აღმოჩნდა, როგორ გარდაიქმნება პროსტატის ზოგიერთი კიბო უფრო აგრესიულ ტიპად

ანტიანდროგენული (ჰორმონების დამთრგუნველი) მკურნალობის განვითარებამ პროსტატის კიბოს მკურნალობაში რევოლუცია მოახდინა. თუმცა ამ ტიპის მიზნობრივი მკურნალობის მიმღებ ზოგიერთ მამაკაც პაციენტში მკურნალობისადმი რეზისტენტობა ვითარდება და პროსტატის კიბოს უჯრედები ნეიროენდოკრინულ ხასიათს იძენს. ნეიროენდოკრინული პროსტატის კიბოსთვის (NEPK) ეფექტიანი მკურნალობა არ არსებობს. 2019 წლის თებერვალში Cancer Cell-ში გამოქვეყნებულ კვლევაში აღმოაჩინეს, როგორ იძენს პროსტატის კიბო აგრესიულ ნეიროენდოკრინულ ხასიათს. მეტაბოლურ მოვლენებსა და ეპიგენეტიკურ მექანიზმებში ცვლილებები პროსტატის კიბოს მკურნალობისადმი რეზისტენტულს ხდის.
დაკავშირებული თემა:
პროსტატის კიბო მამაკაცებში კიბოსთან დაკავშირებული სიკვდილის მიზეზებს შორის მეორე ადგილზეა. პროსტატის კიბოს უჯრედები ზრდისთვის ანდროგენულ (მამაკაცურ) ჰორმონებს, მაგალითად, ტესტოსტერონს იყენებს. აბირატერონის და ენზალუტამიდის მსგავსმა მიზნობრივმა მკურნალობამ ამ ჰორმონების დაბლოკვით მრავალი პაციენტის სიცოცხლე გაახანგრძლივა. თუმცა შორსწასული პროსტატის კიბოს მქონე თითქმის ყველა მამაკაცში, რომელიც ამ მკურნალობას იღებს, მკურნალობისადმი რეზისტენტობა ვითარდება. პროსტატის კიბოს უჯრედები სიმსივნის მიკროგარემოს ხელახალი მოდელირებითა და სხვადასხვა სტრატეგიის შემუშავებით მკურნალობას წინააღმდეგობას უწევს. ამ ახალ გამოქვეყნებულ კვლევაში გაანალიზდა მეტასტაზური ნეიროენდოკრინული პროსტატის კიბოს (NEPK) მქონე მამაკაცებიდან აღებული ქსოვილის ნიმუშები, პროსტატის კიბოს უჯრედები და NEPK-ის თაგვის მოდელები.
კვლევის შედეგების მიხედვით;
- NEPK უჯრედებში პროტეინკინაზა C ლამბდა/იოტას (PKCλ/ι) ცილის აქტივობის შემცირება გამოვლინდა. პროტეინკინაზა C მნიშვნელოვანი სიმსივნის დამთრგუნველი გენია. ამ გენის აქტივობის შემცირება კიბოს აგრესიული ხასიათის შეძენას უწყობს ხელს.
- NEPK უჯრედები სერინის სახელწოდების მეტაბოლიტის სინთეზს ზრდის. სერინი ერთ-ერთი არაესენციური (არააუცილებელი) ამინომჟავაა. ამიტომ სერინის სინთეზის დაბლოკვა შესაძლოა კიბოს მკურნალობის ეფექტიანი და ნაკლები გვერდითი ეფექტის მქონე სტრატეგია იყოს.
- ამავე დროს NEPK უჯრედები სერინის სინთეზს mTORC1/ATF4 უჯრედული გზის გამოყენებით ზრდის. ეს ლიზოსომების სწორად განლაგებასა და ეპიგენეტიკური რეგულაციების განხორციელებას შესაძლებელს ხდის.
ქვემოთ კვლევის გრაფიკული შეჯამებაა ნაჩვენები:

რას ნიშნავს ეს კვლევა ჩვენთვის?
- ნეიროენდოკრინული პროსტატის კიბოს დროს პროსტატის კიბოს უჯრედები სრულიად განსხვავებულ ხასიათს იძენს. ისინი სამიზნედ ქცეულ ანდროგენის რეცეპტორებსაც კი ცვლის, ამიტომ არსებული მიზნობრივი მკურნალობა სარგებელს ვერ იძლევა.
- ეს კვლევა მნიშვნელოვანია იმ მექანიზმის განსაზღვრის მხრივ, რომელიც პროსტატის კიბოს ნეიროენდოკრინულ ფორმად გარდაქმნის. აღმოჩენებმა შესაძლოა ახალი თაობის ეფექტიანი მკურნალობის განვითარება შესაძლებელი გახადოს.
- კვლევაში ასევე აღინიშნა, რომ დეციტაბინი, პრეპარატი, რომელმაც 2010 წელს მიელოდისპლაზიური სინდრომის სახელწოდების ჰემატოლოგიური დაავადების სამკურნალოდ FDA -ის დამტკიცება მიიღო, შესაძლოა NEPK-ის დროსაც ეფექტიანი იყოს. ეს ჯერ კიდევ ექსპერიმენტულ ეტაპზეა. კლინიკურ კვლევებში მისი ეფექტიანობა უნდა დადასტურდეს. დეციტაბინი ჰიპომეთილირების თვისების მქონე პრეპარატია, რომელიც ეპიგენეტიკურ მექანიზმებს უმიზნებს.
წყაროები
Increased Serine and One-Carbon Pathway Metabolism by PKCλ/ι Deficiency Promotes Neuroendocrine Prostate Cancer.
Cancer Cell, 28 February 2019.
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.