Gənc qızlarda süd vəzi xərçəngi və süd vəzisində yaranan xoşxassəli kütlələr

Gənc qızlarda süd vəzisində yaranan kütlələr

Süd vəzi xərçəngi 13-19 yaş aralığındakı gənc qızlarda çox nadir görüldüyündən əksər tədqiqat qurumlarında bu yaş qrupuna aid süd vəzi xərçəngi statistikası aparılmır. Lakin yeniyetmə qızlar yenə də bu sağlamlıq problemləri barədə narahat ola bilirlər. Narahatlıqları azaltmaq üçün süd vəzilərində fərq etdikləri hər hansı dəyişiklikdə həkimə müraciət etməlidirlər.

Bunu da bilməlidirlər ki, süd vəzisində dəyişikliklər qorxulacaq hal deyil və yaranan kütlələrin çoxu süd vəzi xərçəngi ilə əlaqəli deyil.

Gənc qızlarda süd vəzi xərçəngi barədə həqiqətlər

• Bu yaş qrupunda süd vəzisində yaranan dəyişikliklərdə ilk olaraq süd vəzi xərçəngi düşünülməməlidir.
• Əllə hiss olunan kütləyə baxaraq xərçəng olduğunu demək olmaz.
• Gənclərdə çox nadir olduğundan sağqalma göstəriciləri barədə etibarlı statistika yoxdur.

Gənc qızlarda süd vəzi xərçəngi ilə bağlı narahatlıqlar

• Yaş azaldıqca süd vəzi xərçəngi riski azalır.
• Gənc qızlar inkişaf dövründə olduqları üçün yeni böyümə ilə yaşadıqları dəyişiklikləri qəribə qarşılaya bilərlər. Bəziləri süd vəzi xərçəngindən narahat ola bilər.
• Süd vəzisinin erkən inkişafı adətən gilənin altında düyün kimi başlayır, bu da gənclərdə süd vəzi xərçəngi narahatlığı yarada bilər. Bu düyünlər həssas ola və bəzi qorxuları tətikləyə bilər.
• Valideynlər və həkimlər gənc qızları bu dövrdə süd vəzilərinin normal böyüməsi barədə məlumatlandırmalı və rahatlatmalıdırlar, çünki inkişaf prosesinin bir hissəsi olaraq bu vəziyyət narahat hiss etdirə bilər.

Çox nadir olsa da, gənc qızda süd vəzi xərçəngi inkişaf edə bilər. Bütün xərçənglərdə olduğu kimi gənclərdə də süd vəzi xərçəngi normal hüceyrələrin böyümə və çoxalmasının nəzarətdən çıxması ilə yaranır. Zamanla bu böyümə sağlam toxumaya zərər verən və bədənin digər nahiyələrinə yayıla bilən şiş yarada bilər.

Qadınların təxminən %12-sində həyatları boyunca süd vəzi xərçəngi inkişaf edir. Lakin, süd vəzi xərçəngi üçün ən mühüm risk amili yaşdır. Süd vəzi xərçənglərinin %1-dən azı 30 yaşdan aşağı qadınlarda görülür və qadının 30 yaşdan əvvəl süd vəzi xərçəngi inkişaf etdirmə riski %0.44-dür.

- Gənc yaşda süd vəzi xərçənginə tutulmaq (ətraflı)

Gənc qızın süd vəzisində kütlə yarada bilən səbəblər

Fibroadenoma

Fibroadenoma xoşxassəli süd vəzi şişidir. 20-ci və 30-cu yaşlardakı qadınlarda geniş görülən bu kütlələrin xərçəngə çevrilmə ehtimalı çox aşağıdır. Aydın sərhədləri vardır və ölçüləri çox kiçikdən bir neçə santimetrə qədər dəyişir.

Filloid şiş (Sistosarkoma Filloides)

Filloides sürətlə böyüyən şişlərdir, lakin demək olar ki, həmişə xoşxassəlidirlər. Bütün süd vəzi şişlərinin %1-dən azını təşkil edir, lakin hadisələrin %10-unda bədənin digər nahiyələrinə yayıla bilərlər. Qadınlar bu şişləri çıxartdıra bilərlər.

Süd vəzi kistləri

Kistlər süd vəzi toxumasında dərinin altında sızanaq şəklində kiçik kistik quruluşlar ola bilər. Bəzi qadınların süd vəzi toxumalarında isə çoxsaylı kist vardır və bu, fibrokistik süd vəziadlandırılır. Fibrokistik süd vəzisinin olması qadınlarda narahatlıq yarada və tez-tez həkimə müraciət etmək istəyə bilərlər.

- Xərçəng olmayan, lakin xərçəng riskini artıran süd vəzi kütlələri

Süd vəzi xərçənginin növləri

Yaşlı süd vəzi xərçəngli qadınlarda olduğu kimi, bu xəstəliyi olan gənc qızlarda da onun müxtəlif növləri ola bilər.

In situ xərçənglər

In situ xərçəngin yalnız süd vəzisinin süd paycıqlarını və ya kanallarını örtən epitel hüceyrələrində olması deməkdir. Bu xərçənglər daha asan müalicə edilir. Ən çox rast gəlinən in situ xərçənglər duktal karsinoma in situ (DCIS) və lobulyar karsinoma in situdur (LCIS).

İnvaziv süd vəzi xərçəngləri

İnvaziv süd vəzi xərçənglərində xərçəngli hüceyrələr yarandıqları nahiyə ilə məhdudlaşmır, toxumanın içinə böyüyür və başqa orqanlara yayılma potensialına malikdirlər.

- Süd vəzi xərçənginin növləri hansılardır? (ətraflı)

Gənc qızlarda süd vəzi xərçənginin əlamətləri

Aylıq özünü süd vəzi müayinəsini artıq tövsiyə etmirik, çünki bu üsulun süd vəzi xərçənginin erkən diaqnozuna əhəmiyyətli töhfə vermədiyi, əksinə lazımsız narahatlıq və tibbi prosedurlara səbəb olduğu tapıldı. Buna görə bütün qadınlara özünü müayinə əvəzinə süd vəzilərində xüsusilə yeni başlayan dəyişikliklərə əhəmiyyət verməyi tövsiyə edirik. Bununla yanaşı, süd vəzi kütlələrinin %90-ı xərçənglə əlaqəli deyil.

Süd vəzi xərçənginin yayılmış əlamətləri arasında bunlar vardır:

• Süd vəzisində kütlə / düyün
• Qoltuq altında və ya boyunda şişmiş limfa düyünləri
• Süd vəzilərinin ölçüsündə, formasında və ya simmetriyasında izah olunmayan dəyişikliklər
• Süd vəzisi və ya giləsinin dərisində dəyişikliklər
• Süd vəzisində aybaşı, hamiləlik və ya südvermə ilə əlaqəli olmayan axıntı
• Qızartı və ya şişkinlik
• Süd vəzi dərisinin çəkilməsi və ya çuxurlaşması
• Qaşınan, qabıqlı səpgi

- Süd vəzi xərçənginin əlamətləri (ətraflı)