შეიძლება ქავილი ძუძუს კიბოს ნიშანი იყოს?
ამ სტატიაში
ძუძუსა და დვრილის ქავილი ქალებში ხშირია, თუმცა ზოგადად ძუძუს ქავილს ძუძუს ანთებითი კიბოს ნიშნად ვერ მივიჩნევთ. ეს ძუძუს კიბოს ტიპი ძალიან გავრცელებული არ არის, თუმცა რისკების გათვალისწინებით შეშფოთება მაინც შეიძლება გაჩნდეს. ძუძუს ანთებითი კიბოს ნიშნები სხვა ტიპების უმრავლესობისგან შეიძლება განსხვავდებოდეს.
როდის შეიძლება ძუძუს ქავილი კიბოს ნიშანი იყოს?
თუ ძუძუში ჩვეულებრივისგან განსხვავებულ ქავილს გრძნობთ, ეს მდგომარეობა სამედიცინოდ უნდა შეფასდეს.
თუ ქავილს შემდეგი ნიშნებიც ახლავს, სასურველია ექიმთან რაც შეიძლება მალე გაიაროთ შემოწმება:
- რომელიმე ძუძუს სიწითლე
- ძუძუს ქსოვილის ცვლილება; მაგალითად, ფორთოხლის ქერქის შესახედაობა
- ძუძუს შეშუპება და უეცარი ზრდა, რომელიც სქესობრივ მომწიფებას ან წონის მატებას არ უკავშირდება
- ძუძუს ტემპერატურის მომატება
- ძუძუს გამაგრება
ეს სიმპტომები და ნიშნები შეიძლება ძუძუს ანთებითი კიბოს რისკზე მიუთითებდეს. ქვემოთ მოცემულ სურათზე ტიპური ძუძუს ანთებითი კიბოს გამოსახულებაა წარმოდგენილი.
გარდა ამისა, ძუძუთი შემოფარგლული ან არეოლისკენ (დვრილის გარშემო) გავრცელებული ქავილი, ძუძუს პეჯეტის დაავადებად წოდებულ იშვიათ ძუძუს კიბოზე შეიძლება მიუთითებდეს. ამ ტიპის დროს ჩვეულებრივ არის წითელი, გასქელებული ქსოვილი და ზოგჯერ ქერქით დაფარული დაზიანება. მან შეიძლება ტკივილი ან ქავილი გამოიწვიოს, დვრილი დეფორმირდეს ან შიგნით ჩაიწიოს.
ძუძუს ანთებითი კიბო ყველა ძუძუს კიბოს %3-ს, პეჯეტის დაავადება კი %1-ს შეადგენს
ძუძუს ქავილის უვნებელი მიზეზები
- ძუძუს ინფექციები (მასტიტი): ხშირად გვხვდება მეძუძურ ქალებში; ძუძუს ინფექციის ნიშნები შეიძლება იყოს ტკივილი, სიწითლე და ქავილი. მასტიტის სამკურნალოდ შესაძლოა ანტიბიოტიკი გახდეს საჭირო. თუ მკურნალობის შემდეგ გაუმჯობესება არ ჩანს, მაშინ ძუძუს კიბოს შესაძლო არსებობა მოწმდება.
- დერმატოლოგიური: ქავილის კიდევ ერთი მიზეზი შეიძლება იყოს კანის დერმატოლოგიური რეაქცია იმაზე, რასაც ბოლო დროს შეეხო. მიზეზი შეიძლება იყოს ტანსაცმელი, სარეცხი საშუალება, სუნამო, ლოსიონი ან საპონი. რეკომენდებულია შეძლებისდაგვარად უსუნო პროდუქტების გამოყენება და კანის დატენიანება. ყურადღება მიაქციეთ, რომ ტანსაცმელზე სარეცხი საშუალების ნარჩენი არ იყოს.
- სოკოვანი ინფექცია: კანის ნებისმიერ უბანზე სოკოვანი ინფექცია ქავილს იწვევს. ის შეიძლება მჭიდრო ტანსაცმელთან, ტენიანობასთან ან ჰაერგაუმტარ საცვლებთან იყოს დაკავშირებული. შესაძლოა ექიმთან მისვლა და სოკოს საწინააღმდეგო წამლის გამოყენება დაგჭირდეთ. კანი შეძლებისდაგვარად მშრალად შეინარჩუნეთ და ბამბის, არამომჭერი საცვალი აირჩიეთ.
- ოპერაციის შემდგომი რეაქცია: ძუძუს ოპერაციის შემდეგ შეხორცებისას ქავილი შეიძლება იყოს. განსაკუთრებით იმპლანტის (სილიკონის) დროს კანი იწელება და ქავილი ძლიერდება. თუმცა ასეთ შემთხვევებში ის მუდმივი არ არის. თუ რამდენიმე თვეში ქავილი არ გაივლის, ექიმს მიმართეთ.
- სხვა კეთილთვისებიანი მდგომარეობები: წონის მატება, სქესობრივი მომწიფება და ორსულობა ჩვეულებრივ ძუძუს ზრდას იწვევს და კანის გაჭიმვისას ქავილი შეიძლება გაჩნდეს. იშვიათად ბიუსტჰალტერის რკალებში არსებულმა ნიკელმა ზოგ ქალში ალერგიული რეაქციაც შეიძლება გამოიწვიოს. შესაძლებელია რკალების გარეშე ბიუსტჰალტერის გამოყენება.
ძუძუს ქავილი უმეტესად ძუძუს კიბოს ნიშანი არ არის. თუმცა სწორი შეფასებისთვის ექიმთან მისვლა მნიშვნელოვანია. ასევე მნიშვნელოვანია ასაკის შესაბამისი სიხშირით მამოგრაფიის ჩატარება.
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.