რატომ იკლებენ კიბოს პაციენტები წონას? კიბოს კახექსია
კიბოსა და მკურნალობასთან დაკავშირებული გვერდითი მოვლენები პაციენტებისა და ექიმებისთვის ერთ-ერთი მთავარი სირთულეა. კიბოთი სიკვდილის მიზეზებს შორის სეფსისის (ინფექციით გამოწვეული მრავლობითი ორგანული უკმარისობის) შემდეგ მეორე ადგილზე კახექსიაა!
კახექსია კიბოს პაციენტებში წონის კლებით მიმდინარე მდგომარეობაა, რომელიც ჩვეულებრივი კვებითი მხარდაჭერით ვერ შებრუნდება. ბოლო კვლევებით დადგინდა მისი კავშირი ანორექსიასთან (საკვების შემცირებულ მიღებასთან) და მას კიბოს ანორექსია-კახექსიის სინდრომი ეწოდა.
კიბოს ანორექსია-კახექსიის სინდრომის განვითარება მრავალ ფაქტორზეა დამოკიდებული. ყველაზე მნიშვნელოვანი ნიშანია კუნთების კარგვასთან ერთად ცხიმოვანი ქსოვილის დარღვევა. უნებლიე წონის კლებასთან ერთად პაციენტებს მადა ეკარგებათ, რაც ცხოვრების ხარისხს ამცირებს.
შორსწასულ ეტაპებზე კიბოს ანორექსია-კახექსიის სინდრომი მეტი ჭამით ან კვებითი დანამატებით სრულად ვერ იკურნება. წონის პროგრესული კლება ყოველდღიური საჭიროებების დაკმაყოფილებას ართულებს. ადრეულ ეტაპზე იცვლება საკვების მიღება, წონა მცირედ იკლებს და მადა იცვლება. პროგრესირებისას პაციენტი უფრო მეტ წონას კარგავს და ნაკლებს ჭამს. კუნთების კარგვა თვალსაჩინო ხდება და ვითარდება ჩვეულებრივი მკურნალობისა და კვებითი მხარდაჭერისადმი რეზისტენტული მდგომარეობა.
კიბოს ანორექსია-კახექსიის ბიოქიმიური მექანიზმები ჯერ სრულად არ გარკვეულა. ამ სიმსივნესთან დაკავშირებულ სინდრომზე მიმართული პრეპარატი ამჟამად არ არსებობს.
სინდრომი ყველაზე ხშირად პროგრესირებული დაავადების მქონე ადამიანებში გვხვდება. მისი განვითარება კიბოს ტიპზეა დამოკიდებული. კუჭ-ნაწლავის, პანკრეასის, ფილტვისა და კოლორექტალური კიბოების 50 -85 პროცენტში წონის კლება მკურნალობის დაწყებამდე ვლინდება. მხოლოდ ამერიკის შეერთებულ შტატებში 1.3 მილიონზე მეტ ადამიანს აქვს კიბოს ანორექსია-კახექსია.
დასკვნის სახით;
- კიბოს ანორექსია-კახექსია წონისა და კუნთების კარგვით მიმდინარე სინდრომია, რომელიც პაციენტების ცხოვრების ხარისხს ამცირებს.
- კიბოს პაციენტების ნახევარზე მეტში გვხვდება ანორექსია-კახექსიის სინდრომი.
- კიბოს ანორექსია-კახექსია კიბოთი გამოწვეული ყველა სიკვდილის 20 პროცენტზეა პასუხისმგებელი.
ჩვენი შემდეგი წერილი იქნება „კიბოს კახექსიის მკურნალობის უახლესი მიღწევების“ შესახებ.
წყაროები
Cancer cachexia: impact, mechanisms and emerging treatments.
J Cachexia Sarcopenia Muscle 2013;4:95–109.
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.