COVID-19-ის ზოგ პაციენტს გემოსა და ყნოსვის მუდმივი დაკარგვა აღენიშნება
2022 წლის 26 ივლისს ჟურნალ The BMJ-ში ონლაინ გამოქვეყნებული კვლევის მიხედვით, COVID-19-ის მქონე პაციენტთა ნაწილს ყნოსვისა და გემოს შეგრძნების მუდმივი დარღვევა აღენიშნება.
სინგაპურის ეროვნული უნივერსიტეტის Yong Loo Lin-ის ფაკულტეტის Benjamin Kye Jyn Tan-მა და მისმა კოლეგებმა COVID-19-ის იმ პაციენტთა წილის შესასწავლად, რომლებსაც ყნოსვისა და გემოს მუდმივი ფუნქციური დარღვევა ჰქონდათ, 3699 პაციენტის მომცველი 18 კვლევის მონაცემებით სისტემატური მიმოხილვა და მეტაანალიზი ჩაატარეს.
დაკავშირებული თემა: რა სიმპტომები გრძელდება COVID-19-ის შემდეგ 7 თვემდე?
მკვლევრებმა დაადგინეს, რომ პაციენტთა დაახლოებით 4,4 – 5,6%-ს, შესაძლოა ყნოსვისა და გემოს მუდმივი ფუნქციური დარღვევა განუვითარდეს. ეს მაჩვენებლები პაციენტების მიერ მოწოდებულ ცნობებს ეფუძნება. თუმცა მგრძნობელობის ანალიზის მიხედვით, ისინი შესაძლოა რეალურ სიხშირეს სათანადოდ ვერ ასახავდეს და მასზე დაბალი იყოს.
საერთო ჯამში, პაციენტთა
- 74,1%-ს 30-ე დღეს,
- 85,8%-ს 60-ე დღეს,
- 90%-ს 90-ე დღეს და
- 95,7%-ს 120 დღეში ყნოსვის შეგრძნება დაუბრუნდა.
პაციენტთა
- 78,8%-ს 30-ე დღეს,
- 87,7%-ს 60-ე დღეს,
- 90,3%-ს 90-ე დღეს და
- 98%-ს 120-ე დღეს გემოს შეგრძნება დაუბრუნდა.
მამაკაცებთან შედარებით, ქალებს ყნოსვის აღდგენის ალბათობა ნახევრად ნაკლები ჰქონდათ. ეს ნიშნავს, რომ ქალები ამ პრობლემებით უფრო მეტად იტანჯებიან. ასევე, ქალები თითქმის ორჯერ უფრო ხშირად აღნიშნავდნენ COVID-19-თან დაკავშირებულ ყნოსვისა და გემოს ფუნქციურ დარღვევას ან ცხვირის გაჭედვას.
შედეგად, მიუხედავად იმისა, რომ პაციენტების უმეტესობას ყნოსვის ან გემოს აღდგენა პირველ სამ თვეში ელის, მნიშვნელოვან ქვეჯგუფს ხანგრძლივი ფუნქციური დარღვევა უვითარდება. ამ მდგომარეობის მკაფიო მკურნალობა ამჟამად არ არსებობს. ამ პაციენტებს სჭირდებათ დროული გამოვლენა, ინდივიდუალური მკურნალობა და დაკავშირებული ნარჩენი დარღვევების ხანგრძლივი მეთვალყურეობა.
*
წყაროები
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.