Xərçəng diaqnozu qoyulmuş xəstələrə vaksin vurulmalıdırmı?

Xərçəng xəstələrinin mümkün infeksiyalara qarşı həkim nəzarəti altında vaksinasiya olunması xəstədə ciddi nəticələrə səbəb ola bilən fəsadların qarşısını alır.

İmmunitet sistemi antikorlar yaradaraq infeksiya törədən bakteriya və virus kimi strukturlara qarşı orqanizmimizi qoruyur. Lakin orqanizm xərçəngin yaratdığı antigen kimi strukturları öz antigeni kimi qəbul edir və buna görə də immunitet sistemi qorunmaq məqsədilə işə düşmür. Orqanizmin müdafiə mexanizminin xərçəngə qarşı cavab verməməsinin digər bir səbəbi isə şişin ətrafına ifraz etdiyi immunitet sistemini zəiflədən amillərdir. Bu halda müdafiə mexanizmi zəifləyərək xərçəngin yayılmasının qarşısını almaq üçün kifayət qədər fəaliyyət göstərə bilmir. Həm xərçəngin özü, həm də xərçəng müalicəsi nəticəsində immunitet sistemində yaranan zəifləmə xəstəni infeksiyalara qarşı həssas vəziyyətə gətirir.

Xərçəng xəstələrində müalicə müddətində və müalicədən sonra ən çox rast gəlinən infeksiyaların bir qismi soyuqdəymə nəticəsində inkişaf edir. Müalicədən sonra sağalmısınızsa və ya hazırda müalicə alırsınızsa, mövsümi soyuqdəymə və ya qrip infeksiyası ilə əlaqədar inkişaf edə biləcək bəzi fəsadların yaranma riski mövcud ola bilər. Təəssüf ki, bu fəsadlar xəstədə ölümə qədər çatan ciddi nəticələrə səbəb ola bilər.

Bu səbəbdən xərçəng müalicəsindən sonra sağalmış və ya hazırda müalicə alan şəxslərin mövsümi soyuqdəymə, qrip infeksiyası və donuz qripi kimi xəstəliklərdən qorunması üçün vaksinasiya olunması tövsiyə edilir. Bundan əlavə, bədənin müxtəlif nahiyələrində ciddi infeksion xəstəliklərə səbəb olan pnevmokok kimi tanınan bakteriya növünün 65 yaşdan yuxarı şəxslərdə pnevmoniyaya səbəb ola bildiyi, meningit, orta qulaq iltihabı kimi digər ciddi infeksiyalara yol aça bildiyi məlumdur. Bu səbəbdən bu cür infeksiyalardan qorunmaq üçün 65 yaşdan yuxarı xərçəng xəstələrinə pnevmokok vaksini də əlavə olaraq tövsiyə edilir.

Lakin bu vaksinasiya üçün sizi müntəzəm olaraq müayinə edən və/və ya müalicə edən mütəxəssis həkimin tövsiyəsi vacibdir. Ən doğru olan, vəziyyətinizi yaxından izləyən həkiminizin tövsiyələrinə uyğun hərəkət etməyinizdir. Qızdırma, öskürək, boğaz ağrısı, burun-udlaq axıntısı, baş ağrısı, titrəmə, halsızlıq, ağrı, sızıltı kimi soyuqdəymə əlamətlərindən şübhələndiyiniz halda vaxt itirmədən həkiminizə müraciət edin. Həkiminiz uyğun hesab edərsə, antiviral dərmanlar verərək sizi müalicə edəcəkdir.

Xərçəng xəstəliyinin səbəb olduğu mümkün yan təsirlərdə olduğu kimi, ehtimal olunan infeksiyalara qarşı da tədbir görmək mümkündür. Bu mövzuda sahə üzrə mütəxəssis həkimlərdən əldə ediləcək hər cür məlumat xərçəng xəstələrinin daha şüurlu olmasını təmin edəcəkdir. Bunun sayəsində xəstənin kədərli ola biləcək bəzi nəticələrlə qarşılaşmasının qarşısı alınmış olacaqdır.