პასუხობს თუ არა ChatGPT კიბოს მქონე პაციენტების კითხვებს სწორად და დამაკმაყოფილებლად?

კიბოს დიაგნოზის მქონე ადამიანებისთვის ინფორმაციაზე წვდომა უაღრესად მნიშვნელოვანია მკურნალობისას შფოთვის შესამცირებლად და სწორი გადაწყვეტილებების მისაღებად. ბევრი პაციენტისა და ახლობლის აზრით, დიაგნოზის შემდეგ ერთ-ერთი უმთავრესი საჭიროება დაავადების შესახებ ინფორმაციის მიღებაა. თუმცა ინტერნეტის მსგავს უზარმაზარ წყაროთა აუზში სწორი ინფორმაციის მოძიება რთული და შეცდომაში შემყვანი შეიძლება იყოს.

GPT-ით შეცვლილი მსოფლიო

ბოლო 2 წელიწადში ChatGPT-ის მსგავსი დიდი ენობრივი მოდელების გამომყენებელი ახალი თაობის ხელოვნური ინტელექტის ჩატბოტები ამ პრობლემის გადაჭრასა და პაციენტებისთვის საჭირო ინფორმაციის სწრაფად მიწოდებას ცდილობს. მაგრამ რამდენად სწორად პასუხობს ხელოვნური ინტელექტი ჯანმრთელობის სერიოზულ პრობლემებზე დასმულ კითხვებს?

ექიმმა Jharna Patel-მა და მისმა ჯგუფმა, გინეკოლოგიური ონკოლოგიის საზოგადოების 2024 წლის ქალთა კიბოს შეხვედრაზე(Society of Gynecologic Oncology’s (SGO) 2024 Annual Meeting on Women’s Cancer), აჩვენა, რომ ხელოვნურ ინტელექტზე დაფუძნებულ ჩატბოტ ChatGPT-ს (ვერსია 3.4) გინეკოლოგიურ კიბოებზე გენეტიკური კონსულტაციის ხშირ კითხვებზე სწორი და დამაკმაყოფილებელი პასუხების გაცემა შეუძლია.

ეს კვლევა ხაზს უსვამს ხელოვნური ინტელექტის კიბოს მქონე პაციენტების შფოთვის შემცირებისა და მათი ინფორმირების პოტენციალს.

ხელოვნური ინტელექტი, რომელიც ადამიანების ციფრულ სამყაროში გაზიარებულზეა გაწვრთნილი

დიდ ენობრივ მოდელებს, რომელთაც ChatGPT უძღვება, შეუძლია ინტერნეტში მილიარდობით ადამიანის მიერ სიტყვების გამოყენებაზე დაკვირვებით ნებისმიერი წინადადების შემდეგი სიტყვის ყველაზე სავარაუდო ვარიანტები იწინასწარმეტყველოს. ChatGPT-ის მსგავს გენერაციულ ხელოვნურ ინტელექტის ჩატბოტებს შემდეგი სიტყვის პროგნოზირებით კითხვებზე ბუნებრივი ენით პასუხებისა და რთული ტექსტების მკაფიო შეჯამებების შექმნა შეუძლია.

კვლევის წამყვანმა ავტორმა, New York University-ის (NYU), Langone Health-ის გინეკოლოგიურმა ონკოლოგმა, ექიმმა Jharna M. Patel-მა პრეზენტაციაში თქვა:

„ჩვენი მონაცემები აჩვენებს, რომ ამ ხელსაწყოს ხშირ კითხვებზე პასუხით პაციენტთა შფოთვის შემცირებისა და მათი ინფორმირების პოტენციალი აქვს. პაციენტებს თავიანთი კიბოს გაგებაში რომ დაეხმაროს, ხელსაწყოს გინეკოლოგიური ონკოლოგებისგან მეტი მონაცემის შეყვანა სჭირდება.“

ხელოვნური ინტელექტის პასუხების შეფასება

GPT-ის შესაძლებლობების შესასწავლად მკვლევრებმა გინეკოლოგიურ ონკოლოგებს მიმართეს, რომ შეერჩიათ პაციენტთა 40 ხშირი კითხვა გენეტიკურ ტესტებსა და გენეტიკური სინდრომების კონსულტაციაზე, პროფესიული საზოგადოებების წესების შესაბამისად.

შერჩეული კითხვების ChatGPT-ისთვის დასმის შემდეგ კვლევაში მონაწილე გინეკოლოგიურმა ონკოლოგებმა ჩატბოტის პასუხები 1-დან 4-მდე შკალით შეაფასეს. ქულები ნიშნავდა:

• 1 ქულა: სწორი და ამომწურავი
• 2 ქულა: სწორი, მაგრამ არა ამომწურავი
• 3 ქულა: ნაწილობრივ სწორი და ნაწილობრივ მცდარი 
• 4 ქულა: სრულიად მცდარი   

თითოეული ქულის მიმღები პასუხების წილი გამოითვალა მთლიანობაში და კითხვების თითოეულ კატეგორიაში.

შეფასების შედეგად პასუხების წილი ასეთი იყო:

• სწორი და ამომწურავი პასუხებისთვის 82,5% (n=33)
• სწორი, მაგრამ არა ამომწურავი პასუხებისთვის 15% (n=6)
• ნაწილობრივ მცდარი პასუხებისთვის 2,5% (n=1)
• სრულიად მცდარი პასუხებისთვის 0%

გენეტიკური კონსულტაციის კატეგორიას ChatGPT-ის მიერ შექმნილი სწორი და ამომწურავი პასუხების ყველაზე მაღალი წილი ჰქონდა. ჩატბოტმა 20-ვე კითხვაზე 100% სისწორე აჩვენა. ChatGPT ისეთივე წარმატებული იყო კონკრეტულ გენეტიკურ დარღვევებზე პასუხისასაც. მაგალითად, გინეკოლოგიურმა ონკოლოგებმა თქვეს, რომ ზოგი კიბოს გამომწვევად ცნობილი BRCA1 ან BRCA2 გენის მუტაციების შესახებ პასუხების 88,2% (n = 15/17) სწორი და სრული იყო, ხოლო ლინჩის სინდრომზე პასუხების 66,6% (n = 2/3) სწორი აღმოჩნდა.

დასკვნა

მოსალოდნელია, რომ GPT-ის მსგავსი ახალი თაობის ხელსაწყოების მეტი მონაცემით წვრთნის გაგრძელებითა და უკეთესი კითხვების დასმის სწავლით შედეგები კიდევ გაუმჯობესდება. ინფორმატიკის სპეციალისტების მიზანია, მზადყოფნისას ის კლინიკაში ჯანდაცვის პროფესიონალთა დასახმარებლად დანერგონ.

შედეგად, ხელოვნური ინტელექტის ჩატბოტებმა შეიძლება პაციენტთა ინფორმაციაზე წვდომის გამარტივებით მკურნალობის პროცესი გააუმჯობესოს და შფოთვა შეამციროს. თუმცა საჭიროა ამ ხელსაწყოების შემდგომი განვითარება და ჯანდაცვის პროფესიონალებთან თანამშრომლობით გამოყენება.