ოპერაციის შემდეგ მუსიკის მოსმენამ გამოჯანმრთელება შეიძლება დააჩქაროს

მუსიკალური დოპინგი: გულისცემის, ტკივილისა და შფოთვის შესამჩნევი შემცირება

ოპერაციის შემდეგ გამოჯანმრთელება შეიძლება რთული იყოს; ტკივილი, შფოთვა და სტრესი პაციენტებს როგორც ფიზიკურად, ისე ფსიქოლოგიურად აწუხებს. ახალი კვლევა, რომელიც მუსიკის მოსმენის უბრალო ჩვევის ამ სირთულეებთან გამკლავების შესაძლებლობას აჩვენებს, ქირურგიულ რეაბილიტაციას სხვაგვარად გვანახებს. American College of Surgeons-ის (ACS) 2024 წლის Clinical Congress-ზე წარდგენილი კვლევა მუსიკის ძალას წარმოაჩენს როგორც შემოქმედებით და ეფექტიან გზას, რომელიც გამოჯანმრთელების დასაჩქარებლად შეიძლება გამოვიყენოთ.

დაკავშირებული თემები:

• მუსიკოთერაპიის სარგებელი კიბოს მქონე პაციენტებისთვის
• მუსიკოთერაპია კიბოს მკურნალობის ტვირთს ამსუბუქებს

ამცირებს ტკივილსა და შფოთვას, აბალანსებს გულისცემას

California Northstate University-ს მედიცინის ფაკულტეტის მკვლევრებმა ოპერაციის შემდეგ მუსიკის მოსმენის ეფექტებზე არსებული 3736 ნაშრომი განიხილეს და 35 კვლევა დეტალურად გააანალიზეს. ყველა მათგანში პაციენტების ტკივილი, შფოთვა, გულისცემა და ოპიოიდების (ნარკოტიკული ტკივილგამაყუჩებლების) მოხმარება შეფასდა. მონაცემებმა აჩვენა, რომ მუსიკის მსმენელებმა გამოჯანმრთელების პერიოდში მნიშვნელოვანი სარგებელი მიიღეს. ძირითადი შედეგებია:

• ტკივილის უფრო დაბალი დონე: მუსიკის მსმენელებმა ოპერაციიდან ერთი დღის შემდეგ ტკივილის მნიშვნელოვანი შემცირება აღნიშნეს. იგი რიცხვითი შეფასების სკალით (დაახლოებით 19% შემცირება) და ვიზუალური ანალოგური სკალით (7% შემცირება) გაზომეს.

• შფოთვის შემცირება: ყველა გაანალიზებულ კვლევაში მუსიკის მსმენელთა შფოთვა დაახლოებით 3% შემცირდა.

• ოპიოიდების ნაკლები მოხმარება: მუსიკის მსმენელები ოპერაციის შემდეგ პირველ დღეს სხვა პაციენტებზე ნაკლებ მორფინს იყენებდნენ. საშუალო ოპიოიდური მოხმარება არამსმენელებში 1,654 mg იყო, მსმენელებში კი 0,758 mg-მდე შემცირდა.

• გულისცემის უფრო დაბალი სიხშირე: მუსიკის მსმენელებში გულისცემის მნიშვნელოვანი შემცირება (4,5%) გამოვლინდა. ეს მნიშვნელოვანია, რადგან ოპერაციის შემდეგ გულისცემის ჯანსაღ დიაპაზონში შენარჩუნება გამოჯანმრთელებისთვის საჭირო ჟანგბადისა და საკვები ნივთიერებების ეფექტიან ცირკულაციას უზრუნველყოფს.

მუსიკით უფრო მარტივი გადასვლა

კვლევის უფროსი ავტორის, Dr. Eldo Frezza-ს თქმით, ოპერაციის შემდეგ მუსიკის მოსმენამ გამოღვიძებისა და ჩვეულ მდგომარეობაში დაბრუნების გარდამავალი ეტაპი შეიძლება გააადვილოს. მუსიკა პაციენტებს ნაკლები სტრესის განცდაში ეხმარება. რადგან მოსმენა მედიტაციის ან Pilates-ის მსგავს აქტიურ თერაპიას არ მოითხოვს, იგი უფასო და ძალისხმევის გარეშე გამოსაყენებელი მეთოდია, რომელიც პაციენტს დაუყოვნებლივ შეიძლება შესთავაზონ.

პირველმა ავტორმა Shehzaib Raees-მა მუსიკის მარტივ, მაგრამ ეფექტიან ძალას გაუსვა ხაზი: „მუსიკის მოსმენისას შეგიძლიათ მოდუნდეთ და ყურადღება გადაიტანოთ. ამგვარად, კონცენტრაციის საჭიროების გარეშე შეგიძლიათ საკუთარი თავი დაამშვიდოთ“.

მკვლევართა თქმით, მუსიკამ კორტიზოლის შემცირებით გამოჯანმრთელებას შეიძლება შეუწყოს ხელი. მომავალი კვლევები ოპერაციის შემდეგ და ინტენსიური თერაპიის განყოფილებაში მუსიკის გამოყენების საპილოტე პროგრამების დაწყებას ისახავს მიზნად.

Dr. Frezza-ს რჩევა მარტივია: როდესაც ოპერაციის შემდეგ თავს კარგად იგრძნობთ, საყვარელ მუსიკას მოუსმინეთ. მას ადამიანისთვის ნაცნობი და დამამშვიდებელი გარემოს განცდის შექმნა შეუძლია.

კვლევა მუსიკის გამოჯანმრთელებაზე დადებითი გავლენის მნიშვნელოვან მონაცემებს იძლევა და აჩვენებს, რომ ოპერაციის შემდგომ ზრუნვაში იგი მარტივ, მაგრამ ეფექტიან ინსტრუმენტად შეიძლება განვიხილოთ.