Covid-19-ისაგან გამოჯანმრთელებულთა ნახევარში MR (მრტ) გამოსახულებებზე გულის კუნთის დაზიანება აღმოჩნდა

ახალმა კვლევამ აჩვენა, რომ Covid-19-ით ინფიცირებული და მაღალი ტროპონინის დონის მქონე 148 ჰოსპიტალიზებული პაციენტის დაახლოებით ნახევარს 2 თვის შემდეგ გულის მაგნიტურ-რეზონანსულ გამოსახულებებზე (CMR) მიოკარდიუმის გარკვეული დაზიანება ჰქონდა.
ლონდონის საუნივერსიტეტო კოლეჯიდან Dr. Marianna Fontana და მისი კოლეგები წერენ: „ჩვენი შედეგები აჩვენებს, რომ მძიმე Covid-19-ისაგან გამოჯანმრთელებული და მომატებული ტროპონინის მქონე პაციენტების ამ ქვეჯგუფში ლოკალიზებული (რეგიონული) მიოკარდიული ანთება (გულის კუნთის დაზიანება), წინა ანგარიშთან შედარებით უფრო იშვიათად, თუმცა პაციენტების ნაწილში მაინც გრძელდება და შეიძლება კლინიკურ პრობლემას წარმოადგენდეს.”
კოჰორტულ კვლევაში გამოვლენილი გულის დარღვევები 26%-ში არაიშემიურად კლასიფიცირდა (მათ შორის მიოკარდიტის მსგავსი გადოლინიუმის გვიანი გაძლიერება [LGE]), 22%-ში იშემიურ გულის დაავადებასთან იყო დაკავშირებული (ინფარქტი ან პროვოცირებადი იშემია), ხოლო 6%-ში ორმაგ პათოლოგიად შეფასდა.
148 პაციენტის 89%-ში მარცხენა პარკუჭის (LV) ფუნქცია ნორმალური იყო. LV დისფუნქციის მქონე 17 პაციენტიდან (პაციენტთა 11%) მხოლოდ 4-ს ჰქონდა განდევნის ფრაქცია 35%-ზე ნაკლები. მიოკარდიუმის ინფარქტთან დაკავშირებული LV დისფუნქციის მქონე 9 პაციენტიდან 6-ს იშემიური გულის დაავადების ცნობილი ისტორია ჰქონდა.

ზემოთ მოცემული გამოსახულება: დაზიანებული გულის ბაზალური და აპიკალური ჭრილების მრტ გამოსახულება. ლურჯი შემცირებულ სისხლის ნაკადს აღნიშნავს, ნარინჯისფერი კი – კარგს. სურათზე მუქი ლურჯი გულის ქვედა ნაწილს აჩვენებს, სადაც მიოკარდიუმის სისხლმომარაგება ძლიერაა შემცირებული. შავ-თეთრი ანგიოგრაფია აჩვენებს, რომ გულის ამ ნაწილის მომმარაგებელი სისხლძარღვი დახშულია.
„მიოკარდიტის ტიპის“ LGE-ის მქონე არცერთ პაციენტს არ ჰქონდა კედლის რეგიონული მოძრაობის დარღვევა და არც საწყისი, არც ყველაზე მაღალი ტროპონინის მნიშვნელობები მიოკარდიტის დიაგნოზის მაჩვენებელი არ ყოფილა.
ჭიქა ნახევრად სავსეა
“ჭიქა ნახევრად სავსეა“ მიდგომის მიმდევარმა ავტორმა Graham D. Cole-მა Twitter-ზე აღნიშნა, რომ ტროპონინ-პოზიტიურ Covid-19-ის პაციენტებთან შედარებიდან მხოლოდ 2 თვის შემდეგ პაციენტების დაახლოებით ნახევარს მრტ-ზე მნიშვნელოვანი გულის დარღვევა არ ჰქონდა. Cole-მა თქვა: „ეს მნიშვნელოვანია: მომატებული ტროპონინით ძალიან მძიმედ ავადმყოფთა ჯგუფშიც კი გულის დაზიანების მტკიცებულების არქონა ხშირი იყო.”
მკვლევრები თავიანთ ანგარიშს ასე ასრულებენ: „გვჯერა, რომ ჩვენი მონაცემები ეწინააღმდეგება ჰიპოთეზას, თითქოს ქრონიკული ანთება, დიფუზიონური ფიბროზი ან ხანგრძლივი LV დისფუნქცია Covid-19-ისაგან გამოჯანმრთელებულთა დომინანტური მახასიათებელია.“
Fortana-მ კი განაცხადა: „ადრეულ „საორიენტაციო“ კვლევაში Covid-19-ისაგან გამოჯანმრთელებულთა ორ მესამედს მრტ-ზე პათოლოგიური ნიშნები ჰქონდა, დიფუზური ფიბროზისა და შეშუპების შესაბამისი მომატებული T1-ისა და T2-ის მაღალი სიხშირით. ჩვენი უფრო ფართო, მრავალცენტრული კვლევითა და უკეთესი კონტროლებით მიღებული მონაცემები გულის უკმარისობის დაბალ მაჩვენებელსა და გაცილებით ნაკლებ მიმდინარე ანთებას აჩვენებს, რაც დამაიმედებელია.“ მან ასევე აღნიშნა, რომ დაზიანების განსხვავებული მოდელები სხვადასხვა მექანიზმის მოქმედებაზე მიუთითებს, მათ შორის შესაძლებლობაზე, რომ „გულის დაავადების მქონე პირებს მძიმე ავადმყოფობის განვითარების უფრო მაღალი ალბათობა აქვთ, ამიტომ აღმოჩენილი დაზიანებების სულ მცირე ნაწილი შეიძლება მანამდეც არსებობდა“.
მკვლევართა ჯგუფმა, რომლის წევრიც ავტორი Tushar Kotecta-ცაა, განაცხადა, რომ პარკუჭის დისფუნქციის არმქონე შემთხვევების 88%-ში მიოკარდიტის მსგავსი დაზიანება მიოკარდიუმის სამი ან ნაკლები სეგმენტით შემოიფარგლებოდა, ხოლო ორივე პარკუჭის ფუნქცია მიოკარდიტის არმქონე პაციენტებისაგან არ განსხვავდებოდა.
Fortana-მ თქვა: „ჩვენ ვიყენებთ სიტყვებს „მიოკარდიტის მსგავსი“, მაგრამ ჰისტოლოგია არ გვაქვს. ჩვენი ჯგუფი რეალურად ეჭვობს, რომ ამის უმეტესი ნაწილი მიკროსისხლძარღვოვანი შედედება იქნება (მიკროანგიოპათიური თრომბოზი). იმედისმომცემია, რომ ანტიკოაგულაციის (შედედების პრევენციის) უფრო ახალმა სტრატეგიებმა შეიძლება სარგებელი მოიტანოს.”
მერილენდის ქალაქ გეიტერსბერგში CVPath ინსტიტუტიდან Aloke V. Finn-ს სურს, მკვლევრებმა საერთოდ შეწყვიტონ ტერმინ „მიოკარდიტის“ გამოყენება Covid-19-ის კლინიკური თუ გამოსახულებითი ნიშნების აღსაწერად. ერთ ინტერვიუში Finn-მა „მრტ მიოკარდიტის დიაგნოზს ვერ სვამს. ეს სპეციფიკური დიაგნოზია, რომელსაც, როგორც მკვლევრებიც აღიარებენ, საუკეთესო შემთხვევაში ჰისტოლოგია სჭირდება.“ – თქვა. Finn-ის CVPath-ის ჯგუფმა გამოაქვეყნა მონაცემები, რომლებიც SARS-CoV-2 ინფექციის შემდეგ მიოკარდიტის პათოლოგიურ მტკიცებულებას აჩვენებს. „როგორც კლინიცისტი, მიოკარდიტზე ფიქრისას ექოსა და LV გრამას ვუყურებ და ვამოწმებ, არის თუ არა კედლის მოძრაობის დარღვევა და ტროპონინის მატება. მაგრამ თუ კორონარული არტერიები ნორმალურია და ეს ყველაფერი არსებობს, მაშინ დიფერენციულ დიაგნოზში მიოკარდიტს განვიხილავ“ – თქვა მან. “თუმცა, როგორც ავტორებმა სამართლიანად აღნიშნეს, ამ შემთხვევათა უმეტესობაში პაციენტთა უმეტესობას რეალურად მიოკარდიტის დიაგნოზისათვის საჭირო ნიშნები არ ჰქონდა.” ის ეთანხმება Fontana-ს ვარაუდს, რომ ამ Covid-19-ისაგან გამოჯანმრთელებულებში მრტ-ზე აღმოჩენილი მიკროთრომბებია .
“ძალიან შესაძლებელია, რომ ეს შედეგები მიკროთრომბების არსებობის გამოვლენის კუთხით ჩემი ჯგუფისა და სხვების მიერ ჩატარებულ ბოლო აუტოფსიურ კვლევებს შეესაბამებოდეს. თუმცა ეს ზუსტად არ ვიცით, რადგან მანამდე კლინიკურ პრაქტიკაში მათი არსებობა არავის შეუსწავლია და რეალურად არ ვიცით, როგორ შეიძლება მიკროთრომბები მრტ-ზე გამოიყურებოდეს.”
შეჯამება და დასკვნა
მომატებული ტროპონინის მქონე გამოჯანმრთელების პერიოდში მყოფ Covid-19-ის პაციენტებზე დღემდე ჩატარებული უდიდესი კვლევის 148 მონაწილე ლონდონის ექვსიდან ერთ საავადმყოფოში მკურნალობდა. პათოლოგიური ტროპონინის მქონე პაციენტებს გაწერის შემდეგ გულის მრტ შესთავაზეს და Covid-19-ის არმქონე პაციენტებსა და 40 ჯანმრთელ მოხალისეს, როგორც საკონტროლო ჯგუფს, შეადარეს.
საავადმყოფოში ყოფნის საშუალო ხანგრძლივობა 9 დღე იყო და პაციენტთა 32%-ს ინტენსიური თერაპიის განყოფილებაში ვენტილატორის დახმარება სჭირდებოდა. ნახევარზე ოდნავ მეტს (57%) ჰიპერტენზია, 7%-ს წარსულში მიოკარდიუმის ინფარქტი, 34%-ს დიაბეტი, 46%-ს ჰიპერქოლესტერინემია ჰქონდა, ხოლო 24% ეწეოდა. სხეულის მასის საშუალო ინდექსი 28,5 kg /m2 იყო.
საკონტროლო მრტ Covid-19-ის დიაგნოზის დადასტურებიდან საშუალოდ 68 დღის შემდეგ ჩატარდა.
Cole-მა Twitter-ზე აღნიშნა, რომ შედეგებზე როგორც გადარჩენილთა, ისე შერჩევაზე მიმართვის მიკერძოება მოქმედებს. „არ გამოგვიკვლევია მოწყვლადი პაციენტები, რომელთა სკანირებაც, ექიმების აზრით, მართვისათვის სავარაუდოდ სასარგებლო ინფორმაციას არ მოგვცემდა.”
Fontana-მ თქვა, რომ შედეგები არაფერს გვეუბნება იმის შესახებ, თუ რა დაემართათ Covid-19-ის მქონე, მაგრამ არაჰოსპიტალიზებულ პირებს, ან ჰოსპიტალიზებულებს, რომლებსაც ტროპონინი მომატებული არ ჰქონდათ.
მან დაამატა, რომ შემოთავაზებული მიდგომა, განსაკუთრებით შედეგების განმეორების შემთხვევაში, შეიძლება წინ გადადგმული ნაბიჯი იყოს ხანგრძლივი ნარჩენი დარღვევების უფრო მაღალი ან დაბალი რისკის მქონე პაციენტების გამოსავლენად და შედეგების გასაუმჯობესებელი სტრატეგიების ინფორმირებისთვის.
დაკავშირებული თემები
- Covid-19-ის მიმდინარე სტატისტიკა მსოფლიოსა და თურქეთში
- კორონავირუსის შესახებ უახლესი ამბები და სამეცნიერო სიახლეები
წყაროები
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.