კიბოს პაციენტებში ტრადიციული, მცენარეული და ალტერნატიული მედიცინის გამოყენება მცირდება — რატომ?

ტრადიციული, მცენარეული და ალტერნატიული მედიცინის ფარგლებში განხილული პროდუქტებისა და პრაქტიკების გამოყენება კიბოს პაციენტებში გავრცელებულია და შეიძლება კიბოს მკურნალობასთან დაკავშირებულ პირად და საზოგადოებრივ რწმენას ასახავდეს (ქვემოთ „ტრადიციული, მცენარეული და ალტერნატიული მედიცინის“ პრაქტიკებს მხოლოდ „ალტერნატიული მედიცინით“ მოვიხსენიებთ).

2006-დან 2018 წლამდე კიბოს პაციენტებში ალტერნატიული სამედიცინო პროდუქტების გამოყენების შემფასებელი ახალი სტატიააჩვენებს, რომ ბოლო წლებში კიბოს პაციენტებში ეს ტენდენცია შემცირდა. განვიხილოთ კვლევის დეტალები და ამ შედეგის შესაძლო მიზეზები.

10-წლიანი სხვაობის გაზომვა

კვლევაში კიბოს პაციენტები 2 ჯგუფად დაყვეს: პირველ ჯგუფში ალტერნატიული მედიცინის გამოყენება 2006-დან 2008 წლამდე შეაფასეს, მეორეში კი — 2016-დან 2018 წლამდე.

ეს იყო ჯვარედინ-სექციური კვლევა, რომელშიც პაციენტებს პირადი და კლინიკური ინფორმაციის გარდა ეკითხებოდნენ გამოყენებული ალტერნატიული პროდუქტების ტიპებს, გამოყენების მიზეზებსა და აღქმულ სარგებელს. მკვლევრებმა ორ ჯგუფს შორის გამოყენების მოდელებისა და სხვა ცვლადების ცვლილებები შეადარეს.

შედეგები

კვლევაში სულ 1416 პაციენტი ჩაერთო: 1 ჯგუფში — 464, ხოლო 2 ჯგუფში — 952.

1 ჯგუფში 2 ჯგუფთან შედარებით უფრო მაღალი იყო კიბოს სამკურნალოდ ალტერნატიული მედიცინის გამოყენების ალბათობა (შესაბამისად 84,4% და 73%, p <0,0001)

2-ე ჯგუფში ალტერნატიული მეთოდების გამოყენების მთავარი მიზნები ტკივილის კონტროლი და მადის გაუმჯობესება იყო.

ალტერნატიული პროდუქტების გამოყენების შესახებ ონკოლოგებისთვის ინფორმაციის გაზიარება დროთა განმავლობაში მნიშვნელოვნად არ შეცვლილა და დაბალი დარჩა (1 ჯგუფში — 31,6%, 2 ჯგუფში — 35,7%).

ამასთან, ექიმები 2 ჯგუფში 1 ჯგუფთან შედარებით უფრო ხშირად გამოხატავდნენ ალტერნატიული მედიცინის გამოყენების საწინააღმდეგო აზრს (შესაბამისად 48,7% და 19,1%, p < 0,001). ანუ დროთა განმავლობაში ონკოლოგები ალტერნატიული მედიცინის მიმართ უფრო მკაფიო პოზიციას იკავებდნენ.

ავტორებმა დაასკვნეს, რომ ათწლეულის განმავლობაში კიბოს პაციენტებში ალტერნატიული მედიცინის გამოყენება მნიშვნელოვნად შეიცვალა, რაც ამ ჯგუფის სოციალურ და კულტურულ ცვლილებებს ასახავს.

რატომ მცირდება ონკოლოგიაში ტრადიციული, ალტერნატიული და მცენარეული მკურნალობისადმი ინტერესი?

ამის მთავარი მიზეზია ის, რომ ონკოლოგიის პროგრესს არა მხოლოდ მეცნიერები და ექიმები, არამედ პაციენტები და საზოგადოებაც ამჩნევენ.

მართლაც, 2010 წლის შემდეგ ონკოლოგიაში, განსაკუთრებით იმუნოთერაპიებით და მიზნობრივი „ჭკვიანი“ წამლებით პაციენტების ცხოვრებაში მნიშვნელოვანი წვლილის შეტანის მოწმენი გავხდით. რა თქმა უნდა, ყველა ტიპის კიბოს სრულ განკურნებამდე ჯერ დიდი გზა გვაქვს, თუმცა ამ დაავადების ისტორიასთან შედარებით, რომელიც თვით კაცობრიობის ისტორიაზე ძველია, რამდენიმე ათწლეულში გავლილი გზა იმედისმომცემია. პარალელურად, პაციენტების ყურადღება ალტერნატიული პროდუქტებიდან ახალი მკურნალობის ხელმისაწვდომობაზე გადავიდა.