დოქტორი ძაღლი ტკივილსა და შფოთვას ამცირებს

Plos One ჟურნალში გამოქვეყნებული კვლევის შედეგებით, გადაუდებელ განყოფილებაში მისული პაციენტების 10-წუთიანი შეხვედრა თერაპიულ ძაღლთან ტკივილისა და შფოთვის კლინიკურად მნიშვნელოვან შემცირებას იწვევს და პაციენტებს თავს უკეთ აგრძნობინებს.

კვლევაში მონაწილე James Stempien-მა, კანადის ქალაქ სასკატუნში Saskatchewan-ის უნივერსიტეტის (USask) გადაუდებელი მედიცინის ხელმძღვანელმა, თქვა, რომ ეს შედეგები არ დაფიქსირებულა მათ შორის, ვინც თერაპიულ ძაღლს არ შეხვდა.

„ეს ამ ჩარევისადმი ნდობას გვაძლევს. ასევე დავინახეთ, რომ ძაღლებთან ურთიერთობა პერსონალისთვისაც სასარგებლოა. ჩვენი შესანიშნავი მოხალისე თერაპიული ძაღლების გუნდების წყალობით ხარჯი მინიმალურია, შედეგი კი — ფასდაუდებელი.“

გადაუდებელ განყოფილებაში მომლოდინე პაციენტების გამოკითხვამ აჩვენა, რომ უმეტესობას თერაპიულ ძაღლთან შეხვედრა სურდა. სხვა გამოკითხვაში შეფასდა მდგომარეობა გადაუდებელ განყოფილებაში თერაპიულ ძაღლთან შეხვედრამდე და შეხვედრის შემდეგ. მან აჩვენა, რომ შეხვედრის შემდეგ პაციენტების აღქმული კომფორტი გაიზარდა, ხოლო დისკომფორტი შემცირდა. ასევე აღინიშნა, რომ სტრესულ გადაუდებელ გარემოში ძაღლები ყურადღების გადატანის სასიამოვნო საშუალებად მიიღეს.

• დაკავშირებული თემა: რა არის შინაური ცხოველით თერაპია? ვისთვისაა შესაფერისი და როგორ ტარდება?

სასკატუნის Royal University Hospital-ში ჩატარებულ კვლევაში 97 პაციენტი მონაწილეობდა. პაციენტების 46% ქალი იყო, საშუალო ასაკი კი — 56 წელი. მათი ტკივილი, შფოთვა, დეპრესია და ჯანმრთელობის მდგომარეობა თერაპიულ ძაღლთან შეხვედრამდე, უშუალოდ მის შემდეგ და 20 წუთის შემდეგ გაიზომა განახლებული, 11-ბალიანი Edmonton-ის სიმპტომების შეფასების სისტემით. ამავე დროს არტერიული წნევა და გულისცემის სიხშირეც ჩაიწერა. იგივე მონაცემები 101 ადამიანისგან შემდგარ საკონტროლო ჯგუფშიც, რომელიც თერაპიულ ძაღლს არ შეხვედრია (39% ქალი, საშუალო ასაკი 57 წელი), ორჯერ, 30-წუთიანი ინტერვალით შეგროვდა.

მკვლევართა ცნობით, თერაპიულ ძაღლთან შეხვედრამ მონაწილეთა შფოთვაზე, დეპრესიასა და ტკივილზე მცირე, თუმცა სტატისტიკურად მნიშვნელოვანი გავლენა მოახდინა. ძაღლთან შეხვედრილმა პაციენტებმა საკონტროლო ჯგუფთან შედარებით შფოთვის, დეპრესიისა და ტკივილის თითოეულ კატეგორიაში უფრო დაბალი ქულები მიუთითეს. მათ ასევე განაცხადეს, რომ შეხვედრის შემდეგ თავს მნიშვნელოვნად უკეთ გრძნობდნენ. თუმცა თერაპიულ ძაღლთან შეხვედრას არტერიულ წნევასა და გულისცემის სიხშირეზე მნიშვნელოვანი გავლენა არ ჰქონია.

James Stempien-მა თქვა: „ვფიქრობ, ეს ნამდვილად ისაა, რასაც საავადმყოფოებმა ყურადღება უნდა მიაქციონ. პაციენტების გასაძლიერებლად თერაპიულ ძაღლებთან თანამშრომლობა საავადმყოფოს სხვა სფეროებშიც, მაგალითად ბავშვების მხარდაჭერაში, ძალიან წარმატებული იყო. გადაუდებელი განყოფილება მრავალი ადამიანისთვის საშიში ადგილია. ადამიანები იქ ხშირად საკუთარი ან საყვარელი ადამიანის ცხოვრების ყველაზე ცუდ დღეს მიდიან. თერაპიული ძაღლის სახით მხარდაჭერა სასიამოვნოდ აღიქმება და მასთან კავშირის დამყარება ბევრს შეუძლია. ძაღლთან ურთიერთობამ გადაუდებელ განყოფილებაში მისვლის მიზეზი შეიძლება ოდნავ შეარბილოს.“

უნიკალური კვლევა

ქცევითი ჯანმრთელობის სპეციალისტმა Kara Rauscher-მა, რომლის თქმითაც ცხოველების მონაწილეობით ჩარევების შესახებ კვლევების უმრავლესობა თვისებრივი ხასიათისაა, კვლევა ასე შეაფასა: „ამ კონტროლირებულ კლინიკურ ცდაში მიღებულმა მონაცემებმა გაზარდა კვლევების ერთობლიობა, რომელიც ცხოველების მონაწილეობით ჩარევების ეფექტიანობას უჭერს მხარს. ამ პროგრამების პოტენციური სარგებლის უკეთ გასაგებად კვლევა სხვა გადაუდებელ განყოფილებებშიც შეიძლება განმეორდეს.“

Rauscher-მა AIDS-ის მომსახურების ორგანიზაცია Nashville Cares-თან თავისი მუშაობის ნაწილში პერსონალის ჯანმრთელობაზე გაამახვილა ყურადღება. ამ მუშაობის შესახებ მან თქვა: "ეს მუშაობა მოიცავს თერაპიული ძაღლების მოყვანას, რომლებთანაც პერსონალს სამუშაო დღის განმავლობაში დროის გატარება შეუძლია; ანეკდოტური დაკვირვებით, ჩვენმა თანამშრომლებმა სტრესის შემცირებისა და განწყობის გაუმჯობესების შესახებ განაცხადეს."

*

• დაკავშირებული თემა: ჩვენი საყვარელი შინაური ცხოველები კიბოს მკურნალობისას გვერდით გვიდგანან