2. კიბოს შემდეგ ძირეულად შეცვლილი ცხოვრება — მომღერალ Amelie Beyries-ის ისტორია

კიბოს დიაგნოზის შემდეგ Amelie Beyries-მა იგრძნო, რომ ცხოვრება ხელიდან უსხლტებოდა.

პირველად კიბო 28 წლისას დაუდგინეს. ეგონა, მკურნალობის შემდეგ ყველაფერი უკეთ იქნებოდა, თუმცა ბევრი გაუთვალისწინებელი რამ დაემართა.

კანადაში დაბადებული პოპმომღერალი და ტექსტების ავტორი Beyries (გამოითქმის „ბეი-რის“) 2017 წელს გამოსული Landing ალბომით პოპულარული გახდა. თუმცა მის მომღერლობასა და ავტორობამდე სრულიად განსხვავებული ისტორიაა.

„ავადმყოფობის ყველაზე მნიშვნელოვანი მხარე ის იყო, რომ ჩემი მოწყვლადობა გავაცნობიერე“

Landing მელანქოლიური სიმღერებითაა სავსე: ზოგს ცხოვრების ყველაზე სასოწარკვეთილი საათების სიბნელე ასაზრდოებს, ზოგიც გადარჩენის იმედის ნაპერწკალია. ყოველი ნაწარმოები ტკივილგამოვლილი ქალის ემოციურ სიმძიმეს ატარებს.

„10 წლის წინ რომ გეცნობეთ, საერთოდ არ ვტიროდი“ ამბობს და კიბოს მკურნალობაზე საუბრისას ცრემლებს იწმენდს. „ავად გახდომამდე ყველაფრის გაკონტროლება მიყვარდა“ ამატებს ის.

მაშინ ძველ მონრეალში საზოგადოებასთან ურთიერთობის რთულ, სწრაფტემპიან სამსახურში მუშაობდა და თავისუფალ დროს კოლეგებსა და კლიენტებთან წვეულებებზე ატარებდა. ეს ცხოვრება მკერდში გაჩენილმა კვანძმა უცებ შეცვალა. ექიმთან მისვლის შემდეგ აგრესიული ძუძუს კიბო დაუდგინეს და დაუყოვნებლივ ქიმიოთერაპიისთვის დაიბარეს.

შვიდთვიანი მკურნალობა ნაწილობრივი მასტექტომიითა და ორთვიანი რადიოთერაპიით დასრულდა.

ეს დღეები მარტივი არ იყო, მაგრამ Beyries იხსენებს, რომ ცხოვრების ხედვა და სიამოვნების განცდა შეეცვალა.

სამსახური გვერდზე გადადო და საკუთარი თავის მოსასმენად, განსატვირთად ქალაქგარეთ მთის სახლი იყიდა. იქ ადგილი აღმოჩნდა პიანინოსთვის, რომელიც არასოდეს გაცნობილი ბებიისგან ერგო.

მოზარდობაში მუსიკით მხოლოდ სამოყვარულოდ იყო დაკავებული. ახალ მთის სახლში კი ახალი მუსიკალური შთაგონება მიიღო.

შემდეგ მისი ერთ-ერთი სიმღერა ადგილობრივ მოდის ჟურნალში ძუძუს კიბოს ისტორიასთან ერთად გამოქვეყნდა. ეს მისთვის მნიშვნელოვანი ჟესტი იყო, მაგრამ მუსიკალურ კარიერას არ გეგმავდა. ცხოვრება ბოლოს და ბოლოს ძველ კალაპოტს უბრუნდებოდა და ახალი რყევები აღარ სჭირდებოდა.

რამდენიმე თვის შემდეგ რეციდივი აღმოაჩინეს და ექიმებმა უთხრეს, რომ კვლავ მკურნალობა დასჭირდებოდა.

"პირველად არ იცი, რა გელოდება" ამბობს და აგრძელებს: "მეორედ უკვე იცი და ეს ძალიან მაშინებდა."

მარცხენა ძუძუს სრული ქირურგიული მოცილების შემდეგ ამჯერად აღდგენა ადვილი აღარ იყო.

სტაბილური სამსახურის გარეშე ფინანსურად უჭირდა და საოცნებო მთის სახლი უნდა გაეყიდა. მყიდველი სწრაფად ვერ იპოვა და გაკოტრდა.

"ყველაფერი სრულ ქაოსში იყო" იხსენებს ის.

იმედდაკარგულმა, დეპრესიის ბნელ პერიოდში Beyries-მა პიანინოს შეაფარა თავი და სიმღერა „მარტო“ დაწერა.

ის დაჟინებით ფიქრობდა, რომ ჩანაწერები არავის უნდა მოესმინა, მაგრამ მეგობრებმა გამოცემაზე დაითანხმეს.

სიმღერები მონრეალელ პროდიუსერ Alex McMahon-ს ჩაუვარდა ხელში, რომელმაც ემოციების გამოსახატავად სტუდიაში მიიწვია. ერთად 1970-იანი წლების Fleetwood Mac-ის, Elton John-ისა და Cat Stevens-ის სიმღერებზე იმუშავეს.

„Landing“ ასევე ოჯახის სამ თაობის ქალებს წარმოადგენს, რომელთაგან თითოეულს მის შექმნაში როლი ჰქონდა. გარეკანის ყოველი გამოსახულება მნიშვნელობის მატარებელია: ბებიის პიანინო, დედის პეპლისებრი საკიდი და სიცოცხლის სიმბოლო ქვიშის საათი.

მომავლის გეგმებზე ამბობს, რომ ამაზე საუბარი რთულია; მეორე ალბომისთვის წერს, მაგრამ ძალიან შორს გახედვა არ უყვარს. დაახლოებით 1-წლიანი რემისიის მიუხედავად, ადრე ისწავლა, რომ შორეული გეგმები მისთვის არ არის.

"ვცდილობ, მხოლოდ იმაზე ვკონცენტრირდე, რაც ახლა ხდება", — ამბობს.

მსოფლიომ Beyries Will Smith-ის მონაწილეობით გადაღებული „ნუ დაკარგავ იმედს — The Pursuit of Happyness“ ფილმის მუსიკით გაიცნო.