2017 Onkologiya Elm Mükafatı leykemiya müalicəsində yeni dövr açan kəşfinə görə Dr. Drukerə verildi

Xroniki mieloid leykemiya KML müalicəsində yeni dövr açan və minlərlə xəstə ilə ailəsinə ümid olan İmatinib adlı dərmanın hazırlanması və təsdiqlənməsində rol oynamış Brian J Drukerə Amerika Klinik Onkologiya Cəmiyyətinin — ASCO-nun Elm Mükafatı verilib.

Onkologiya Elm Mükafatı (Science of Oncology Award and Lecture) xərçəng elminə mühüm töhfə vermiş alimlərə verilən mükafatdır. Bu mükafat ASCO tərəfindən 2005-ci ildən hər il verilir.

Imatinib xroniki mieloid leykemiyanı (KML) nəzarətə almağa imkan verən zülal inhibitorudur. KML həyat itkisi ilə nəticələnə bilən xəstəlik olduğu halda, bu dərman sayəsində nəzarətə alına bilən xəstəliyə çevrilib. 1970-ci illərdə 5 illik sağqalım %20-dən aşağı olduğu halda, Imatinibin kəşfindən sonra %60-dan yuxarı qalxıb. Bu nisbət aqressiv gedişli xroniki leykemiya xəstələri üçün yeni dövr açan irəliləyiş olub. Həmçinin İmatinib Amerika Qida və Dərman İdarəsinin (FDA) tarixində ən sürətli təsdiq alan dərman olub.

Dr. Brian J Druker yalnız İmatinibi kəşf etməyib, bu tədqiqatı ilə həm də hədəfə yönəlmiş müalicə anlayışını irəli sürüb. Bu anlayış onkologiyada fərdiləşdirilmiş müalicə tətbiqinə istiqamət verib və çoxsaylı hədəflənmiş müalicənin onkoloji praktikada istifadəsinə yol açıb. Bu baxımdan Dr. Brian J Drukerin kəşfi xərçəng xəstələrinə ümidverici xarakterdə mühüm tədqiqatdır.

Həkimlərin ən böyük motivasiyası xəstələrin onlara olan inamıdır…

Dr. Druker ASCO Daily News-a müsahibəsində belə izah edir:

“Karyerama xəstələrimin həyatında fərq yaratmaq ümidi ilə başladım. Xəstəlikləri üçün daha yaxşı müalicələrə ehtiyac duyan leykemiya xəstələrimin olması mənə cəsarət verdi. Xəstələrin həkimlərinə inamı fövqəladədir və bu inam karyeramın ən çətin vaxtlarında mənə kömək edib.”

Xərçəng hüceyrələrinin normal hüceyrələrdən fərqlərini hədəfləmək

“Normal hüceyrələrə zərər vermədən xərçəng hüceyrələrini məhv edə bilən yol olduğuna və cavabın elmi xərçəng araşdırmaları ilə tapıla biləcəyinə həmişə inanmışam. Bu tədqiqat həm də biz onkoloqların daha təsirli və daha az zərərli müalicələr hazırlaya biləcəyimizə inanmağımızı təmin edib.”

“Leykemiyanı nəzarətə alına bilən xəstəlikdən necə müalicə edilə bilən xəstəliyə çevirə biləcəyimizi araşdırmağa davam edirik. Hazırda diqqətimizi daha mürəkkəb xəstəlik olan kəskin mieloid leykemiyaya yönəltmişik.”

Brian J Druker JELD-WEN Leykemiya Araşdırmaları rəhbəri və Howard Hughes Tibb İnstitutunda tədqiqatçıdır.

Biz də Türkiyə onkologiyasına əmək verən həkimlər olaraq Dr. Drukerin KML üçün apardığı bu tədqiqatı ürəkdən dəstəkləyir və minlərlə xəstəmiz adından təbrik edirik.