ნაკლებმა მუშაობამ პროდუქტიულობა შეიძლება გაზარდოს — ზოგჯერ სიზარმაცე კარგია

ადამიანში დროის აღქმა დაახლოებით ძვ. წ. 2000 წელს დაიწყო. მას შემდეგ საინტერესოა, დროის ყოველი წამის ეფექტურად გამოსაყენებლად მისი თვალყურის დევნება რამდენად ეფექტურია.
დროის დაკარგვა დღეს ჯანდაცვაშიც დიდი პრობლემაა. როგორც პაციენტისთვის, ისე ექიმისთვის, მაგალითად, გასინჯვისა თუ შემოვლის დროის გაზრდა კმაყოფილებას ზრდის, თუმცა ბოლო 25 წელიწადში საუბრის დროის შემცირებას უჩივიან.
1970 წლის კვლევით იმდროინდელი თერაპევტი კვირაში საშუალოდ 101 პაციენტს სინჯავდა. დღიურად ამას 5.6 საათს უთმობდა, ერთი პაციენტის გასინჯვა კი საშუალოდ 18.4 წუთს გრძელდებოდა.
დღეს პაციენტის ასაკის, დაავადების სიმძიმის, მკურნალობის ფართო არჩევანისა და დოკუმენტაციის გათვალისწინებით დღეში საშუალოდ 30-35 ან მეტ პაციენტს სინჯავენ; ძველი მაჩვენებლები დღევანდელთან შედარებით უფრო ფუფუნებად შეიძლება მოგვეჩვენოს (ეს საშუალო რიცხვებია და დაწესებულებებით განსხვავდება). ტექნოლოგიური განვითარების დახმარებით დროისა და მოთხოვნილი მოვლის ეფექტურობის შეფასებისას შეიძლება ითქვას, რომ მუშაობის ყოველ შესაძლო საათში პროდუქტიულობა მაქსიმუმზეა. თუმცაარსებობს პროდუქტიულობის ზრდის სხვა გზა დამატებითი საათების გარეშე? დუგლას ადამსის „ავტოსტოპით გალაქტიკაში გზამკვლევის“ პერსონაჟზე ნათქვამი სიტყვები, ვფიქრობთ, დღევანდელი ექიმებისთვის ნაცნობი იქნება. „მას ზოგჯერ მთელი ცხოვრება ერთგვარ სიზმრად მიაჩნდა და აინტერესებდა, ახერხებდა თუ არა ცხოვრებით ტკბობას.“
დუგლასი ასეთი სიტყვებით ეფექტურ წინადადებასაც გვთავაზობს: „შესაძლოა წარმოსახულ, საინტერესო სამყაროებში თქვენი ენერგიისა და პროდუქტიულობის გასაზრდელი მინიშნება ან შესაძლებლობა იმალება.“
ავსტრალიელი ავტორი მადლენ დორი ფიქრობს, რომ თუ ადამიანს დროის სიმცირის სჯერა, უნდა გადახედოს, რამდენ ენერგიას ხარჯავს დროის ეფექტურად გამოყენებაზე და როგორ გამოიყენოს ის საუკეთესოდ. დორი აგრძელებს: „სწორია არა მთელი დროის მუშაობაში გატარება, არამედ სწავლა, როგორ გამოვიყენოთ ენერგია უფრო ეფექტურად. ჩვენი კულტურა ყურადღების გაფანტვას არ სწყალობს; არსებობს ამ წუთების შემცირებისა და ნაკლებ დროში მეტის გაკეთების გზა?“
ჯანდაცვის თანამშრომლები დღის განმავლობაში მრავალი საქმის შუაში არიან მოქცეული და წუთებში მოსაგვარებელი საქმეები საათობით იწელება, თუმცა ყველაფერთან გამკლავებას ცდილობენ. ამ დატვირთვის გამო აწყდებიან ძილის ნაკლებობას, დაღლილობას, თავის ტკივილს, დაძაბულობასა და სექსუალური შესაძლებლობის შემცირებას. პროდუქტიულობისთვის ჯერ ამ ძირითადი საკითხების მოგვარება უფრო გონივრული ჩანს.

დროის მართვა თუ ენერგიის მართვა?
ადრე ადგომა, გვიანობამდე და შაბათ-კვირას მუშაობა პროდუქტიულობის ასამაღლებლად ხშირი გზებია. თუმცა ასეთი დატვირთვა ადამიანს განსაკუთრებით სოციალური ცხოვრების ჩამორჩენის გამო კმაყოფილებას ვერ აძლევს.
1980 წლის კვლევაში სამედიცინო სტუდენტები ორ ჯგუფად გაყვეს. პირველს საქმეებისა და მიზნების ყოველთვიური დაგეგმვა სთხოვეს, მეორეს კი უფრო დეტალურად, ყოველდღიურად დაგეგმვა. ვარაუდის მიუხედავად, რომ დღიური გეგმის ჯგუფი დავალებებს ეფექტურად შეასრულებდა, აღმოჩნდა, რომ ყოველდღიური გეგმა სტუდენტების მოტივაციას აზიანებდა.
ავტორი ტიმ ჰარდფორდი ამბობს, რომ დღიურ დაგეგმვაში გარდაუვალი გამფანტველი ფაქტორები გეგმას არაეფექტურს ხდის და ასეთი სიის ნაცვლად იმპროვიზაციას უკეთესი შედეგი შეუძლია.
იქნებ დროის მართვა ჩვენ მიერ არასწორად გაგებული ილუზიაა? ენერგიის უფრო ეფექტურად გამოყენების გზა რომ არსებობდეს, ის პროდუქტიულობის შენარჩუნებისა და პაციენტთან დამაკმაყოფილებელი საუბრისთვის უფრო იმედისმომცემი იქნებოდა.
შეწყვეტების მართვა
ექიმის ყოველდღიურ სამუშაოს საშუალოდ დღეში 87-ჯერ სხვა საქმე წყვეტს. შეწყვეტა ეფექტურობას ამცირებს და დავალების გაგრძელებას უშლის ხელს. 2001 წლის კვლევით სხვადასხვა სპეციალობის ექიმებს განსხვავებული სიხშირით აწყვეტინებდნენ და დაბრკოლების მოსაგვარებელი ძალისხმევაც პროდუქტიულობას ამცირებდა.
კვლევაში გადაუდებელი დახმარების ექიმს საათში 9.7-ჯერ, ოჯახის ექიმს კი 3.7-ჯერ აწყვეტინებდნენ. გადაუდებელი დახმარების ექიმები უფრო ხშირად ფერხდებიან და ერთდროულად რამდენიმე პაციენტს უვლიან. პირველადი რგოლის ექიმებს იგივე სამუშაოსთვის მეტი დრო სჭირდებათ. შესაბამისად, გარემოსა და მოვლენების მართვის უნარისთვის სპეციალიზაციის სწავლებაში განსხვავებული სტრატეგიები აქვთ.
დროის მართვის სწავლება რთულ დაგეგმვასა და შეწყვეტებთან გამკლავების უნარების განვითარებას უნდა მოიცავდეს
ექიმები დღის განმავლობაში მოქნილობისთვის მზად უნდა იყვნენ. წინასწარ ვერ ეცოდინებათ შემდეგი პაციენტის პრობლემა, მომდევნო ვიზიტი ჩვეულებრივი იქნება თუ გადაუდებელი, ან როდის წარმოიქმნება გადაუდებელი მდგომარეობა.
დღის მცირე ნაწილებად დაყოფაც სასარგებლოა. მისაღწევი მიზნებით 45 წუთიანი ნაბიჯები დიდი სპილოს ნაწილ-ნაწილ შეჭმას ჰგავს. ასე დაკარგული დრო მცირდება და ნაკლები ენერგიით მეტი საქმე სრულდება.
თანამედროვე საავადმყოფოსა და მოვლის სირთულის გათვალისწინებით ექიმისთვის ენერგიის შესანარჩუნებლად მედიტაციისა და რთულ კლინიკურ სცენარებზე ღრმა კონცენტრაციის დროის გამოყოფა კლინიკურ წარმატებას აშკარად ეხმარება. ეს ყოველდღიურ გამოწვევებთან ეფექტურად, შემოქმედებითად და სწორად გამკლავების გზაა. ენერგიისა და მოტივაციისთვის დღის განმავლობაში სპორტის, მედიტაციისა და დასვენების დრო ამცირებს დატვირთვის სტრესს და ზრდის პროდუქტიულობას.
ყურადღების არმიმართვა სიზარმაცეს არ ნიშნავს და ზოგჯერ სასარგებლოა
სხვა რამეზე ფიქრისას, არაფერზე ფიქრისას ან ძილისას რთული კლინიკური პრობლემის სრულიად ახალი გამოსავალი უცებ მოგსვლიათ თავში? სიზარმაცე მხოლოდ შვებულება, სიამოვნება ან ცუდი ჩვევა არ არის. ზოგჯერ ყურადღების სხვაგან გადატანა ან კონცენტრაციის შეწყვეტა ტვინს თავისუფლად ფიქრის საშუალებას აძლევს. გადაჭარბება არ იქნება ვთქვათ, რომ სიზარმაცე ტვინს ისე სჭირდება, როგორც სხეულს D ვიტამინი (იხილეთ ტვინისთვის საკმარისი ძილის მნიშვნელობა).
ავტორ კრაიდერს, რამდენად წინააღმდეგობრივიც არ უნდა ჩანდეს, საქმეების დასასრულებლად სიზარმაცე საჭიროდ მიაჩნია. ჰარვარდის სამედიცინო სკოლის დოქტორი სირინი პილაი ამბობს, რომ პროდუქტიულობასა და სიზარმაცეს შორის არალოგიკური კავშირი ტვინის მუშაობის თავისებურებაა და დასძენს: „ადამიანები ვერ აცნობიერებენ, რომ საქმის დასასრულებლად ტვინს მასზე ყურადღების მიპყრობისა და მისგან ყურადღების მოხსნის პერიოდები სჭირდება. ეს მონაცვლეობა ტვინის ეფექტურობას ზრდის.“

დროის უკეთ გამოყენების 7 რჩევა
- გააცნობიერეთ, რომ დრო ერთადერთი სამართავი ცვლადი არ არის.
- გახსოვდეთ, რომ გონებისა და სხეულის შესაძლებლობებს ზღვარი აქვს.
- იცოდეთ ისეთი მოქმედი ფაქტორები, როგორიცაა ყურადღების დარღვევა, ჰიპერაქტივობა, წამლები და ჰორმონები.
- სამსახურსა და სახლში დასვენებისთვის დრო გამოყავით.
- ვარჯიშსა და სწორ კვებასმიჰყევით. ეს უკეთ გაგრძნობინებთ თავს.
- გეგმების შემოწმებისას მხოლოდ დღევანდელსა და ხვალინდელს ნუ გადახედავთ; სამომავლო გეგმებსაც განმეორებით დაუბრუნდით. ეს მოტივაციასაც მოგცემთ და ენერგიის სწორად გამოყენებაშიც დაგეხმარებათ
- დაღლილობისას გეგმის შეცვლას ნუ მოერიდებით; მუდმივად დაღლილობაზე ძალის დატანება მხოლოდ დაგტოვებთ დაღლილს. იცოდეთ, როდის დაისვენოთ.
წყაროები
Working Less Can Make You More Productive.
medscape.com - August 01, 2017
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.