ახალმა იმუნოთერაპიამ კიბოს მკურნალობა შეიძლება შეცვალოს: Anti-LAG-3 Relatlimab

2022 წლის 6 იანვარს The New England Journal of Medicine-ში აღწერილ ფაზა II/III RELATIVITY-047 კლინიკურ კვლევაში დოქტორმა Hussein Tawbi-მ და კოლეგებმა აჩვენეს, რომ ლიმფოციტის აქტივაციის გენი 3-ის (LAG-3) ბლოკატორი იმუნოთერაპიის, relatlimab-ის, სხვა დამტკიცებულ იმუნოთერაპიაზე — PD-1 ინჰიბიტორ nivolumab-ზე — დამატებამ მანამდე უმკურნალო, მეტასტაზური ან ქირურგიულად მოუცილებელი მელანომის მქონე პაციენტებში პროგრესირების გარეშე გადარჩენა მნიშვნელოვნად გაახანგრძლივა.
RELATIVITY-047 კვლევის შედეგის შეჯამება
- Relatlimab + nivolumab-მა მხოლოდ nivolumab-თან შედარებით პროგრესირების გარეშე გადარჩენა მნიშვნელოვნად გააუმჯობესა.
- პროგრესირების გარეშე გადარჩენის (PFS) მედიანა 10,1 თვე იყო 4,6 თვესთან შედარებით, ხოლო 1-წლიანი PFS-ის მაჩვენებლები, შესაბამისად, 48% და 36% იყო.

კვლევის საფუძველი
LAG-3 და PD-1 იმუნური სისტემის T უჯრედების გამთიშველი ორი განსხვავებული იმუნური საკონტროლო წერტილია. ადრე ნაჩვენები იყო, რომ LAG-3-ის მაბლოკირებელი ანტისხეულის relatlimab-ისა და PD-1-ის მაბლოკირებელი ანტისხეულის nivolumab-ის კომბინაცია ადრე ნამკურნალებ მელანომის პაციენტებში უსაფრთხო და სიმსივნის საწინააღმდეგო აქტივობის მქონე იყო. ეს კვლევა კი მანამდე უმკურნალო მელანომაში ამ კომბინაციის ეფექტიანობის შესასწავლად ჩატარდა.
ქვემოთ relatlimab-ისა და nivolumab-ის მოქმედების მექანიზმი მარტივადაა გამოსახული:

კვლევის დეტალები
ამ ორმაგად ბრმა კლინიკურ კვლევაში ჩრდილოეთ, ცენტრალური და სამხრეთ ამერიკის, ევროპის, ავსტრალიისა და ახალი ზელანდიის რეგიონებიდან 714 პაციენტი 2018 წლის მაისიდან 2020 წლის დეკემბრამდე შემთხვევითად მიაკუთვნეს relatlimab/nivolumab-ის (355 პაციენტი) ან მხოლოდ nivolumab-ის (359 პაციენტი) ჯგუფს.
მკურნალობა დაავადების პროგრესირებამდე ან მიუღებელ გვერდით მოვლენამდე ყოველ 4 კვირაში 160 mg relatlimab-ისა და 480 mg nivolumab-ის კომბინაციას ან მხოლოდ 480 nivolumab-ს მოიცავდა.
სტრატიფიკაციის ფაქტორები განისაზღვრა შემდეგნაირად:
- LAG-3 ექსპრესიის სტატუსი (დადებითად შეღებილი იმუნური უჯრედების ≥ 1% ან < 1%) და
- PD-L1 ექსპრესიის სტატუსი (სიმსივნური უჯრედების ≥ 1% ან < 1%).
კვლევის პირველადი საბოლოო წერტილი იყო პროგრესირების გარეშე გადარჩენა, რომელსაც ბრმა დამოუკიდებელი განხილვის ცენტრი ზომავდა.
შედეგები
- 2021 წლის მარტის ანალიზისთვის დაკვირვების მედიანური ხანგრძლივობა 13,2 თვე იყო.
- პროგრესირების გარეშე გადარჩენის მედიანა relatlimab/nivolumab-ის ჯგუფში 10,1 თვე იყო (95% სანდოობის ინტერვალი [GA] = 6,4–15,7 თვე), nivolumab-ის ჯგუფში კი — 4,6 თვე (95% GA = 3,4–5,6 თვე) (საფრთხეთა თანაფარდობა [HR ] = 0,75, 95% GA = 0,62–0,92, P = 0,006).
- 12. თვეზე PFS-ის მაჩვენებლები 47,7% (95% GA = 41,8%-53,2%) და 36,0% (95% GA = 30,5%-41,6%) იყო.
- კომბინირებულმა მკურნალობამ სიმსივნური დატვირთვის, LDH დონისა და სხვა პროგნოზული ფაქტორების მიუხედავად უკეთესი პროგრესირების გარეშე გადარჩენა აჩვენა.
გვერდითი მოვლენები
მძიმე (3. ან 4. ხარისხის) გვერდითი მოვლენები relatlimab/nivolumab-ის ჯგუფის 40,3%-სა და nivolumab-ის ჯგუფის 33,4%-ში განვითარდა; მკურნალობასთან დაკავშირებულად ისინი, შესაბამისად, 18,9%-სა და 9,7%-ში ჩაითვალა.
Relatlimab/nivolumab-ის ჯგუფში მკურნალობასთან დაკავშირებული ნებისმიერი ხარისხის ყველაზე ხშირი გვერდითი მოვლენები იყო ქავილი (23,4%, 15,9%-თან შედარებით), დაღლილობა (23,1%, 12,8%-თან შედარებით) და გამონაყარი (15,5%, 12,0%-თან შედარებით); ყველაზე ხშირი 3. ან 4. ხარისხის მოვლენა დაღლილობა იყო (1,1%, 0,3%-თან შედარებით).
ინფუზიასთან დაკავშირებული რეაქციები პაციენტთა 5,9%-ში განვითარდა, 3,6%-თან შედარებით.
Relatlimab/nivolumab-ის ჯგუფში ნებისმიერი ხარისხის ყველაზე ხშირი იმუნური მექანიზმით გამოწვეული გვერდითი მოვლენები იყო ჰიპოთირეოზი ან თირეოიდიტი (18,0%, 13,9%-თან შედარებით), გამონაყარი (9,3%, 6,7%-თან შედარებით) და დიარეა/კოლიტი (6,8%, 3,1%-თან შედარებით); ყველაზე ხშირი 3. ან 4. ხარისხის მოვლენები იყო ჰეპატიტი (3,9%, 1,1%-თან შედარებით) და თირკმელზედა ჯირკვლის უკმარისობა (1,4%, 0%-თან შედარებით).
დასკვნა
აქამდე იმუნური საკონტროლო წერტილები, რომელთა წინააღმდეგ ეფექტიანი წამლები შეიქმნა, მხოლოდ CTLA-4, PD-1 და PD-L1 იყო. LAG-3-ით ონკოლოგიურ პრაქტიკაში დამიზნებადი კიდევ ერთი ახალი საკონტროლო წერტილი განისაზღვრა.
ამ მდგომარეობაში მელანომის მქონე პაციენტების სამკურნალოდ ადრე 2016 წლის იანვარში ipilimumab + nivolumab-ის კომბინაციამ, როგორც BRAF V600 wild, ისე მუტანტურ პაციენტებში CheckMate-067-ის PFS შედეგის საფუძველზე FDA-ს დაჩქარებული დამტკიცება მიიღო. ამ კვლევაში PFS-ის მედიანა კომბინაციის ჯგუფში 11,5 თვე, მხოლოდ nivolumab-ით კი 6,9 თვე იყო.
სტატიის განხილულ კვლევაში LAG-3-ისა და PD-1-ის ერთობლივმა დათრგუნვამ მანამდე უმკურნალო მეტასტაზური ან ქირურგიულად მოუცილებელი მელანომის პაციენტებში, მხოლოდ PD-1-ის დათრგუნვასთან შედარებით, პროგრესირების გარეშე გადარჩენის უფრო დიდი სარგებელი მოიტანა. Relatlimab-ისა და nivolumab-ის კომბინაციამ ახალი გვერდითი მოვლენის სიგნალები არ აჩვენა. მომავალში შესაძლოა გავიგოთ, რომ ეს კომბინაცია სხვა კიბოებშიც ეფექტიანია და FDA-ს დამტკიცებები მიიღო.
წყაროები
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.