ფინანსური ნავიგაცია ონკოლოგიაში — შეიძლება ახალი კარიერა იყოს?

ბოლო 10 წლის განმავლობაში ონკოლოგიურ მომსახურებაში ფინანსური ნავიგატორების საჭიროება გაჩნდა. კვლევებისა და გამოსაცდელი წამლების სიმრავლის გამო ეროვნული და საერთაშორისო დამტკიცება შეიძლება დაგვიანდეს და ხანდახან მკურნალობის ხარჯი პაციენტსა და ოჯახს მძიმე მდგომარეობაში აყენებს. სპეციალური ქირურგიული და ტექნოლოგიური მხარდაჭერის საჭიროების მქონე ზოგი მკურნალობა მხოლოდ შერჩეულ საავადმყოფოებში ტარდება და დამატებითი გადასახადის დაფარვა პაციენტებსა და ოჯახებს შეიძლება მთელ მსოფლიოში, ისევე როგორც ჩვენს ქვეყანაში, მოუხდეთ. კერძო თუ სპეციალიზებულ საავადმყოფოებში საწოლის დამატებითი საფასური, ექიმისა და მკურნალობის ხარჯები მომსახურების მიმღებებსა და მიმწოდებლებს რთულად სამართავ მდგომარეობაში აყენებს. ამიტომ მსოფლიოში ახალი მომსახურების სფერო წარმოიშვა.
გვინდა აღვნიშნოთ, რომ ჩვენს ქვეყანაშიც ამ მომსახურების საჭიროება სწრაფად გაიზრდება, ყურადღება მივაპყროთ კიბოს მკურნალობაში ფინანსურ ნავიგაციას და აშშ-ში გამოქვეყნებული სახელმძღვანელო გაგაცნოთ.
აშშ-ის ზოგი საავადმყოფო სპეციალურ ფინანსურ ნავიგატორს გამოყოფს, მაგრამ ბევრ ონკოლოგიურ ცენტრში ამ როლს კვლავ ონკოლოგიური ექთნები და სოციალური მუშაკების მსგავსი გუნდის წევრები ასრულებენ.
აშშ-ის საზოგადოებრივი ონკოლოგიური ცენტრების ასოციაციამ [Association of Community Cancer Centers (ACCC)] ახალი გზამკვლევი გამოაქვეყნა იმის შესახებ, როგორი უნდა იყოს პაციენტებისა და ახლობლებისთვის ფინანსური ნავიგაცია ონკოლოგიაში და რა კვალიფიკაცია სჭირდებათ ამ საქმიანობის შემსრულებლებს.
ფინანსური ნავიგაცია „ახალი კარიერული გზაა“, რომელსაც „ხელმძღვანელობა და მიმართულების მიცემა“ სჭირდება.
ამ საქმიანობის ყველა მონაწილე დაინახავს, რომ კიბოს მკურნალობისა და დამხმარე მომსახურებების მიღება ხშირად ძვირია. ACCC-ის მიდგომით, შესაბამისი სპეციალისტი სამუშაო გარემოსა და პაციენტების ჯგუფის მიხედვით უნდა იყოს კვალიფიციური ფინანსური ნავიგაციისა და კონსულტაციის გასაწევად. მინიმუმ ბიზნესის, სიცოცხლის მეცნიერებების ან ფინანსების ბაკალავრის ხარისხი და დაზღვევის წესებისა და რეგულაციების გარკვეული ცოდნა უნდა ჰქონდეს.
ამ სფეროში ფინანსურ დამხმარედ წოდებულ თანამშრომელს ასევე შესაბამისი უნარი და ონკოლოგიური პრაქტიკის საფუძვლების 1-3 წლის გამოცდილება უნდა ჰქონდეს.
ACCC-ის ერთ-ერთი მთავარი რეკომენდაციაა, რომ ყველა ონკოლოგიურ პროგრამასა თუ პრაქტიკას ფინანსური მხარდაჭერის მომსახურება ჰქონდეს.
მკურნალობის მრავალფეროვნების ზრდა, ახალი მეთოდების სიძვირე, დაზღვევის განსხვავებული ტიპებით გართულებული მოვლა და პაციენტზე მეტი ხარჯის გადასვლა ამ როლს უდავოდ აუცილებელს ხდის. სპეციალისტებმა უნდა იცოდნენ პაციენტის დაზღვევის შესაძლებლობების საუკეთესო გამოყენება; ეკონომიკური ბარიერების შესამცირებლად ფინანსური დახმარების ინსტრუმენტებსა და წყაროებსაც უნდა იცნობდნენ.
ფინანსურ დამხმარეებს ასევე უნდა შეეძლოთ პაციენტისა და ოჯახის დასახმარებლად ახსნან, რას ფარავს დაზღვევა. მათ ყველა მომსახურების ურთიერთქმედებაც უნდა აკონტროლონ და აღწერონ. კიბოს მოვლის მიმწოდებლები გადახდისას საჭირო ოფიციალურ პროცედურებსაც უნდა იცნობდნენ. გუნდის ერთი წევრი მაინც დიაგნოზის დასმისას და მკურნალობამდე უნდა შეხვდეს პაციენტსა და ოჯახს/მომვლელს, რათა განიხილონ დაზღვევის შესაძლებლობები, მოსალოდნელი მკურნალობის ხარჯი და დახმარების პროგრამები.
იმავე წევრმა ან წევრებმა მოვლის მთელი პერიოდის განმავლობაში პაციენტები უნდა ნახონ ან სულ მცირე კავშირი შეინარჩუნონ.
მრავალი საორიენტაციო პირობის შემცველი სახელმძღვანელო საკითხს დეტალურად განიხილავს და პროფესიონალების მიერ ამ სფეროს ჩამოყალიბების მიზეზებს ასაბუთებს. ჩვენს ქვეყანაში კერძო დაზღვევის მქონე პაციენტებისა და სპეციალურ პირობებში კიბოს მკურნალობის მიმწოდებელი დაწესებულებების რაოდენობა იზრდება. დროა, საავადმყოფოებმა ასეთი მომსახურება პროფესიონალურად ააწყონ. თუ პაციენტები და ოჯახები თავიდანვე შეაფასებენ მთელი პროცესის დამატებით ეკონომიკურ ხარჯებს, მომავალ სირთულეებს თავიდან აიცილებენ.
შეიძლება დაგაინტერესოთ
- როგორი უნდა იყოს პაციენტის, ახლობლისა და ექიმის კომუნიკაცია?
- კიბოს პაციენტის უფლებების ევროპული დეკლარაცია — მიღებული გაკვეთილები და რჩევები პაციენტებსა და ახლობლებს
- როგორი უნდა იყოს კომუნიკაცია კიბოს დროს სიცოცხლის ბოლოს? უნდა ვისაუბროთ სიკვდილზე?
- კიბოს პაციენტების მომვლელები არ უნდა დაგვავიწყდეს — თანმხლებთა მხარდაჭერის 4 გზა
წყაროები
medscape.com - by Pam Harrison - April 03, 2018
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.