Koronavirusla satışı kəskin artan 6 şey

Yeni tip koronavirusun törətdiyi COVID-19 pandemiyası böyüməyə davam edərkən bir çox pərakəndə satıcının ticari çöküş yaşadığı bu dövrdə bəziləri isə tələbi güclə qarşılayır.

Onlayn qəhvə şirkətinin sahibi «Milad vaxtı qədər məşğuluq, satışımız ikiqat artıb», deyir.

Açıq hava oyunları satanlar da eyni vəziyyətdədir: «Bütün stolüstü tennis ehtiyatımız tükənib. Görünür, tualet kağızı qədər lazımlıdır».

Bu prosesdə bütün ailələr evə qapansa da, həm zehnini, həm bədənini məşğul etməyin, yaxşı qidalanmağın və təravətlənməyin yollarını tapmaq istəyir.

Koronavirus epidemiyasında nələrin satışı kəskin artıb?

1. Açıq və qapalı məkan oyunları

Açıq hava oyunları tədarükçüsü Andy Beresford deyir: «Əlimizdəki bütün stolüstü tennis ehtiyatları və bu həftənin bütün ilkin sifarişləri tükənib».

«Bu həftə 124 stolüstü tennis masası satdıq. Keçən il bu vaxt cəmi 15 sata bilmişdik».

Dövlət məktəblərin bağlanacağını bildirəndən satışlar zirvəyə çatıb.

Ev oyunları satan Andy də bilyard masası satışlarının fövqəladə artdığını deyir. Bilyard masası ehtiyatının 500-dən 250-yə düşdüyünü bildirib.

2. Ev və bağ ləvazimatları

Wrexhamdan Justseed toxum və bağ məhsulları satıcısı Phil Jones deyir: «Kök, kahı, lobya və pomidor toxumlarına güclü tələbdən sonra sifariş qəbulunu dayandırmalı olduq».

«Bu, fövqəladə tələbdir! Sifariş edilmiş böyük miqdarı təmin etməyə çalışırıq».

İki böyük toxum şirkəti Marshalls və Suttond telefonlara cavab verməyi belə dayandırıb.

Bəzi alıcılar təzə tərəvəzin qısa saxlanma müddətindən narahat olsa da, Phil çoxlarının sadəcə məşğuliyyət axtardığını deyir. «Bu, əslində illərdir etmək istədikləri şeydir və uşaqlarla birgə edilə biləcək öyrədici fəaliyyətdən ibarətdir».

Başqa pərakəndə satış mütəxəssisi Franchi Seeds insanların təşvişlə alış-verişinə görə saytını müvəqqəti bağladığını deyir.

Bəs qapalı məkanda, yəni evdə olanlar? Onlar toxuma və tikişlə sıxıntılarını atmağa çalışırlar.

London mərkəzli mağaza şəbəkəsi Liberty son günlər tikiş məhsulları satışının 380%, əl işi və hobbi məhsulları satışının 228% artdığını bildirir.

3. Kitablar

Başqa populyar axtarış boş vaxtı yaranmış insanların yaxşı kitab tapmaq axtarışıdır. Təəccüblüdür ki, epidemiya və elmi-fantastika kateqoriyasına tələb artıb.

Amazon UK-nin ən çox satılanlar siyahısında bu həftə ikinci kitab Dean Koontzun «Qaranlığın gözləri»dir. 1981-ci ildə yazılsa da, koronavirusa qeyri-adi bənzəyən Wuhan-400 adlı virusdan bəhs edir.

Başqa yaxşı satılan fransız yazıçı Alber Camusun «Taun» romanı oldu. İngilis nəşriyyatı Penguenin çıxardığı kitabın satışı fevralın sonunadək 150% artdı. Bu artım Fransa və İtaliya üçün də keçərlidir.

4. Elektronika

Böyük market şəbəkələrinin açıqlamasına görə koronavirusdan sonra alış-verişlə insanların evlərində 1 milyard funt dəyərində ehtiyat yaranıb.

Bəs bu hara gedir? Hamısını saxlamaq üçün yeriniz olmalıdır!

Təbii ki, soyuducular və dondurucular da onlayn marketlərdə tez-tez axtarılanlar arasındadır.

Noutbuk və ofis cihazlarına tələbdə də çılğınlıq var... Çünki hamı evdə uzanaraq ofis işini asan görə bilməyəcəyini anlayır.

Elektronika satıcısı Dixons Carphone noutbuk və printer satışının yaxşı getməsindən danışarkən televizor, dərin dondurucu, oyun konsolu və müxtəlif elektrik mətbəx avadanlığı satışının da 23% artdığını bildirir.

5. Qəhvə

Londonun 80 mil qərbindəki sənaye şəhəri Cirencesterdə yerləşən, ekzotik qəhvələri ilə məşhur Rave Coffee ikiqat tələblə yeni heyət ehtiyacı yarandığını bildirir.

Şirkət sahibi Vikki Hodge 11 əməkdaşının olduğunu, amma tələbi çatdıra bilmədikləri üçün ən azı daha 5 nəfərə ehtiyac duyduqlarını deyir.

Vikki vəziyyəti belə izah edir. «İnsanlar adətən ofis istehlakı üçün bizdən qəhvə alırdı, amma indi ofislərini ev etdiklərindən evə sifariş verirlər».

Əvvəl ofis üçün bir sifariş alırdımsa, indi qonaq otağı üçün 10 sifariş alıram.

6. Velosiped və məşq alətləri

İstər məşq, istər təhlükəsiz səfər üçün velosiped satışı artmağa davam edir.

«İnsanlar müstəqil olmaq istəyirəm deyir», deyə qatlanan velosiped şirkəti Bromptonun CEO-su Will Butler Adams bildirir.

«Təxminimcə, İngiltərədə ümumi bazar satışları 15% civarında artıb».

Bu arada London Velosiped Assosiasiyası əvvəlkindən 2 qat məşğuldur. Səbəb ya köhnə velosipedləri yeniləyərək ictimai nəqliyyatdan uzaq qalmaq, ya da sadəcə məşğuliyyət tapmaqdır.

Pərakəndə satıcı Halford məşq velosipedi satışının da artdığını bildirir. «Çölə çıxa bilməyən insanlar qapalı məkanda məşq etmək istəyir».

Mintel bazar araşdırmasından Toby Clark deyir: «İdman zalına gedə bilməyəcəyini görən insanlar ev məşq alətlərinə yönəldi».

John Lewis də bu fikri dəstəkləyir. Mağazanın idman bölməsində ev məşq avadanlıqları və fitnes məhsulları satışında nəzərəçarpan artım var.

Kiçik şirkətlər çətin vəziyyətdədir

Bu baxımdan işlər yaxşı görünsə də, böhran təhlükəsi də var.

Home Leisure Directdən Andy Fransadakı fabriklər bağlanandan sonra yeni tennis masası tələblərini qarşılaya bilməyəcəklərini deyir.

«Yəqin bu həftəsonundan əvvəl qapımızı kilidləyəcəyik».

Andynin 40 əməkdaşı var. Demək olar hamısı yalnız bu şirkətdəki işi ilə dolanır. Şirkət bağlananda həyatlarını davam etdirmək çətinləşəcək. Buna görə dövlət dəstəyinə müraciət edəcəyini bildirir.

Rave Coffeedən Vikki indiki yüksək tələbin müvəqqəti olduğunu, tezliklə bu ətrafda heç kim qalmayacağı üçün müəssisəni bağlamalı olacağını bildiyini deyir. Əlavə edir: «Hamının üzündəki narahatlığı görürəm. Kiçik müəssisələr çox çətin vəziyyətlə mübarizə aparır».

Bir az da davam gətirməyin xüsusilə kiçik müəssisələrə az da olsa maliyyə və dövriyyə təmin edəcəyini düşündüyünü bildirir.

Vikki: «Vergilərimizi və heyət ödənişlərini edə bildiyimiz müddətdə bu hovuzun onlara da kömək edəcəyini düşünürəm», deyir.

• KORONAVİRUS HAQQINDA BÜTÜN YAZILARIMIZ