Xərçəng diaqnozlu sevdikləriniz üçün Sevgililər Gününə 7 gözəl hədiyyə fikri

14 fevral Sevgililər Günü dünyada qeyd olunan, sevgiliyə, həyat yoldaşına ayrılan xüsusi gündür. Zərif restoranda yemək, şokoladla dolu hədiyyə kimi seçimlər əvvəlcədən nəzərdən keçirilmiş ola bilər. Lakin xərçəng müalicəsi alan və ya almış sevdiyiniz şəxs üçün bunların əvəzinə alternativ seçimləri düşünmək yerinə düşər. Bəzən hətta evdən çıxa bilməyə bilərsiniz və hədiyyə məsələsində bir qədər yaradıcı olmağınız lazım gələ bilər. Bu xüsusi gün üçün sizə bəzi fikirlər hazırladıq.

1- Sevgi məktubu yazın. Sevgilinizə çox aşiq olduğunuz vaxtları yenidən düşünün. Xərçəngdən əvvəlki günlərinizi xatırlayıb sevgi dolu hisslərinizi yazın. Ağ kağızla başlaya bilərsiniz. Onu ürək şəklində kəsə və ya öz sevgi kartınızı hazırlaya bilərsiniz. Qırmızı qələmdən və ya sevdiyiniz rəngdən istifadə edin. Seçəcəyiniz sözlər və mənaları mühümdür.

Sevdiyiniz şair və ya yazıçının bəyəndiyiniz sözünü də yazdıqlarınıza əlavə edə bilərsiniz. Unutmayın, söz uçur, yazı əbədi qalır.

2- Yataqda səhər yeməyindən həzz alın. Bir qədər klişe görünsə də, adətən hər kəsin xoşuna gəlir və çox tez-tez etmirsinizsə, xoş sürpriz ola bilər. Xərçəng kimi sağlamlıq vəziyyəti olduqda bu səhər yeməyi mümkün qədər sağlam olmalıdır. Təzə meyvələr, bəlkə bir stəkan təzə sıxılmış portağal şirəsi və sevdiyiniz daha bir-iki yüngül səhər yeməyi qidası ola bilər. Sinidə təzə çiçək olsa, gözəl olar. Çox dəbdəbəli və nümayişkaranə olmasına ehtiyac yoxdur, sadə şəkildə düşünməyiniz kifayətdir.

3- Yumşaq oyuncaq ala bilərsiniz. İstənilən oyuncaq mağazasından və ya supermarketdən sevdiyiniz şəxsin bəyəndiyi heyvanı seçərək kiçik jest edə bilərsiniz. Sadə görünsə də, istədiyiniz kimi gözəl qeyd əlavə edə bilərsiniz. Hər an yanında olan, istilik və xoşbəxtlik verən hədiyyə ola bilər.

4- Bir film seçin. İstər romantik və ya ən sevdiyi döyüş filmi olsun, istər komediya. Həmçinin köhnə türk filmi seçmək istəyə bilərsiniz. İnternetdən və ya televiziya kanallarından bu axşam üçün 2-3 film hazırlayın. Məsələn, klassik sevgi hekayələri Sevgililər Gününü qeyd etməyə kömək edə bilər.

5- Sevgi musiqiləri dinləyin. Sevgililər Gününü qeyd etmək üçün çölə çıxmaq məcburiyyətində deyilsiniz. Evdə dinləmək üçün sevdiyiniz sevgi musiqilərindən pleylist hazırlayın. Sizin öz mahnınız varsa, onunla başlaya bilərsiniz. Musiqi kanallarında "ən yaxşı sevgi mahnıları" və ya "the top 50 love songs" kimi axtararaq hazır siyahılara da çata bilərsiniz. İstəsəniz, OncoTrust Spotify pleylistimizi də sınaya bilərsiniz:

6- Musiqi videoları izləyin. Ən sevdiyiniz mahnıların orijinal videokliplərini izləyə bilərsiniz. Bu mahnıların konsert yazıları varsa, o da xoş ola bilər. Gözəl xatirələriniz olan mahnıları və videoları izləmək özünüzü daha xoşbəxt hiss etdirə bilər.

7- Gündəlik hədiyyə edin. Bir çox dəftərxana mağazasında və ya supermarketdə sadə gündəlik tapa bilərsiniz. Bu hədiyyə sevdiyiniz şəxsin dolduracağı boş kitab kimidir; ona xərçənglə mübarizə zamanı hisslərini və çətinliklərini yazaraq və ya şəkillərlə ifadə etmək imkanı verirsiniz. Hər səhifənin üstünə sual və ya fikir yazaraq ona kömək edə bilərsiniz.

Bunlarla başlaya bilərsiniz:

• Xatırladığım ən gözəl Sevgililər Günü;
• Bu gün hiss etdiyim;
• Ən çox istədiyim;
• Bu günə minnətdaram…

Bu fikirlərdən heç birini etməsəniz də, problem deyil. Ən mühüm olan Sevgililər Gününü sevdiyiniz şəxslə keçirib onu nə qədər çox sevdiyinizi ifadə etməkdir.

Sevmək üçün "ürək",

Davam etdirmək üçün "əmək" gərək,

Sevgi nə Boğazda, nə şam işığında yemək yemək,

Nə də bahalı brilyant demək,

Sevgi bir tikədə iki xoşbəxt insan demək.

(Nazım Hikmet Ran)

Xərçəngli qadın üçün ən gözəl hədiyyə fikirləri