6 რამ, რომელთა გაყიდვები კორონავირუსის გამო მკვეთრად გაიზარდა

ახალი ტიპის კორონავირუსით გამოწვეული COVID-19 პანდემია იზრდება და ამ დროს, როდესაც მრავალი საცალო მოვაჭრე კომერციულ კრახს განიცდის, ზოგიერთი მოთხოვნის დაკმაყოფილება ძლივს ხერხდება.

ონლაინყავის კომპანიის მფლობელი: „ისევე დატვირთული ვართ, როგორც შობისას, ჩვენი გაყიდვები გაორმაგდა." ამბობს.

ღია სივრცის თამაშების გამყიდველებიც მსგავს მდგომარეობაში არიან: „მაგიდის ჩოგბურთის მთელი მარაგი ამოგვეწურა. როგორც ჩანს, ტუალეტის ქაღალდივით აუცილებელია."

ამ პერიოდში ოჯახები სახლში არიან გამოკეტილი, თუმცა სურთ იპოვონ როგორც გონებისა და სხეულის დაკავების, ისე კარგი კვებისა და განახლების გზები.

რა ნივთების გაყიდვები გაიზარდა მკვეთრად კორონავირუსის ეპიდემიის დროს?

1. თამაშები გარე და შიდა სივრცეებისთვის

გარე თამაშების მომწოდებელი Andy Beresford ამბობს: „ჩვენი მთელი მაგიდის ჩოგბურთის მარაგი და ამ კვირის ყველა წინასწარი შეკვეთა ამოიწურა."

„ამ კვირაში 124 მაგიდა გავყიდეთ. შარშან ამ დროს მხოლოდ 15-ის გაყიდვა შევძელით."

მას შემდეგ, რაც სახელმწიფომ სკოლების დახურვა გამოაცხადა, გაყიდვებმა პიკს მიაღწია.

შიდა სივრცის თამაშების გამყიდველი Andy-ც ბილიარდის მაგიდების გაყიდვების უჩვეულო ზრდაზე საუბრობს. მისი თქმით, ბილიარდის მაგიდების მარაგი 500 ერთეულიდან 250-მდე შემცირდა.

2. სახლისა და ბაღის ნივთები

Wrexham-ში Justseed-ის თესლისა და საბაღე პროდუქციის გამყიდველი Phil Jones ამბობს: „სტაფილოს, სალათის, ლობიოსა და პომიდვრის თესლზე დიდი მოთხოვნის შემდეგ შეკვეთების მიღების შეჩერება მოგვიწია."

„ეს უჩვეულო მოთხოვნაა! ვცდილობთ შეკვეთილი დიდი რაოდენობა მივაწოდოთ."

თესლის ორმა დიდმა კომპანიამ, Marshalls-მა და Suttond-მა, ტელეფონებზე პასუხის გაცემაც კი შეწყვიტა.

მიუხედავად იმისა, რომ ზოგიერთ მყიდველს ახალი ბოსტნეულის ხანმოკლე შენახვის ვადა აშფოთებს, Phil ამბობს, რომ მრავალი მათგანი უბრალოდ საქმიანობას ეძებს. „სინამდვილეში ეს ისაა, რისი გაკეთებაც წლებია სურდათ და ბავშვებთან ერთად შესასრულებელი საგანმანათლებლო აქტივობაა."

საცალო ვაჭრობის კიდევ ერთი სპეციალისტი Franchi Seeds აცხადებს, რომ პანიკური შესყიდვების გამო ვებსაიტი დროებით დახურა.

და რაც შეეხება შიდა სივრცეებში, ანუ სახლში მყოფებს? ისინი მოწყენილობის გაფანტვას ქსოვითა და კერვით ცდილობენ.

ლონდონში დაფუძნებული მაღაზიათა ქსელი Liberty აღნიშნავს, რომ ბოლო დღეებში საკერავი პროდუქციის გაყიდვები 380%-ით, ხელსაქმისა და ჰობის პროდუქციისა კი 228%-ით გაიზარდა.

3. წიგნები

კიდევ ერთი პოპულარული ძიება თავისუფალი დროის მქონე ადამიანებისთვის კარგი წიგნის პოვნაა. მოულოდნელად მოთხოვნა ეპიდემიებისა და სამეცნიერო ფანტასტიკის კატეგორიებზე გაიზარდა.

Amazon UK-ის ამ კვირის ბესტსელერების სიაში მეორე წიგნია Dean Koontz-ის „სიბნელის თვალები“. მიუხედავად იმისა, რომ 1981 წელს დაიწერა, იგი აღწერს ვირუსს სახელად Wuhan-400, რომელსაც კორონავირუსთან უჩვეულოდ მსგავსი თვისებები აქვს.

კიდევ ერთი კარგად გაყიდული წიგნი ფრანგი მწერლის Alber Camus-ის რომანი „შავი ჭირი“ გახდა. ბრიტანული გამომცემლობა Penguen-ის მიერ გამოცემულმა წიგნმა თებერვლის ბოლოსთვის გაყიდვების 150%-იანი ზრდა აჩვენა. ეს ზრდა საფრანგეთსა და იტალიასაც ეხება.

4. ელექტრონიკა

დიდი სუპერმარკეტების ქსელების ცნობით, კორონავირუსის შემდეგ შეძენილი ნივთებით ადამიანების სახლებში 1 მილიარდი ფუნტის ღირებულების მარაგი დაგროვდა.

მაშ, საით მიდის ეს ყველაფერი? ამ ყველაფრის შესანახად ადგილი უნდა გქონდეთ!

ბუნებრივია, მაცივრები და საყინულეებიც ონლაინმაღაზიების ხშირად მოძიებულ ნივთთა სიაშია.

ლეპტოპებსა და საოფისე მოწყობილობებზე მოთხოვნაც გაცხარებულია… რადგან ყველამ იცის, რომ სახლში წამოწოლილი ოფისის საქმეებს ადვილად ვერ შეასრულებს.

ელექტრონიკის გამყიდველი Dixons Carphone საუბრობს ლეპტოპებისა და პრინტერების კარგ გაყიდვებზე და ამასთან აღნიშნავს, რომ ტელევიზორების, საყინულეების, სათამაშო კონსოლებისა და სხვადასხვა ელექტრული სამზარეულოს ნივთის გაყიდვებიც 23%-ით გაიზარდა.

5. ყავა

ლონდონიდან დასავლეთით 80 მილში მდებარე ინდუსტრიულ ქალაქ Cirencester-ში დაფუძნებული, ეგზოტიკური ყავებით ცნობილი Rave Coffee აცხადებს, რომ გაორმაგებული მოთხოვნის გამო ახალი თანამშრომლები სჭირდება.

მფლობელი Vikki Hodge ამბობს, რომ 11 თანამშრომელი ჰყავს, თუმცა მოთხოვნას ვერ აუდიან და სულ მცირე კიდევ 5 ადამიანი სჭირდებათ.

Vikki მდგომარეობას ასე აღწერს. „ადამიანები ჩვენგან ყავას ჩვეულებრივ ოფისისთვის ყიდულობდნენ, ახლა კი, რადგან ოფისი სახლად აქციეს, სახლში უკვეთავენ."

ადრე ოფისისთვის ერთ შეკვეთას ვიღებდი, ახლა კი მისაღები ოთახისთვის 10 შეკვეთას ვიღებ.

6. ველოსიპედები და სავარჯიშო მოწყობილობები

როგორც ვარჯიშისთვის, ისე უფრო უსაფრთხო მგზავრობისთვის ველოსიპედების გაყიდვები ზრდას განაგრძობს.

„ადამიანები ამბობენ, დამოუკიდებლობა მინდაო," ამბობს დასაკეცი ველოსიპედების კომპანიის Brompton-ის CEO Will Butler Adams.

„ჩემი შეფასებით, ინგლისში მთლიან ბაზარზე გაყიდვები დაახლოებით 15%-ით გაიზარდა."

ამასობაში ლონდონის ველოსიპედების ასოციაცია ჩვეულებრივზე 2-ჯერ უფრო დატვირთულია. ამის მიზეზია ან ძველი ველოსიპედების განახლებით საზოგადოებრივი ტრანსპორტისგან თავის არიდება, ან უბრალოდ გასაკეთებელი საქმის ძიება.

საცალო მოვაჭრე Halford აღნიშნავს, რომ სავარჯიშო ველოსიპედების გაყიდვებიც გაიზარდა. „ადამიანებს, რომლებიც გარეთ ვერ გადიან, შენობაში ვარჯიში სურთ."

ბაზრის კვლევითი კომპანია Mintel-ის წარმომადგენელი Toby Clark ამბობს: „როდესაც ადამიანებმა დაინახეს, რომ სპორტდარბაზში ვერ წავიდოდნენ, სახლის სავარჯიშო მოწყობილობებზე გადავიდნენ."

John Lewis ამ მოსაზრებას მხარს უჭერს. მაღაზიის სპორტულ განყოფილებაში სახლის სავარჯიშო მოწყობილობებისა და ფიტნესპროდუქციის გაყიდვების თვალსაჩინო ზრდაა.

მცირე კომპანიები რთულ მდგომარეობაშია

მიუხედავად იმისა, რომ ამ მხრივ საქმეები კარგად ჩანს, კრიზისის საფრთხეც არსებობს.

Home Leisure Direct-ის Andy ამბობს, რომ საფრანგეთში ქარხნების დახურვის შემდეგ ჩოგბურთის მაგიდების ახალ შეკვეთებს ვერ უპასუხებენ.

„სავარაუდოდ ამ შაბათ-კვირამდე კარს ჩავკეტავთ.“

Andy-ს 40 თანამშრომელი ჰყავს. თითქმის ყველა მათგანი თავს მხოლოდ ამ კომპანიაში მუშაობით ირჩენს. კომპანიის დახურვისას მათი ცხოვრებაც გართულდება. ამიტომ Andy აცხადებს, რომ სახელმწიფო დახმარებისთვის მიმართავს.

Rave Coffee-ის Vikki კი ამბობს, რომ აცნობიერებს ამჟამინდელი მაღალი მოთხოვნის დროებითობას და მალე, როდესაც ამ მიდამოებში არავინ დარჩება, ბიზნესის დახურვა მოუწევს. და ამატებს: „ყველას სახეზე შეშფოთებას ვხედავ. მცირე საწარმოები ძალიან რთულ მდგომარეობას ებრძვიან."

მისი აზრით, ცოტა ხნით კიდევ გაძლება განსაკუთრებით მცირე საწარმოებისთვის გარკვეულ ფინანსებსა და ფულად ნაკადს მაინც უზრუნველყოფს.

Vikki: „ვფიქრობ, სანამ გადასახადებისა და თანამშრომლების ხელფასების გადახდას ვახერხებთ, ეს საერთო ფონდი მათაც დაეხმარება," ამბობს.

• ყველა ჩვენი სტატია კორონავირუსის შესახებ