დღის აღნიშვნა უფრო მნიშვნელოვანია, ვიდრე ოდესმე. ყველამ მიზნად დავისახოთ, რომ 2021 წელს კოლექტიური ძალისხმევა კვლავ მივმართოთ კიბოს მიერ ყველა ქვეყნისთვის შექმნილ ხანგრძლივ გამოწვევებზე. მეტი კიბო უნდა ავიცილოთ, უფრო ადრე დავადგინოთ დიაგნოზი და ყველა პაციენტს საჭირო ხარისხიანი მკურნალობის ხელმისაწვდომობა უზრუნველვყოთ.
4 თებერვალი, 2021 წლის კიბოს მსოფლიო დღე ეძღვნება კიბოსთან მცხოვრები ადამიანებისა და მათი ოჯახების, ასევე მედდების, ექიმების, მკვლევრების, მოხალისეების, დამცველებისა და მათზე მზრუნველი სხვა პირების სიმამაცესა და მიღწევებს.

ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.