ახალი დასაწყისი სერვიქსის (საშვილოსნოს ყელის) კიბოს მკურნალობისთვის

მკურნალობისადმი რეზისტენტული, რეციდივირებული და მეტასტაზური სერვიქსის (საშვილოსნოს ყელის) კიბოს მქონე ქალების პირველი ხაზის მკურნალობის ახალი სტანდარტია PD-L1-დადებით პაციენტებში bevasizumab-თან ერთად ქიმიოთერაპიაზე pembrolizumab-ის დამატება.
KEYNOTE-826 კვლევა ევროპის სამედიცინო ონკოლოგიის საზოგადოების (ESMO) 2021 წლის კონგრესზეიყო წარდგენილი.
იმუნოთერაპიის როლი საშვილოსნოს ყელის კიბოში
ამ კლინიკურმა კვლევამ აჩვენა, რომ საკონტროლო წერტილის ინჰიბიტორის კლასის იმუნოთერაპიის, pembrolizumab-ის ( Keytruda ) სტანდარტულ ქიმიოთერაპიაზე (bevasizumab-ით ან მის გარეშე) დამატება მხოლოდ ქიმიოთერაპიასთან შედარებით როგორც დაავადების პროგრესირების, ისე სიკვდილის რისკის დაახლოებით ერთი მესამედით შემცირებასიწვევდა.
Pembrolizumab-ის დამატების სარგებელი გამოვლინდა როგორც მთლიან საკვლევ ჯგუფში, ისე უფრო მაღალი დონის დაპროგრამებული სიკვდილის ლიგანდ-1-ის (PD-L1) დადებითობის მქონე პაციენტებში, თუმცა PD-L1-უარყოფითი სიმსივნეების მქონეებში არ გამოვლინდა.
მთლიანობაში KEYNOTE-826-ის მონაცემები მიანიშნებს, რომ pembrolizumab-ისა და პლატინაზე დაფუძნებული ქიმიოთერაპიის კომბინაცია bevasizumab-ით ან მის გარეშე შეიძლება პირველი ხაზის მზრუნველობის ახალი სტანდარტი იყოს. კვლევა ასევე The New England Journal of Medicine-ში ონლაინ გამოქვეყნდა.
2014 წლიდან რეციდივირებული, მკურნალობისადმი რეზისტენტული ან მეტასტაზური საშვილოსნოს ყელის კიბოს მქონე პაციენტების სტანდარტული მკურნალობა, GOG 240 კვლევის შედეგების მიხედვით, იყო პლატინისა და პაკლიტაქსელის ორმაგი ქიმიოთერაპია და bevasizumab.
PD-1 ინჰიბიტორებით იმუნოთერაპია საშვილოსნოს ყელის კიბოს მქონე ქალებში ეფექტიანობას აჩვენებს მეორე ან შემდგომი ხაზის მონოთერაპიის სახით (იხილეთ შესაბამისი FDA-ის ნებართვა), თუმცა აქამდე ამ პრეპარატების ქიმიოთერაპიაზე დამატების შესახებ მონაცემები არ არსებობდა.
საშვილოსნოს ყელის კიბოს მქონე პაციენტებში PD-1-ის წინააღმდეგ მიმართული საკონტროლო წერტილის ინჰიბიტორების გამოყენებას მყარი საფუძველი აქვს, რადგან PD-L1 საშვილოსნოს ყელის კიბოს გამომწვევი ადამიანის პაპილომავირუსით (HPV) ინფექციის თანმიმდევრული ბიომარკერია.
PD-L1 საშვილოსნოს ყელის კიბოში მნიშვნელოვნად დადებითია და იმუნოჰისტოქიმიური შეღებვით შეიძლება გამოვლინდეს. კიბოს უჯრედებისა და ზოგი იმუნური უჯრედის ზედაპირზე არსებული PD-L1 მოლეკულა T უჯრედებზე მდებარე PD-1-ს უკავშირდება, შესაბამისად, შეუძლია მათი ფუნქციების დაბლოკვა და იმუნური პასუხის შემცირება. ეს შედეგები აჩვენებს, რომ PD-1/PD-L1 გზაზე დამიზნება თერაპიულად ეფექტიანი შეიძლება და უნდა იყოს. PD-L1 საშვილოსნოს ყელის კიბოს მკურნალობისას გასათვალისწინებელია.
KEYNOTE-826 კვლევის დეტალები
- KEYNOTE-826 იყო ორმაგად ბრმა კვლევა, რომელიც ჩატარდა დიაგნოზის დასმისას მეტასტაზურად კლასიფიცირებულ 617 პაციენტში.
- პაციენტების PD-L1 კომბინირებული დადებითი ქულა (CPS) შემდეგნაირად დაჯგუფდა:
- < 1,
- 1-დან < 10-მდე ან
- ≥ 10.
- პაციენტები 1:1 თანაფარდობით შემთხვევით განაწილდნენ, რომ ყოველ 3 კვირაში 35 ციკლამდე მიეღოთ pembrolizumab ან პლაცებო და პლატინაზე დაფუძნებული ქიმიოთერაპია (მკვლევრის შეხედულებით დამატებული bevacizumab-ით).
- პროგრესირების გარეშე გადარჩენა და საერთო გადარჩენა კვლევის ძირითად საბოლოო წერტილებად განისაზღვრა.
გადარჩენის შედეგები
- 22-თვიანი მედიანური დაკვირვების შემდეგ PD-L1 CPS ≥ 1-ის მქონე ყველა პაციენტში 12-თვიანი პროგრესირების გარეშე გადარჩენის მაჩვენებელი pembrolizumab-ის ჯგუფში 45,5% იყო, პლაცებოს ჯგუფში კი — 34,1%.
- Pembrolizumab-მა PD-L1-დადებით პაციენტებში კიბოს პროგრესირების რისკი 48%-ით შეამცირა.
- ყველა პაციენტის ჯგუფში პროგრესირების გარეშე გადარჩენის მაჩვენებლები 44,7% და 33,5% იყო.
- PD-L1 CPS ≥ 10-ის მქონე პაციენტებში პროგრესირების გარეშე გადარჩენის მაჩვენებლები, შესაბამისად, 44,6% და 33,5% იყო.
- PD-L1 CPS ≥ 1-ის მქონე ყველა პაციენტში 12-თვიანი და 24-თვიანი საერთო გადარჩენის მაჩვენებლები pembrolizumab-ის მიმღებებში, შესაბამისად, 75,3% და 53% იყო, პლაცებოს მიმღებებში კი — 63,1% და 41,7%. ეს აჩვენებს, რომ pembrlizumab-მა სიკვდილის რისკი 36%-ით შეამცირა.
- ყველა პაციენტის ჯგუფში 12- და 24-თვიანი საერთო გადარჩენის მაჩვენებლები pembrolizumab-ით, შესაბამისად, 74,8% და 50,4% იყო, პლაცებოთი კი — 63,6% და 40,4%. ეს განსხვავება pembrolizumab-ისთვის სიკვდილის რისკის 33%-ით შემცირებას ნიშნავდა.
- უფრო მაღალი PD-L1 დონის (≥ CPS 10) მქონე პაციენტებში შესაბამისი საერთო გადარჩენის მაჩვენებლები pembrolizumab-ით 75,7% და 54,4% იყო, პლაცებოთი კი — 61,5% და 44,6%.
- თუმცა PD-L1-უარყოფით ქვეჯგუფებში გადარჩენის მონაცემების მნიშვნელოვანი გაუმჯობესება არ გამოვლენილა.
ყველაზე ხშირი ≥ 3 ხარისხის გვერდითი მოვლენები იყო ანემია, რომელიც pembrolizumab-ის მიმღები პაციენტების 30,3%-ში და პლაცებოს ჯგუფის 26,9%-ში გამოვლინდა, და ნეიტროპენია, რომელიც პაციენტების, შესაბამისად, 12,4%-სა და 9,7%-ში აღინიშნა. Pembrolizumab-ის ჯგუფში ერთი პაციენტი გარდაიცვალა ენცეფალიტით, იმუნიტეტთან დაკავშირებული მოვლენით.
დასკვნის სახით, PD-L1-დადებითი სიმსივნეების მქონე შორს წასული საშვილოსნოს ყელის კიბოს მქონე ქალების პირველი ხაზის მკურნალობაზე pembrolizumab-ის იმუნოთერაპიის დამატება სიკვდილის რისკის დაახლოებით ერთი მესამედით შემცირებას იწვევს და ამ პაციენტებისთვის მკურნალობის ახალ სტანდარტს ქმნის.
წყაროები
2. ESMO Congress 2021. Abstract LBA2. Presented September 18, 2021.
3. New Standard of Care in Cervical Cancer - Medscape - Sep 19, 2021.
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.