რომელ დაავადებებში ცდიან კრაზანას ჩაისა და ზეთს?

კრაზანას სხვა სახელები

• ხმლის ბალახი
• ბუასილის ბალახი
• ჯადოქრის ბალახი
• Saint John's wort
• Hypericum perforatum (სამეცნიერო სახელწოდება)

რა არის კრაზანა?

კრაზანა მცენარეა, რომელიც სავარაუდოდ ევროპიდან, დასავლეთ აზიიდან და ჩრდილოეთ აფრიკიდან მოდის, დღეს კი მსოფლიოს ბევრ ადგილასაა გავრცელებული. მედიცინაში ერთ-ერთი ყველაზე შესწავლილი მცენარეა. ყვავილოვანი ზედა ნაწილები სამკურნალო თვისებებითაა ცნობილი და თავის ტკივილის, თირკმლის პრობლემებისა და ნევროლოგიური დაავადებებისთვის ასეულწლიანი ისტორია აქვს. ტრადიციულ მედიცინაში ჩაისა და ზეთის სახით მიიღება. ამერიკის მკვიდრი მოსახლეობა ჭრილობის შესახორცებლად, გველის ნაკბენის, ტილების და დიარეის დროსაც იყენებდა. დღეს განსაკუთრებით ევროპაში ანტიდეპრესანტად, შფოთვის შესამცირებლად, ძილისა და სეზონური ემოციური აშლილობის სამკურნალოდ გამოიყენება.

რა არის მისი გამორჩეული სამედიცინო თვისებები?

კრაზანამ დეპრესია შეიძლება შეამსუბუქოს. თუმცა მას შეუძლია მრავალი წამლის, მათ შორის ქიმიოთერაპიის, ეფექტიანობის შემცირება! ადამიანებსა და ცხოველებზე კვლევებით დეპრესიის წინააღმდეგ მნიშვნელოვნად ეფექტიანი და კარგად ასატანი მცენარეული წამალია (ფიტოთერაპია). ქალებში მენსტრუაციამდელი ტკივილისა და მუცლის ჩივილების შემსუბუქებასაც შეიძლება დაეხმაროს.

სამედიცინო ეფექტებს მის შემადგენელ ჰიპერიკუმს (hypericum), ჰიპერიცინს (hypericin) და ჰიპერფორინს (hyperforin) უკავშირებენ. ცხოველებზე კვლევებში ნეიროპროტექტორული (ნერვული სისტემის დამცავი) ეფექტები გამოვლინდა, თუმცა მეტი კვლევაა საჭირო.

რომელი დაავადებების სამკურნალოდ ცდიან კრაზანას?

დეპრესიის მკურნალობაში

ადამიანებზე მრავალი კვლევა დეპრესიისთვის გამოყენებას მხარს უჭერს. SSRI ჯგუფის ანტიდეპრესანტების მსგავსად ტვინში სეროტონინის გაზრდით ანტიდეპრესანტულ ეფექტს ავლენს.

შფოთვის მკურნალობაში

დეპრესიის ეფექტიანი შედეგების მიუხედავად შფოთვის მკურნალობაზე მნიშვნელოვანი კვლევა არ ჩატარებულა.

ქრონიკული დაღლილობის მკურნალობაში

ზოგი კვლევა გამოყენებას მხარს უჭერს, თუმცა მეტი კვლევაა საჭირო.

უძილობის მკურნალობაში

ამ მიზნით გამოყენების მტკიცებულება არ არსებობს.

მენსტრუაციასთან დაკავშირებული ჩივილების (პრემენსტრუალური სინდრომის) შესამცირებლად

კლინიკურმა კვლევებმა მენსტრუაციამდელი სიმპტომების შემცირება აჩვენა. არსებობს მენოპაუზის წამოხურების შემცირების მაჩვენებელი კვლევებიც.

სეზონური განწყობის აშლილობის მკურნალობაში

დღემდე ჩატარებული რამდენიმე კვლევა აჩვენებს, რომ ამ მიზნით ეფექტიანი არ არის.

ადგილობრივად (კრემად), ჭრილობის შესახორცებლად

ლაბორატორიაში კრაზანა ანტიბიოტიკურ და ანტივირუსულ აგენტად მოქმედებს, თუმცა კლინიკურად ჭრილობის შეხორცებისთვის დახმარების მტკიცებულება არ არსებობს.

HIV ინფექცია AIDS დაავადება

მცირე რაოდენობის კვლევებმა მაღალი ტოქსიკურობა (გვერდითი ეფექტი) და სარგებლის არქონა აჩვენა.

ყურადღების დეფიციტის / ჰიპერაქტიურობის აშლილობა

მცირე რაოდენობის კვლევამ აჩვენა, რომ კრაზანა ამ აშლილობისთვის ეფექტიანი არ არის.

გაფრთხილებები კრაზანას გამოყენების მსურველებისთვის

• კრაზანამ კანი მზისადმი უფრო მგრძნობიარე შეიძლება გახადოს.
• მას ქიმიოთერაპიის ეფექტის შემცირება და რადიოთერაპიის კანის გვერდითი ეფექტების გაზრდა შეუძლია.
• პაციენტებმა ოპერაციამდე, ქიმიოთერაპიამდე ან რადიოთერაპიამდე კრაზანა არ უნდა გამოიყენონ.
• სხვა დანიშნულ ანტიდეპრესანტებზე კრაზანას დამატებით ორგანიზმში სეროტონინის ჭარბმა დაგროვებამ მძიმე მდგომარეობა შეიძლება შექმნას.
• თუ გამოყენებისას უჩვეულო ტკივილი, ჩხვლეტა, შეუხორცებელი ჭრილობები, კანის ან თვალების სიყვითლე გაჩნდება, ექიმს დაუყოვნებლივ დაუკავშირდით.

არ გამოიყენოთ შემდეგ შემთხვევებში

• თუ ორსულად ხართ ან ძუძუთი კვებავთ
• თუ ჩასახვის საწინააღმდეგო აბს იღებთ: კრაზანამ ორსულობის რისკი შეიძლება გაზარდოს.
• თუ რადიოთერაპიას იტარებთ: კრაზანამ ეფექტი შეიძლება შეამციროს.
• თუ ქიმიოთერაპიას იტარებთ: კრაზანამ მისი ეფექტი შეიძლება შეამციროს.
• თუ მეთოტრექსატს იღებთ: კრაზანამ წამლის ტოქსიკურობა შეიძლება გაზარდოს.
• თუ ოპერაცია გელით: წინასწარ უნდა შეწყვიტოთ.
• თუ სისხლის გამათხელებელს ან სხვა ანტიკოაგულაციურ მკურნალობას იღებთ: კრაზანამ მოქმედება შეიძლება გაზარდოს ან შეამციროს.
• თუ გულის უკმარისობის ან რიტმის პრობლემების წამლებს იღებთ: კრაზანამ ეფექტები შეიძლება შეამციროს.
• თუ დეპრესიის და / ან შფოთვის წამალს იღებთ: კრაზანას დამატებითი ეფექტი შეიძლება ჰქონდეს და სეროტონინის დაგროვებით გვერდითი ეფექტები გამოიწვიოს.
• თუ ბიპოლარული აშლილობა გაქვთ: რამდენიმე ასეთ პაციენტში მცენარემ ჩივილები გააძლიერა.
• თუ შაკიკის ან კლასტერული თავის ტკივილის წამლებს იღებთ: კრაზანას სხვადასხვა ეფექტი შეიძლება ჰქონდეს და ტკივილი გაზარდოს.
• თუ მაღალი წნევის (ჰიპერტენზიის) წამალს იღებთ: კრაზანამ მათი მოქმედება შეიძლება შეამციროს ან გაზარდოს.
• თუ დიაბეტის წამალს იღებთ: კრაზანამ მისი ეფექტიანობა შეიძლება შეამციროს.
• თუ იმუნოსუპრესიულ (იმუნიტეტის დამთრგუნველ) ან AIDS-ის მკურნალობას იღებთ: კრაზანამ ამ წამლების ეფექტი შეიძლება შეამციროს.
• თუ ქოლესტერინის დამაქვეითებელ წამალს იღებთ: კრაზანამ ეფექტი შეიძლება შეამციროს.
• თუ ხველის დამთრგუნველ ან ალერგიის წამალს იღებთ: კრაზანამ ეფექტი შეიძლება შეამციროს.

შესაბამისად კრაზანა მსუბუქი დეპრესიის მკურნალობასა და პრემენსტრუალური ჩივილების შემცირებაში შეიძლება დაგეხმაროთ, თუმცა მრავალ წამალთან ურთიერთქმედების გამო აუცილებლად მიმართეთ ექიმსა და ფარმაცევტს, მიუთითეთ მიღებული მკურნალობა და წამლები.