ძუძუს კიბო და ძუძუში წარმოქმნილი კეთილთვისებიანი კვანძები ახალგაზრდა გოგონებში
ამ სტატიაში
ძუძუში წარმოქმნილი კვანძები ახალგაზრდა გოგონებში
ძუძუს კიბო 13-19 წლის გოგონებში ძალიან იშვიათია, ამიტომ კვლევების უმეტესობაში ამ ასაკობრივი ჯგუფის ძუძუს კიბოს სტატისტიკა არ იწარმოება. თუმცა მოზარდ გოგონებს მაინც შეიძლება ჰქონდეთ შფოთვა ჯანმრთელობის ამ პრობლემებზე. ამ შფოთვის შესამცირებლად ძუძუში შენიშნული ნებისმიერი ცვლილებისას ექიმს უნდა მიმართონ.
ისიც უნდა იცოდნენ, რომ ძუძუს ცვლილებები საშიში მდგომარეობა არ არის და ძუძუში წარმოქმნილი კვანძების უმეტესობა ძუძუს კიბოს არ უკავშირდება.
ფაქტები ახალგაზრდა გოგონებში ძუძუს კიბოს შესახებ
- ამ ასაკობრივ ჯგუფში ძუძუს ცვლილებებისას პირველ რიგში ძუძუს კიბო არ უნდა ვიფიქროთ.
- ძუძუში ხელით შესაგრძნობი კვანძის მიხედვით ვერ ვიტყვით, რომ კიბოა.
- ახალგაზრდებში დიდი იშვიათობის გამო გადარჩენის მაჩვენებლებზე სანდო სტატისტიკა არ არსებობს.
ახალგაზრდა გოგონების შფოთვა ძუძუს კიბოს შესახებ
- ასაკის კლებასთან ერთად ძუძუს კიბოს რისკი მცირდება.
- ახალგაზრდა გოგონებს განვითარების პერიოდში ახალ ზრდასთან დაკავშირებული ცვლილებები შეიძლება ეუცხოვოთ. ზოგიერთს ძუძუს კიბოზე ფიქრი აშფოთებს.
- ძუძუს ადრეული განვითარება ჩვეულებრივ დვრილის ქვეშ კვანძით იწყება, რამაც მოზარდებში ძუძუს კიბოზე შფოთვა შეიძლება გამოიწვიოს. ძუძუს ეს კვანძები შეიძლება მგრძნობიარე იყოს და გარკვეული შიშები გააჩინოს.
- მშობლებმა და ექიმებმა ახალგაზრდა გოგონებს ამ პერიოდში ძუძუს ნორმალური ზრდის შესახებ ინფორმაცია უნდა მიაწოდონ და დაამშვიდონ, რადგან განვითარების პროცესის ამ ნაწილმა შეიძლება მოუსვენრობა გამოიწვიოს.
მიუხედავად დიდი იშვიათობისა, ახალგაზრდა გოგონას შეიძლება ძუძუს კიბო განუვითარდეს. ყველა კიბოს მსგავსად, ახალგაზრდებშიც ძუძუს კიბო ნორმალური უჯრედების ზრდისა და გამრავლების კონტროლიდან გამოსვლით ხდება. დროთა განმავლობაში ამ ზრდამ შეიძლება შექმნას სიმსივნე, რომელიც ჯანმრთელ ქსოვილს აზიანებს და სხეულის სხვა ნაწილებში ვრცელდება.
ქალების დაახლოებით %12-ს სიცოცხლის განმავლობაში ძუძუს კიბო უვითარდება. თუმცა, ძუძუს კიბოს ყველაზე მნიშვნელოვანი რისკფაქტორი ასაკია. ძუძუს კიბოების %1-ზე ნაკლები 30 წლამდე ქალებში გვხვდება და ქალისთვის 30 წლამდე ძუძუს კიბოს განვითარების რისკი %0.44-ია.
- ახალგაზრდა ასაკში ძუძუს კიბოთი დაავადება (დეტალურად)
მიზეზები, რომლებმაც ახალგაზრდა გოგონას ძუძუში კვანძი შეიძლება წარმოქმნას
ფიბროადენომა
ფიბროადენომა ძუძუს კეთილთვისებიანი სიმსივნეა. 20-იან და 30-იან ასაკში ქალებში გავრცელებული ამ კვანძების კიბოდ გარდაქმნის ალბათობა ძალიან დაბალია. მკაფიო საზღვრები აქვს და ზომა ძალიან მცირედან რამდენიმე სანტიმეტრამდე მერყეობს.
ფილოიდური სიმსივნე (ცისტოსარკომა ფილოიდესი)
ფილოიდური სიმსივნეები სწრაფად იზრდება, თუმცა თითქმის ყოველთვის კეთილთვისებიანია. ძუძუს ყველა სიმსივნის %1-ზე ნაკლებს შეადგენს, თუმცა შემთხვევათა %10-ში სხეულის სხვა უბნებში შეიძლება გავრცელდეს. ქალებს ამ სიმსივნეების ამოკვეთა შეუძლიათ.
ძუძუს კისტები
კისტები ძუძუს ქსოვილში, კანის ქვეშ, მუწუკების მსგავსი მცირე კისტური სტრუქტურები შეიძლება იყოს. ზოგ ქალს კი ძუძუს ქსოვილში მრავალი კისტა აქვს და ამას ფიბროკისტური ძუძუეწოდება. ფიბროკისტურმა ძუძუმ ქალებში შეიძლება შფოთვა გამოიწვიოს და ექიმთან ხშირად მისვლა მოუნდეთ.
- ძუძუს კვანძები, რომლებიც კიბო არ არის, თუმცა კიბოს რისკს ზრდის
ძუძუს კიბოს სახეობები
ძუძუს კიბოს მქონე უფროსი ასაკის ქალების მსგავსად, ახალგაზრდა გოგონებსაც შეიძლება ამ დაავადების განსხვავებული სახეობები ჰქონდეთ.
In situ კიბოები
In situ ნიშნავს, რომ კიბო მხოლოდ ძუძუს რძის წილაკების ან სადინრების ამომფენ ეპითელურ უჯრედებშია. ეს კიბოები უფრო მარტივად იკურნება. ყველაზე გავრცელებული in situ კიბოებია; სადინროვანი კარცინომა in situ (DCIS) და წილაკოვანი კარცინომა in situ (LCIS).
ინვაზიური ძუძუს კიბოები
ინვაზიური ძუძუს კიბოს დროს კიბოს უჯრედები წარმოშობის ადგილით არ შემოიფარგლება, ქსოვილში შიგნით იზრდება და სხვა ორგანოებში გავრცელების პოტენციალი აქვს.
- რა სახეობები აქვს ძუძუს კიბოს? (დეტალურად)
ძუძუს კიბოს ნიშნები ახალგაზრდა გოგონებში
ძუძუს ყოველთვიურ თვითგასინჯვას უკვე აღარ ვურჩევთ, რადგან დადგინდა, რომ ეს მეთოდი ადრეულ დიაგნოსტიკაში მნიშვნელოვან წვლილს არ იძლევა, სამაგიეროდ არასაჭირო შფოთვასა და სამედიცინო პროცედურებს იწვევს. ამიტომ ყველა ქალს თვითგასინჯვის ნაცვლად ვურჩევთ ყურადღება მიაქციოს ძუძუში განსაკუთრებით ახლად დაწყებულ ცვლილებებს. ამასთან ძუძუს კვანძების %90 კიბოთი გამოწვეული არ არის.
ძუძუს კიბოს გავრცელებულ ნიშნებს შორისაა:
- ძუძუში მასა / კვანძი
- იღლიებში ან კისერზე გადიდებული ლიმფური კვანძები
- ძუძუს ზომის, ფორმის ან სიმეტრიის აუხსნელი ცვლილებები
- ძუძუს ან დვრილის კანის ცვლილებები
- ძუძუდან გამონადენი, რომელიც მენსტრუაციას, ორსულობას ან ძუძუთი კვებას არ უკავშირდება
- სიწითლე ან შეშუპება
- ძუძუს კანის ჩაზნექა ან ჩაღრმავება
- ქავილიანი, ქერცლიანი გამონაყარი
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.