ახალი CDK4/6 ინჰიბიტორი ძუძუს კიბოში: Tibremciclib-ით მნიშვნელოვნად გახანგრძლივებული გადარჩენა

Tibremciclib ძუძუს შორსწასულ კიბოში: რამდენად ძლიერია სარგებელ-რისკის ბალანსი? TIFFANY ფაზა 3-ის შედეგები

ახალი თაობის CDK4/6 ინჰიბიტორმა tibremciclib-მა (Betta Pharmaceuticals), მეორე რიგის fulvestrant-ის მკურნალობაზე დამატებისას, HR-დადებითი/HER2-უარყოფითი შორსწასული ძუძუს კიბოს პაციენტებში პროგრესირების გარეშე გადარჩენა (PFS) მნიშვნელოვნად გაახანგრძლივა. თუმცა ამ სარგებელს თან ახლდა ტოქსიკურობის მომატებული რისკი .

 TIFFANY ფაზა 3 კვლევის შედეგების მიხედვით, მხოლოდ fulvestrant-ით ნამკურნალებ პაციენტებთან შედარებით, tibremciclib-ის კომბინაციამ მედიანური PFS 11 თვით გაახანგრძლივა. ამასთან, მკურნალობასთან დაკავშირებული დიარეის, ჰემატოლოგიური ტოქსიკურობისა და ჰიპოკალიემიის სიხშირე მნიშვნელოვნად უფრო მაღალი იყო.

კვლევის დიზაინი და მონაწილეები

სულ 274 პაციენტი ჩინეთის 69 ცენტრიდან შეირჩა; მათ ენდოკრინული თერაპიისას პროგრესირება აღენიშნათ და ჩატარებული ჰქონდათ ქიმიოთერაპიის მაქსიმუმ 1 რიგი.

რანდომიზაცია: თანაფარდობით 2:1

• Tibremciclib + Fulvestrant (400 mg პერორალურად, დღეში 1-ჯერ)
• პლაცებო + Fulvestrant

მკურნალობა გაგრძელდა დაავადების პროგრესირებამდე, გარდაცვალებამდე ან მკურნალობის შეწყვეტამდე .

მედიანური დაკვირვების ხანგრძლივობა: 13 თვე

ძირითადი მიგნებები

მედიანური PFS: Tibremciclib-ის ჯგუფი: 16.5 თვე

• Fulvestrant-ის ჯგუფი: 5.6 თვე
• პროგრესირების რისკის 63%-ით შემცირება (HR, 0.37; P < 0,001) 

ტოქსიკურობის სიხშირე უფრო მაღალი იყო, თუმცა მკურნალობის სრულად შეწყვეტის სიხშირე დაბალი იყო (მხოლოდ 4 პაციენტი).

გვერდითი ეფექტების პროფილი

მკურნალობასთან დაკავშირებული ყველაზე ხშირი გვერდითი ეფექტები (tibremciclib პლაცებოსთან შედარებით):

• დიარეა: 79.3% შედარებით 13.3%-თან
• ნეიტროპენია: 75.5% შედარებით 15.6%-თან
• ლეიკოპენია: 73.9% შედარებით 16.7%-თან
• ანემია: 69% შედარებით 21.1%-თან
• გულისრევა: 37% შედარებით 18.9%-თან
• ღებინება: 40.2% შედარებით 11.1%-თან

3+ ხარისხის გვერდითი ეფექტები tibremciclib-ის ჯგუფში 50.5%-ში, პლაცებოს ჯგუფში კი 21.1%-ში აღინიშნა.

ყველაზე ხშირი მძიმე გვერდითი ეფექტები: ნეიტროპენია (15.2%), ანემია (12.0%), ჰიპოკალიემია (12.0%).

ჰიპოკალიემიის შემთხვევების უმეტესობა დიარეას უკავშირდებოდა და ელექტროლიტების მონიტორინგით + კალიუმის დამატებით იმართებოდა.

შედარება სხვა CDK4/6 ინჰიბიტორებთან

ტოქსიკურობის პროფილი რიბოციკლიბისა და პალბოციკლიბის მსგავსი იყო. ნეიტროპენიისა და ლეიკოპენიის სიხშირე abemasiclib-ის, dalpiciclib-ისა და palbociclib-ის კვლევებთან შედარებით უფრო დაბალი აღმოჩნდა. Tibremciclib-ის მაღალმა სელექტიურობამ CDK4-ის მიმართ, CDK6-ისა და CDK9-ის ნაკლები ინჰიბირების გამო, შესაძლოა მძიმე დიარეისა და ნეიტროპენიის სიხშირე შეამციროს.

PFS-ის გაუმჯობესება ზოგიერთ სხვა CDK4/6 ინჰიბიტორთან შედარებით უფრო მაღალი აღმოჩნდა:

• Palbociclib (PALOMA-3): 9.5 თვე შედარებით 4.6 თვესთან (HR, 0.46)
• Abemaciclib (MONARCH): 11.5 თვე შედარებით 5.6 თვესთან (HR, 0.38)
• Dalpiciclib (DAWNA-1): 16.6 თვე შედარებით 7.2 თვესთან (HR, 0.50)

კლინიკური მნიშვნელობა და შეზღუდვები

• Tibremciclib + fulvestrantჩინეთში HR-დადებითი/HER2-უარყოფითი შორსწასული ძუძუს კიბოსთვის დამტკიცდა.
• აშშ-ში ან ევროპაში ჯერ არ დამტკიცებულა.
• კვლევა მხოლოდ ჩინელ პაციენტებში ჩატარდა და მანამდე CDK4/6 ინჰიბიტორით არნამკურნალებ პაციენტებს მოიცავდა.

შესაბამისად, შედეგების განზოგადება შეიძლება შეზღუდული იყოს, განსაკუთრებით დასავლეთის ქვეყნებისთვის.

დასკვნა

Tibremciclib + fulvestrant შორსწასულ HR-დადებით/HER2-უარყოფით ძუძუს კიბოში მნიშვნელოვნად ახანგრძლივებს PFS-ს და მართვადი გვერდითი ეფექტების პროფილის მქონე ძლიერ სამკურნალო არჩევანად გამოირჩევა. სარგებელ-რისკის ბალანსი დადებითი ჩანს, თუმცა ფართო პოპულაციებში ეფექტიანობისა და საშუალო გადარჩენის მონაცემები ჯერ მოსალოდნელია.